Read Ateso Aswamisio 21 Bible Online

Aswamisio 21 - Ateso bible

Aswamisio 21

¹Kosodi kanen nakidaunia atwarakin, kekwaŋaros kiderit kadoloto Kos, apaaran da naatupakini kadoloto Rodo, kanyout kanen kadolo Patara.

²Kadumutu ataker naekoto aikwaŋar kiton Poenike, kadokasi, kekwaŋaros.

³Nakianyunia Kupuro kipou kenyeisi ŋes kakan nakokediany, kediata kiton Suria, kadokutu koTuro; naarai nen kekotor ataker alemario iboro lueleleba.

⁴ Kiidau amoun ikesisiak, kasalakis nen apaarasia akanykaarei. Kolimokis kesi Paul kanuka Emoyo ebe sirikedoka Yerusalem.

⁵ Kosodi kedaunos apaarasiakosi kanen, kanyoutu kasodokinete; apotu ituŋa kere, nepepe kaŋorokec ka idwekec kinyamakis sio kiton kiŋa naka ere; kakukokinos oitolima kelipa kasodete katwarakinos.

⁶Kadokas isio ataker, koboŋosi do kesi orekec.

⁷Kasodete nakidaunia alositekosi anyoun koTuro, kadoloto Pitolomai; keyogata iinacan kasalata mamakec apaaran adiopet.

⁸ Tupuruc kanyoutu kadoloto Kaisarea; kalomasi togo loka Pilipo ekalimonokinan, lokerai ediopet kokanykaarei, kasalata mamake.

⁹ Kejaas ŋol apesur aoŋon abekon, nukeraas akadwarak.

¹⁰ Nakisalitor nen apaarasia nuipu, kodoku enabi ekekiror Agabo anyoun koYudaya.

¹¹ Nakedolunio mamakosi kolem amuny naka Paul, koen elopet akekeje ka akekanin, kotema atiar, “Ebala Emoyo Lokalaunan kwanata ebe, Kwape kwaŋin eeniata Iyudayan luko Yerusalem elopet amuny na, ijaikinete da akanin nuka Imo.”

¹² Nakiiraria ŋun, isio ka ituŋa luka aibois kaŋin, keŋaiŋaata ŋes sirikedoka Yerusalem.

¹³ Kosodi Koboŋok Paul ebe, “Anyoika iswamaete yesi, aimony ka aibil ekatau? Naarai akapakina mere aenio bon, konye atwanare da kotoma Yerusalem, kanuka ekiror loka Ejakait Yesu.”

¹⁴ Nakegirio akosiiŋaiŋa, kapalutu do kabalas ebe, “Nuekoto Ejakait kiswamai.”

¹⁵Akaulo kapaarasia kaŋun, ketemokisi ikosiboro kadokasi kiton Yerusalem.

¹⁶Kouparos ice kokesisiak luko Kaisarea kasio, koyaŋaasi sio ore loka Menason loko Kupuro, ekesisian lokolo sek, lokipejoi mamakeŋ.

¹⁷Nakidolio Yerusalem kisukunyikis iinacan sio kaiyalama.

¹⁸ Kapaaran naatupakini koloma Paul nepepe kasio mama ka Yakob; kojaas da imakio kere.

¹⁹Akaulo kayogan kes, kitatam kisudunyite akiro kere nukiswamai Edeke kama ka Imo kotoma aijaanakinike.

²⁰ Nakiirariata, kituroto Edeke. Kotemasi ŋes atiar, “Onacekosi, iany kwape imwaatar ilukumin luka Iyudayan luiyuunito, irumit kes kere ekokote kanuka ikisila,

²¹ elimonokinitai kes nukon ebe isisianakini Iyudayan kere luejaas Omo ainyein Musa, ilimonokini kes ebe sirikekepata ikecedwe karaida atupit iponesio.

²²Aso ikwaikinio bo do ai? Abeit epupunete ebe ibu ijo.

²³ Aso kiswama nukilimokini jo, Ejaas sio ikiliok iwoŋon lueenit aiyaposit;

²⁴ koyaŋa ituŋa lu, kitalaun nepepe kakes, kotacak kes tetere ebarenete akwesikec. Kojenut ituŋa kere ebe akiro kwa nukelimonokinitai kanukon mam ebeito, konye jo elopet iricit aitodol ikisila.

²⁵ Konye kanuka Imo luiyuunito, kipou kewadikata ebalua katubito ebe kinaca kesi iboro lueinakinio aputosia araut asuban, ka aokot, ka itiaŋ luemiedio, ka adoteu.”

²⁶ Kosodi Paul ayaŋaar ikiliok ŋul, kitalaun elopet nepepe kakes apaaran naatupakini, koloma oyekalu, aitejenun apak naitodolikinere apaarasia nuka aitesegaario naeinakinere asubanit kanuka ŋolidiopet kakesi.

²⁷Keapuut apaarasia akanykaarei aŋetakin, koanyut lyudayan lukepote koAsia ŋes koyekalu, kisidikoto ekodet kere, kikamutu ŋes,

²⁸ kocelut ebe, “Yes ikiliok luka Isirael, kiŋarakinai sio! Lo ŋes etuŋanan loisisianakini ituŋa kere kaiboisio kere asurokin atekerewok ka ikisila ka aibois na da; ido da ayau ŋesi Iyonanin toma oyekalu, amunaa aibois na nakalaunan.”

²⁹ Naarai keanyunitos Toropimo Epesot nepepe kaŋes kore, koomitos da ebe ayau Paul ŋes toma oyekalu.

³⁰Kosodi kibwaa ere kere, kokerut ituŋa; kikamutu Paul kibwosasi kiŋa keyekalu, atipet kogolokinoi ikekia.

³¹Nakemoototor epone loaret, kodolokis akiro ekapolon loka erioŋet ebe enyalinyalun Yerusalem kere.

³²Atipet kolem iserikalei ka ikapolokitokokec, koker mamakec; kosodete nakeanyuniata ekapolon ka iserikalei kinyeis aibuŋa Paul.

³³ Kosodi koapik ekapolon kikam ŋes, kicorak aenio kirikoi iarei, Kiŋit ebe, “Iŋai bo lo?” ido ebe, “Anyoika eswama?”

³⁴Kocelas ice kokodet ace, ka ice da ace; namam kepedoria ajenun akiro kanuka ecelet, kicorak ayaŋaario ore loka iserikalei.

³⁵Nakedolio adoketa kodakasi ŋes iserikalei kanuka agogoŋ naka ekodet;

³⁶ naarai ketupit ekodet loka ituŋa luipu, ecelasi, kobalas ebe, “Kicutasi ŋes!”

³⁷Konye napedwar kes aitolomar ŋes orekec, kiŋit Paul ekapolon ebe, “Ibus kereka eoŋ alimokin jo akirot?” Kobala ŋesi ebe, “Ijeni tope ijo Ayonanin?

³⁸ Mere kereka ijo Emisiriat je, loitonyounit pac ituŋa ilukumin iwoŋon lukenyaritai Ikaarak, kiŋarenik amodiŋ?”

³⁹ Koboŋok Paul ebe, “Arai eoŋ Eyudayat, loko Taruso kotoma Kilikia, lokore lomere loedit; keŋaiŋait, kisiikinai kener kituŋa kalu.”

⁴⁰Kisiik ŋes, kosodi kobwo Paul kadoketa, kokwet ituŋa; kojau aililiŋ tiiti, kiner kakes kaŋajep nAburaniat, ebe: