Read Ateso Aswamisio 2 Bible Online

Aswamisio 2 - Ateso bible

Aswamisio 2

¹ Nakedolio apaaran naka Pentekosit, kejaas kere nepepe aibois adiopet.

² Koŋesun airuruma kokuju bala airuruma naka ekwam loekusi ka gogoŋ, kilelebun etogo kere lokiboioto.

³ Kotakanut aŋajepa nuketiakatiaka bala nuka akim; kodoik ŋinidiopet kakesi.

⁴ Kilelebai kere Emoyo Lokalaunan, kogeut einer aŋajepa ace, kwape keinakinia Emoyo kes einer.

⁵ Kejaas Iyudayan lukiboiete koYerusalem, ituŋa luiyapaarito lukepote kaŋiniteker nakokwap kakuj.

⁶Kosodi nakiirarere airuruma ŋin, kotukokinos ikodeta, kitirirata, naarai abu ŋinituŋanan kiira kes inerasi aŋajepeke.

⁷Koumokis kere noi noi, kobalas ebe, “Koany, mam kereka lu kere luinerasi eraas Igalilayan?

⁸Inyo bo ainaki oni aiirar, ŋinituŋanan aŋajepewok nakiwuriere?

⁹Iparatian, ka Imedin, ka Iyelamin, ka luibolete koMesopotamia, ko Yudaya da, ka Kapadokia, koPonto ka Asia,

¹⁰ko Purugia, ka Pampulia, ko Misiri ka atutubeta nuka Libua aapu ka Kurene, ka ice lukepote ko Rome, Iyudayan ka ikebelokinok,

¹¹Ikuretan, ka Iyarabun, kiira kes inerasi aŋajepawok aswamisio nuepolok nuka Edeke.”

¹²Koumokis kere, kobuonokinos, kotemanaros atiar, “Inyo bo apolou kanu?”

¹³Konye kokienatar ice kobalas ebe, “Emeras ajon nuwinyiwiny,”

¹⁴Konye kobwo Petero nepepe ka lutomon ka lodiopet, kikeseu ekeporoto kolimok kes ebe, “Yes ikiliok luko Yudaya, ka yes da kere luiboiete koYerusalem, kojenut akirot na, kopuputu akakiro.

¹⁵Mam ituŋa lu Emerasi, kwape iwomitotor yesi, naarai eraas isawan iuni luka apaaran;

¹⁶ konye erai na naenerit enabi Yoel ebe:

¹⁷‘Ebala Edeke ebe, Ejaun kapaarasia nukawasia, Abukokini awat kere Ekamoyo, Edwarete rwaru ikusidwe lusap ka lupesur, Eanyunete ikusikatumunak aitapoeta, Irujaete ikusimakio airujasia.

¹⁸Eebo apaarasia ŋun abukokini ikabulesin ka akabulesin Ekamoyo, edwarete kesi.

¹⁹Etodikini nukaumokin kokuju toma akuj, Ka aanyuneta kakwap kokwap, Aokot, ka akim, ka euria loka apuru;

²⁰Ituluorio akoloŋ amuton, Elap da araun aokot, Eroko edoluno apaaran naka Ejakait, Nakapolon naejenikina.

²¹ Kosodi kanen, ŋin yeniwonei ekiror loka Ejakait itajario.’

²² “Yes ikiliok luka Isirael, kopuputu akiro nu: Yesu loko Nasaret, ekiliokit lokitodiar Edeke mamakus kanuka aswamisio nukapedor, ka nukaumokin ka aanyuneta da nukiswamai Edeke kotomakeŋ kokidiŋikus, kwape ijeniata yesi ikulepek.

²³ Yesu ŋol, lokijaikinio kanuka ainerun ka aijen naka Edeke ameun apeŋo, ipotu yesi kibubukis, koarata kakanin nuka ituŋa lukaronok.

²⁴ Konye kitajaru ŋes Edeke, kolaca ariebo naka atwanare; naarai mam epedoro aikamunit ŋes.

²⁵ Naarai inerit Daudi kanukeŋ ebe, ‘Abu kaanyununei Ejakait kakonyeneka, Naarai ejaenena akanika nakoteten, Kenyek airiaŋiriaŋa.

²⁶Ŋes iyalamikinor ekatau, elakanari da akaŋajep; Bobo da iboie akakuan kotoma amun.

²⁷ Naarai mam jo inyeini ekatau kokatwak, Karaida aijaikin Lokalaunanikon aibos.

²⁸Kitejenik eoŋ irotin luka aijar; Kilelebikini eoŋ aiyalama kakonyenekon.’

²⁹ “Ikiliok iinacan, apedori atitiŋikin alimokin yes nuka papaawok Daudi ebe abu kotwana konukai, ejai da atesike mamawok kiton lolo.

³⁰ Aso kanu keraar enabi, kojeni ebe iyapoikinit Edeke aiyaposit ebe, kotoma aurike edakakini ediopet oicoloŋoke,

³¹ abu ŋesi kogeik aanyun kinera da nuka ajarun naka Kristo ebe, mam aponi kinyeinai Okatwak, karaida akekuan aibos.

³²Yesu ŋol abu Edeke kitajaru, kirai isio kere ikajenakake.

³³ Aso kedaun aitodokaar kiton akan nakoteten naka Edeke, ka ainakinio kama ejai Papa aisumunet naka Emoyo Lokalaunan, abuku lo loianyunete loipupete da.

³⁴ Naarai mam Daudi abu kodoka toma akuj; konye ebala ŋesi elopet ebe, ‘Abu Ejakait kotema Ekajakait ebe, Kiboikin akanika nakoteten.

³⁵Aitodol naebwaikinia lukasurupokon kere Araut iicoloŋ yenika akejekon.’

³⁶ Aso kojen ekek kere loka Isirael kabeit ebe etarau Edeke ŋes Ejakait ka Kristo da, ŋes Yesu loipotu kibubukis.”

³⁷ Nakiirariata ŋun koditasi ikecetauon, kobalas Petero ka ikiyakia ice ebe, “Kekonakis ai, iinacan?”

³⁸ Kotema Petero atiar, “Kitoronikinos, kibatisaunos, ŋinituŋanan kayesi, kokiror loka Yesu Kristo, kanuka aisionio naka adiakanaretakus; kiinakinio ainakinet naka Emoyo Lokalaunan.

³⁹ Naarai aisumunet erai kanukus ka ikusidwe da, ka ituŋa kere luelwaka, kere luenyarauni Ejakait Edekewok mamakeŋ.”

⁴⁰ Kitejenu kes kakiro ace nuipu ka aicor da ebe, “Kitajarunos katur kana namagul.”

⁴¹ Aponi kibatisai ŋul lukecamunete akekirot, kiyatakinos ituŋa kapaaran kaŋin bala ilukumin iuni.

⁴² Kinyikokinito kaisisianakin naka ikiyakia, ka eidicane, ka aibil emugati, ka ailipasia da.

⁴³Kokurianari ŋinituŋanan; kitwasamai ikiyakia aswam nukaumokin nuipu ka aanyuneta da.

⁴⁴ Kojaas luiyuunito kere nepepe, kimorikikina koboro kere;

⁴⁵Kogwelanasi luebeito ka iborokec ka akoranakin ituŋa kere, kwape kipudar ŋinituŋanan.

⁴⁶ Kinyikokinito ŋinipaaran ketau ediopet kotoma oyekalu, ebilete emugati kore, komorete kalakara ka etau loelai,

⁴⁷ ituritos Edeke kitojokito ituŋa kere. Kiyatanakini Ejakait otiaikec ŋinipaaran lukitajario.