Read Ateso Aswamisio 13 Bible Online

Aswamisio 13 - Ateso bible

Aswamisio 13

¹ Ko Antiokia, kokanisa lokejai kanen kojaas inabin ka ikesisianakinak, kes Baranaba, ka Simeon loenyaritai Niger, ka Lukio loko Kurene, ka Manaen Lokitanakio nepepe ka Kerode ekabaka, ka Saul da.

² Kosodi napijaanakinete Ejakait, ka ailuŋ, kotema Emoyo Lokalaunan atiar, “Kogitakinai Baranaba ka Saul kanuka aswam naanyarakinit kes.”

³ Kosodi kedaut ailuŋ ka ailip, kidokokis kes akecekanin kotwarata.

⁴ Kosodi kijuka Emoyo Lokalaunan kijesaros Seleukia; kenyoutu kanen kikwaŋaros kiton Kupuro.

⁵ Nakedolioto Salamis, kolimonokis akirot naka Edeke katukosia nuka Iyudayan. Kojaas ka Yokana ijaanakini kes.

⁶Nakedauniata aitor apujan kere kiton Papo, kodumut ekacudan, enabi lokeŋalan, Eyudayat, ekekiror Bar-Yesu;

⁷kejaas etuŋanan ŋol nepepe ka ekayaiton, Serugio Paul, etuŋanan loka acoa. Konyara ekayaiton Baranaba ka Saul, kokoto aiirar akirot naka Edeke.

⁸ Konye Elumayo ekacudan (ŋes apolou naka ekekiror) kopegata kakes, kokoto aitapaar ekayaiton ainyein aiyuun.

⁹Konye Saul, ŋes Paul, kilelebun Emoyo Lokalaunan, koŋanyak ŋes akonye,

¹⁰ kobala ebe, “Ijo loileleba aimod ka aronis kere, ijo okoku loka Satan, lokasurup loka adolit kere, mam kereka inyeini aitapaar irotin luitenara luka Ejakait?

¹¹ Kwana da, koany, ejai akan naka Ejakait mamakon, imudukanar ijo, komam ianyuni akoloŋ adaun apak.” Atipet kodoik ŋes elisina ka amuton, koturiaitoi ka amoot luerikete kakan.

¹²Kosodi kiyu ekayaiton, nakeanyunia nukiswamao, naarai koumok aisisianakin naka Ejakait.

¹³ Kosodete kikwaŋaros Paul ka ikepaup anyoun koPapo, kodoloto Peruga toma Pampulia. Kinye kes Yokana kanen koboŋo Yerusalem.

¹⁴Konye kes, konyout koPeruga kitoroto akwap kodoloto Antiokia ere loka Pisidia. Kolomas atukos kapaaran nakasabato, kiboikinos.

¹⁵ Kedaut asoman ikisila ka inabin, kiyakiasi ikayaitok luka atukos mamakec ebe, “Iinacan, arai ijaas kakirot nakaicor ituŋa, kolimut.”

¹⁶Kobwo Paul kokwet kakan kobala ebe, “Ikiliok luka Isirael, ka yes da luiyoŋito Edeke, kiirasi.

¹⁷ Edeke loka ituŋa kalu luka Isirael abu koseu lukapapaawok, kitopoloo ituŋa nakiboiororoto kakwap nako Misiri, kitolom kakan naerioro.

¹⁸ Apak bala naka ikar akaisaoŋon kotitiŋik kes kamodiŋ.

¹⁹ Nakedaunia amudiar atekerin akanykaarei kotoma akwap nako Kanaan, koinak kes akecekwap araut airumet, apak naka ikar bala akwat aoŋon ka akaisakany.

²⁰ Akaulo kaŋun koinak kes ikatubok kiton Samuel enabi.

²¹ Kosodete kilipa ekabaka; koinak Edeke Saul okoku loka Kis, lokateker naka Benyamin, apak naka ikar akaisaoŋon.

²² Nakelemaria ŋol, kodakak Daudi araut ekabakakec; lokitejenuni ŋesi ebe, ‘Adum Daudi okoku loka Yese etuŋanan loitalakarit ekatau, loebuni aswam nuakoto eoŋ kere.’

²³ Kotoma aur naka etuŋanan kaŋol ainu Edeke Isirael Eketajaran, ŋes Yesu, kwape esumunitor.

²⁴ Eriŋa ŋesi ebuno abu Yokana koliŋak alimonokin ituŋa kere luka Isirael aibatis naka aitoronikin.

²⁵ Napedauni Yokana akelosit, kobala ebe, ‘Kiwomito eoŋ araut iŋai? Mam arai ŋol. Konye koany, ebunit kokaukaŋ lomam kebusakinit eoŋ alacar amuk nuka akejeke.’

