Read Ateso Aswamisio 16 Bible Online

Aswamisio 16 - Ateso bible

Aswamisio 16

¹ Ido kodol Derube ka Lusitura: nekejai ekesisian ekekiror Timoteo, okoku loka aberu Ayudayat nakiyuunit; konye papake kerai Eyonanit.

² Kitejenut iinacan lukiboiete koLusitura ka Ikonium kwape ejokiar ŋesi.

³Kokotokin Paul ŋol aupakin kaŋes; koyaŋa kokep ŋes kanuka Iyudayan lukejaas atutubeta ŋun, naarai kejenete kere ebe kerai papake Eyonanit.

⁴ Kosodete nakitoritotor oreria, koinakis kes aicorakineta nukicorakinete ikiyakia ka imakio luko Yerusalem tetere ericete.

⁵Kwaŋin kitogogoŋoi ikanisan kotoma aiyuun ŋin, kiyatanakin etiaikec ŋinipaaran.

⁶ Kitoroto akwap naka Pirugia ka Galatia, kisimik kes Emoyo Lokalaunan alimonokin akirot toma Asia.

⁷Nakedolioto atereikina Musia, kotama alosit Bitunia, konye mam Emoyo loka Yesu abu kocamak kes,

⁸Aso kinaca Musia kijesaros Tiroa.

⁹Koany Paul aitapoet kuare: bala ebwoi etuŋanan loko Makedonia iŋaiŋait kobala ebe, “Kikwaŋun Makedonia, kiŋarak sio.”

¹⁰Nakedaunia aanyun aitapoet, atipet kakotos alosit Makedonia, naarai kiwomit cut ebe kinyarit Edeke sio alimonokin kes akiro nukajokak.

¹¹Aso kekwaŋaros anyoun koTiroa, karasasi Samoturake, kapaaran da naatupakini kadoloto Neapoli.

¹²Kanyoutu kanen kadoloto Pilipi, ere lokapolon loka akwap nako Makedonia, akwap nakebwotunito ice ko Romayon. Keboioto kore kaŋol apaarasia adis.

¹³Kosodi kapaaran nakasabato kalomutu korute kaloto ariri kecor, nekiwomit ebe kejai aibois nakilipet; keboikinos kenerata kaŋor nukidumuni kanen.

¹⁴ Aberu, ekekiror Ludia, nakegwelanari iboro lumugeik, naka ere loka Tuatira, naeyoŋit Edeke, kopup sio: nakepukorit Ejakait eketau tetere ecoit akiro nuenera Paul.

¹⁵Kosodi kedau aibatisao, ŋes ka lukokaleke, kiŋaiŋa sio, kobala ebe, “Arai ianyunito eoŋ arai naiyuunit Ejakait, kolomutu togoka kipejoto.” Kitiŋa sio.

¹⁶ Napekilosi aibois naka ailip, keriamata kapese naejai ajokit naka aidwar, nakedumanakini ikejaka ameda naepol naka aidwar.

¹⁷ Kotupu ŋin Paul ka sio iworoi ebe, “Ituŋa lu eraas ikejaanakinak luka Edeke loejai kuju kakuj, lukilimonokinete yes erot loka aitajario.”

¹⁸ Kikoni nen apaarasia nuipu. Konye koŋoiar Paul, kibelokin kotema ajokit atiar, “Kecorakini jo kokiror loka Yesu Kristo kolom kamakeŋ.” Kolom kosawa kaŋope kaŋol.

¹⁹Konye nakeanyuniata ijakake ebe atwakiasi ameda naamunos, kikamutu Paul ka Sila, kidilidilasi kiton agwelanaret akonyen nuka ikayaitok;

²⁰ koyaŋaasi mama ejaas ikatubok kotemasi atiar, “Ituŋa lu eraas Iyudayan, amunaasi erewok,

²¹bobo da elimonokinete iponesio lueraas luketal kamawok Iromayon acamun karaida aswam.”

²² Konyou ekodet kere asurokin kes: kolacasi ikatubok inapenekec kagogoŋ, kicorakis kes aleio kisureta.

²³Nakedauniata aile noi, kogolokis aidaris, kicorakis ekedaran aidar kes kacoit,

²⁴Kedau adumun aicorakinet ŋin, kibwaik kes toma aidaris nakotoma, koen akejekec oloin.

²⁵Konye kidiŋebai ilipete Paul ka Sila, eyeikinete Edeke ikososio luka aiturit, kopupete ienan da ice;

²⁶atipet kojau amaran naepol naka akwap, komaranata apeteta nuka aidaris; atipet koŋaaros ikekia kere, kolacaros da aeneta nuka ituŋa kere,

²⁷Kokweny ekedaran, nakeanyunia ebe eŋaara ikekia luka aidaris, kout ekekileŋ, kokoto aarakin, koomit ebe asiata ienan.

²⁸Konye kiworo Paul keporoto loepol ebe, “Sirikimusuŋikin, naarai kija isio ne kere.”

²⁹Konyarau atalai, komotar toma, emarani kanuka akurian, kibirokin akonyen nuka Paul ka Sila,

³⁰ kitolom kiŋa, kotema atiar, “Ikajaka, kekonak ai tetere ketajario?”

³¹Kobalasi ebe, “Kiyuu Ejakait Yesu, kitajario jo ka lukokalekon kere.”

³²Kolimokis ŋes ka ituŋa kere luajaas togoke akirot naka Ejakait,

³³Kisukunyik kes kosawa kaŋol loka akuare, kilot ikecemacarin, atipet kibatisai ŋes ka iketuŋa kere.

³⁴Kosodi koyau kes togoke, koinak kes inyamat, kolakara noi, ŋes ka ekekale kere, naarai iyuunit Edeke.

³⁵Konye kiwala akwap, kiyakiasi ikatubok ikapolok luka iserikalei, kobalas ebe, “Koosikis ituŋa ŋul koloto.”

³⁶Kitejen ekedaran Paul akiro ŋun ebe, “Eyakuut ikatubok aosikin yes: aso do kolomutu, koloto inapakina.”

³⁷ Konye kotema Paul kes atiar, “Apotu koleata sio kakonyen nuka ituŋa kere, komam etubokina, kwabo kirai isio Iromayon, bobo da kigolokis aidaris; kwana da ekotosi cabo alacakin kaiyeiyea? Mam cut; konye kopotu kesi ikulepek kolacakis sio.”

³⁸Kolimokis ikapolok luka iserikalei ikatubok akiro ŋun; kokuriakaros nakiirariata ebe eraas ŋul Iromayon;

³⁹ kopotu, kiŋaiŋaata; nakedauniata aitolomun, kilipa kes anyoun kore kaŋol.

⁴⁰Konyoutu do kaidaris kolomasi togo loka Ludia: ido kedaut aanyun iinacan, kitalakasi kes, koloto.