Read Ateso Aswamisio 12 Bible Online

Aswamisio 12 - Ateso bible

Aswamisio 12

¹ Kapak kaŋin korio Kerode ekabaka akekanin aikonakin erono ice lukokanisa.

²Koar Yakob onace loka Yokana kekileŋ;

³nakeanyunia ebe itojokito Iyudayan, kiyatak aikamun Petero da. Keraas apaarasia ŋun nuka Imugatin lumam itubuunitoi.

⁴ Nakedaunia aikamun, kogolok aidaris, kibwaik akanin nuka irioŋeta iwoŋon luka iserikalei iwoŋon iwoŋon, tetere idarete; kokoto aitolomun ŋes neejaas ituŋa kedaun Aleleŋ.

⁵ Aso kidarai Petero kaidaris; konye kinyikokis noi lukokanisa ailip Edeke kanukeŋ.

⁶ Kakuar kaŋin naakotor Kerode aitolomun ŋes, kojotoi Petero kokidiŋ kiserikalei iarei, eenitai kirikoi iarei, kojaas ikedarak okek idarete aidaris;

⁷ ido koany, kobwo emalaika loka Ejakait aapu kaŋes, kocau aica kagola; kinom Petero osiep kitwekeny, kobala ebe, “Konyou atipet.” Kodooto irikoi kakaninike.

⁸Kotema emalaika ŋes atiar, “Konap, kirupak da akonimuk.” Kiswama kwaŋin, Kotema ŋes atiar, “Kimukok ekonilou, kotupunai.”

⁹Koloma kotup ŋes; mam abu kojen ebe nueswamai emalaika eraas nukabeit, konye aomit ŋesi ebe aanyu aitapoet.

¹⁰Naketuborotor kaidaret nasodit ka nakiareit, kodoloto okek lokasua lolomaret kiŋa toma ore; koŋaari bon, kolomasi kiŋa kitoroto orot ediopet; atipet kinye ŋes emalaika.

¹¹Kosodi nakejenunia kotema atiar, “Kwana ajeni abeit ebe ejuku Ejakait ekemalaika alemun eoŋ kakan naka Kerode ka kere nuemuno ateker naka Iyudayan.”

¹² Nakedaunia aomoom ŋun, kolot togo loka Mariam, toto naka Yokana ŋol loerai ekekiror lokiareit Marako; ketukokina ituŋa luipu nen, ilipete.

¹³Nakikuŋukuŋio ekek loka erute, kobu apese ekekiror Roda ajaar.

¹⁴Nakejenunia eporoto loka Petero, mam eŋaara ekek kanuka aiyalama, konye koker koloma toma, kobala ebe, “Ebwoi Petero kokek.”

¹⁵ Kotemasi ŋes atiar, “Kikerepiki ca ijo.” Konye kitogogoŋ noi ebe ikote nen. Kotemasi atiar, “Erai ekemalaika.”

¹⁶Konye kiyatak Petero aikuŋukuŋ; kiton neaŋaariata, koanyutu ŋes, koumokis.

¹⁷Konye kisililiŋ kes kakekan, kitatamik kes kwape kelemunia ŋes Ejakait kotoma aidaris. Kotema atiar, “Kolimokis Yakob ka iinacan da akiro ŋun.” Kosodi konyou kolot aibois ace.

¹⁸ Nakiwalaria akwap, kobur iserikalei kanuadoikis Petero,

¹⁹Nakemoia Kerode komam edumuni, kiŋitiŋit ikedarak, kicorak aario. Kosodi kijesar anyoun koYudaya alosit Kaisarea, kosalak nen.

²⁰ Konyunyurik Kerode ituŋa luko Turo ka Sidon, kolosikis Ŋes ketau ediopet, ido kedaut aipaperikin ka Bulasito, lokedaran agola naperot naka ekabaka, kilipa ainapakin, naarai kedumunit akwapukec inyamat kakwap naka ekabaka.

²¹Kapaaran naaseunitai konap Kerode ikenapen luka ekabakane, kiboikin oicoloŋ loka ekabakane, kiner akiro kamakec.

²² Kocelut ituŋa kobalas ebe, “Ŋes eporoto loka edeke, mere loka etuŋanan!”

²³ Atipet kinom emalaika loka Ejakait, naarai mam kitubusikinit Edeke; konyamata ŋes ikur, kotwana.

²⁴ Konye kiyatakin akirot naka Ejakait, konyanyaar.

²⁵ Koboŋosi Baranaba ka Saul koYerusalem, kedaut aijaanakinikec, kouparos Yokana loenyaritai Marako kakes.