²⁶ “Iinacan, idwe luka aur naka Aburaam, ka luiyoŋito Edeke da kotomakus, ejukun akirot naka aitajario mamawok.

²⁷ Naarai luiboiete koYerusalem, ka ikayaitokokec, kanu mam ajenuniata ŋes, karaida akiro nuka inabin nuesiomenenoo ŋinisabato, etodolikis kanuka atubokin ŋes.

²⁸ Karaida mam eanyunitos akirot naibusakinitor atwanare, konye kilipata Pilato koarai.

²⁹ Nakedauniata aitodolikin kere nukiwadikatai kanukeŋ, kijesut kokitoi, kibwaikis ates.

³⁰ Konye kitajaru ŋes Edeke kokatwak.

³¹ Apaarasia nuipu kitakanikin ŋul lukedokarete nepepe kaŋes anyoun koGalilaya kiton Yerusalem, lueraas kwana ikajenakake mama ejaas ituŋa.

³² Kiinunit isio yes akiro nukajokak nuka aisumunet nakeinakinio lukapapaawok,

³³ ebe etodolik Edeke oni ikecedwe aisumunet ŋin, kanuka aitajarun Yesu; kwape iwadikatere kotoma osabuli lokiareit ebe, ‘Irai ijo Okokuka, Lolo kawuru jo.’

³⁴ Ido kanuka akirot kaŋin ebe etajaru ŋes kokatwak, kinye bobo aboŋor aibos, inera kwanata ebe, ‘Kainakini yes arereŋesio nukalaunak ka nuicasito nuka Daudi.’

³⁵ Kanuka ŋun inera kosabuli ece ebe, ‘Mam icamuni Ekalaunanikon aibos.’

³⁶ Naarai Daudi, kedau aijaanakin ainerun naka Edeke katurike, abu kojotoor, kibwaikinai nepepe ka lukapapaake, kobos;

³⁷konye ŋol lokitajaruni Edeke mam abu kobos.

³⁸ Aso do iinacan, kojenutu ebe, kotoma otuŋanan kaŋol elimonokinio yes aisionio naka adiakanareta;

³⁹ ido kotomakeŋ ŋin yeniyuuni imarakinio adolit kakiro kere, numam epedorere aimarakin adolit kokisila luka Musa.

⁴⁰ Aso kocoito, kinye akirot adoikin yes, nainerito inabin ebe:

⁴¹ ‘Koanyutu, yes ikamenak, koumokis, kooliosi; Naarai eswamai eoŋ aswam kapaarasiakus, Aswam namam iyuunete cut, karaida kiilimonok ituŋanan yes.’ ”

⁴²Napelomarete, kiŋaiŋaata alimokin akiro ŋun kasabato naatupakini.

⁴³ Nakisiarakinor atukokin naka atukos, apotu Iyudayan luipu ka ikebelokinok lueyoŋito Edeke kotupasi Paul ka Baranaba, lukinerasi kakes, kisicerededata aiyatakin kotoma asianut naka Edeke.

⁴⁴Kosodi kasabato naatupakini kotukokinos ituŋa luipu, aapie ere kere, aiirar akirot naka Edeke.

⁴⁵ Konye nakeanyuniata Iyudayan ikodeta, kilelebun ekolo, kitepega nuenera Paul, komoromoroto da.

⁴⁶ Kinerata Paul ka Baranaba katitiŋikin ebe, “Ibusakinit akirot naka Edeke ainerio ber kamakus. Konye naarai igaguarete kamakus, itubokinos bonik araut lumam ibusakinito aijar namam edaun, koany, kibelokin do mama ejaas Imo.

⁴⁷ Naarai abu Ejakait kicorak sio kwaŋin ebe, ‘Kebwaik jo araut aica naka Imo, Tetere iyauni aitajario kiton osaŋeta luka akwapin.’ ”

⁴⁸ Nakiirariata Imo ŋun, kiyalamikinos, kitopoloos akirot naka Ejakait; ŋul da lukelosikinito aijar namam edaun kiyuut do.

⁴⁹Kisiarakin akirot naka Ejakait akwap ŋin kere.

⁵⁰Konye kicecemoto Iyudayan aŋor nueyoŋito nukapolou ka ikeŋarenikinok luka ere, kisidikoto aimanit Paul ka Baranaba, kireŋeasi koikorunokec.

⁵¹ Konye kilakilakata adai nuka akejekec, koloto Ikonium.

⁵²Kilelebunos ikesisiak aiyalama ka Emoyo Lokalaunan.