Read Ateso Aswamisio 17 Bible Online

Aswamisio 17 - Ateso bible

Aswamisio 17

¹ Nakedauniata aitor Amipipoli ka Apolonia, kodoloto Sesalonika, nekejai atukos naka Iyudayan,

²Kosodi koloma Paul mama ejaas, kwape kejaar ekepone, kopeta kakes nukiwadikatai asabaton auni.

³ Kikujok kitogogoŋ da ebe ebusakinit Kristo aiticanio ka ajarun kotoma okatwak, ebe da, “Yesu ŋol lokalimonokini yes, ŋes Kristo.”

⁴Kiyuut ice kakesi, kimorikikinos ka Paul ka Sila; ka Iyonanin lukiyaparito luipu noi, ka aŋor da nukapolok numam ikidioko,

⁵Konye kilelebun Iyudayan ekolo, koyaŋas ituŋa lueroko luutai, kotukokis ekodet, kigurut ere, kosurokis etogo loka Yason, kokotos aitolomun kes otuŋa.

⁶ Nakekurwokis adumun kes, kiriasi Yason ka ice koinacan mama ejaas ikapolokitok ere, kiworoto ebe, “Ituŋa lu luabuburiasi akwap adolutu ne da,

⁷ esukunyiki Yason kes; iswamaete ŋul kere nuesurokinete ikisila luka Kaisar, kobalas ebe, ejai ekabaka ece, loenyaritai Yesu.”

⁸Kiyaloŋoŋoto ekodet ka ikapolokitok ere nakiirariata ŋun,

⁹Kosodete nakedauniata aitelemun Yason ka ikepaup aititiŋet, koosikis kes alosit.

¹⁰Atipet kijukasi iinacan Paul ka Sila Beroea kuare; nakedolioto ŋina kolomasi atukos naka lyudayan.

¹¹ Konye kejokuka lu aitelekarit luko Sesalonika, naarai apotu kocamut akirot kitauon luekapakina, koŋicenenata nuiwadikatai ŋinipaaran ajenun arai ikote akiro ŋun nen,

¹²Kanuka ŋun kiyuut luipu kakesi, ka aŋor nuYonanin nusotia ka ikiliok da lumam ikidioko.

¹³ Konye kejenut Iyudayan luko Sesalonika ebe elimonokini Paul akirot naka Edeke koBeroea da, kopotu nen da kisidikoto kigurut ikodeta.

¹⁴ Kosodi atipet kijukasi iinacan Paul alosit adolore aŋolol, konye kosalata Sila ka Timoteo nen.

¹⁵Konye lukinyamakinete Paul koyaŋaasi kiton Asene; kosodete kicorakinai alimokin Sila ka Timoteo abunore mama ejai atipet kwape epedoriata, koloto.

¹⁶Kosodi nakejaar Paul Asene idaret kes, koriebakin eketau nakeanyunia ere ileleba aputosia.

¹⁷Kwaŋin kopetanak lyudayan ka lukeyoŋito Edeke akiro kotoma atukos, ido ŋinipaaran kagwelanaret kaŋul lukiriamununos kaŋes.

¹⁸ Ice luka ikaminak acoa luka Ipikurean ka Isitoikin kiriamunos kaŋes, Kobalas ice ebe, “Ekoto kereka ekenerat lo einer anyoika?” Kobalas ice ebe, “Etakani bala elimonokini akiro nuka idekesio lumo.” Naarai kelimonokini Yesu ka ajarun.

¹⁹Kikamut ŋes koyaŋaasi Areopago, kobalas ebe, “Kipedori kereka isio ajenun anyoin aisisianakin na nakitetet nainera ijo?

²⁰Naarai iyaŋaut akiro numo akiikosi; aso do kikoto ajenun apolou naka akiro kanu,”

²¹Naarai kemameete luka Asene ka imo lukiboienenete kanen aceswam dimarai aitatam arai aiirar akiro nukitetiak.

²²Kobwo Paul kokidiŋ Areopago, kobala ebe, “Yes ituŋa luka Asene, amisiiki ebe iraas luka edini kakiro kere.

²³Naarai naketoritor, ka aanyun iboro luimaete, abu kadum etem lokiwadikatai akiro nu ebe, ‘LOKA EDEKE LOMAM EJENA.’ Aso kalimonokini yes ŋol loimaete komam ijenete.

²⁴ Edeke lokesubi akwapisinei ka iboro kere luejaas toma, naarai erai ŋesi Ejakait loka akuj ka akwap, mam iboie kabilai nuedukio kakanin,

²⁵ kwabo mam ijaanakinio kakanin nuka ituŋa, bala ipuda idiobore; naarai ŋes elopet einakini kere aijar ka eiyeŋane ka iboro da kere.

²⁶ Kojautene ediopet kosub atekerin kere nuka ituŋa aiboi kakwapin kere, nakedaunia aibwaikin apakio ka iikorun luka aiboisiokec,

²⁷ tetere emoete Edeke, moto erarapete ka adumun ŋes; karaida mam elwana kaneejai ŋinidiopet kaoni,

²⁸ ‘Naarai kotomakeŋ, kijari, kilosi, kijai da’; kwape abalatar ice kokapwakunakakus ebe, ‘Naarai kirai oni aurike.’

²⁹ Aso naarai kirai oni aur naka Edeke, mam kibusakinit aomit ebe eput Edeke ka esabu, karaida epuesa, karaida amor, iboro luegerio kanuka apirianut ka acoa naka ituŋa.

³⁰ Mam abu Edeke kosesenenei apakio nuka aolit, konye kwana icorakini ituŋa kere luejaas aiboisio kere aisilar:

³¹ naarai abu kibwaik apaaran naebunio atubokin akwapin kadolit, kotuŋanan loaseunit; ido itogogoŋit ŋun mama ejaas ituŋa kere, kanuka aitajarun ŋes kokatwak.”

³²Kosodi nakiirariata nuka ajarun naka ikatwak, kokienatar ice; konye kobalas ice ebe, “Kiirari bobo jo kakiro kaŋun.”

³³Kosodi konyou Paul kinye kes.

³⁴Konye kimorikikinos icetuŋa kaŋes, kiyuut; kotomakec kojai Dionusio Eareopagot, ka aberu naenyaritai Damaris, ka icetuŋa da nepepe kaŋul.