Read Ateso Aswamisio 4 Bible Online

Aswamisio 4 - Ateso bible

Aswamisio 4

¹ Napineras kituŋa, koponikis isasedotin ka ekapolokiton loka eyekalu ka Isadukayon,

² ekadakinito noi naarai isisianakinete ituŋa, ka alimono kin ajarun naka lukatwak kotoma Yesu.

³ Kikamut kogolokis aidaris kiton tupuruc: naarai kitiboŋit akwap.

⁴ Konye kiyuunito luipu luapotu kiirasi akirot; etiai da loka ikiliok kodol kwaka ilukumin ikany.

⁵Kosodi kanen tupuruc, kotukonokinos ikayaitokokec ka imakio ka ikewadikak Yerusalem;

⁶ka Anas losasedoti lopeti, ka Kaiapa, ka Yokana, ka Alegesanda da, ka ŋul lukeraas luka ekek loka losasedoti lopeti.

⁷ Kedautu aisibwo kes kokidiŋ, kiŋita ebe, “Kanuka apedor anyoin, ka okiror enyoin, iswamaata yesi nu?”

⁸ Kosodi Petero, kilelebun Emoyo Lokalaunan, kotema kes atiar, “Yes ikayaitok luka ituŋa, ka imakio,

⁹arai kiiŋisi lolo akiro nukajokak nueswamakinio loŋwalas, epone lokitanaleunere,

¹⁰ kojenutu yesi kere, ka ituŋa kere luka Isirael ebe, Kokiror loka Yesu Kristo loko Nasaret, lokibubukinete yesi, lokitajaruni Edeke kokatwak, kanuka ŋol ebwoi etuŋanan lo kakonyenekus eŋalei,

¹¹ ŋol ŋes amoru nakinerete yesi ikadukok, naebwaikin araut amoru nati naka agor.

¹² Kwabo emamei aitajar kotoma ece kere: naarai emamei ecekiror kokwap kakuj loeinakinitai ituŋa, loibusakinitor oni aitajario.”

¹³Kosodi keanyutu atitiŋ naka Petero ka Yokana, komisiikis da ebe eraas ituŋa lumam isisianakinitai, luemamei aijen, koumokis; kojenut da ebe kejaas kaYesu.

¹⁴ Nakeanyuniata da lokitaŋaleunio ebwoi nepepe kakes, komamuut nueboŋokinete,

¹⁵Konye kicorakis kes alomar kaurianet, kineranakinos ebe,

¹⁶ “Kikonakini ai ituŋa lu? Naarai idelelei kotuŋa kere luiboiete koYerusalem ebe eswamai aanyunet naejenio kamakec; kwabo mam kipedori aiŋer.

¹⁷ Konye kinye akirot na aiyatakin aisiarakin otuŋa, ketukuriana kes, sirikinerata bobo kediotunanan kere kokiror kaŋol.”

¹⁸Konyaraut kes, kicorakis kinyeis einer cut karaida aisisianakin kokiror loka Yesu.

¹⁹ Konye koboŋokis Petero ka Yokana kotemasi kes atiar, “Arai edolit kakonyen nuka Edeke aiirar yes aitelekarit Edeke, kotuboto yesi:

²⁰naarai mam kipedori ainyein einer akiro nukianyunit ka nukiirarit da.”

²¹Nakedauniata aitukurian bobo, koosikis, mam apedorete aitican kes kanuka ituŋa; naarai kitopolooritos ituŋa kere Edeke kanuka ŋun nukiswamao.

²²Naarai keraas ikar luka etuŋanan lokiswamakinio naanyunet ŋin naka aitaŋaleun luedeparito akaisaoŋon.

²³Nakeosikinere koloto neejaas ikecetuŋa, kitatamikis kes akiro kere nukelimokinete isasedotin lupeti ka imakio.

²⁴ Nakiirariata, kikeut ikeceporotoi nepepe mama ejai Edeke, kotemasi atiar, “Wu Ejakait, lokisubi akuj, ka akwap, ka aŋolol, ka kere da luejaas tomakec:

²⁵ ibu kiner kotoma Emoyo Lokalaunan kaituk naka papaakosi Daudi ekonitelepat ebe, ‘Kanukinyo enyunyuratatar lukacekwapin, Ka ituŋa da itetemonoroto aamameak?

²⁶Etemonokinos ikabakan luka akwapin, Etukonokinos ikayaitok nepepe, Asurokin Ejakait, ka Lokinyonyoikitonoke akinyet.’

²⁷ Naarai abeit etukonokinos Kerode ka Pontio Pilato, nepepe ka Imo ka ituŋa luka Isirael ore lo asurokin ekonitelepat lokalaunan Yesu, loinyonyoikinit akinyet,

²⁸ tetere iswamaete kere nuelosikinit akonikan, ka nuinerunit ŋol ajaun.

²⁹ Kwana da, wu Ejakait, kosesen aitukurianakec: koinak ikonibulesin einer akirot katitiŋ kere,

³⁰nairioria akonikan aitaŋaleun; kiswamai da aanyuneta ka nukaumokin kanuka ekiror loka ekonitelepat lokalaunan Yesu.”

³¹ Nakedauniata ailip, kitamaranai aibois kama ketukonokina; kilelebunos kere Emoyo Lokalaunan, kinerata akirot naka Edeke katitiŋ.

³² Kejaas ekodet kere loka luiyuunito ketau ediopet ka aijar adiopet: kwabo emamei idiopet yenikebala ebe ibore kere yenejaatar erai yenike; dimarai emorikikinito iboro kere.

³³ Kitejenut ikiyakia ajarun naka Ejakait Yesu kapedor naepol, kojai asianut naepol mamakec kere.

³⁴ Amamei yenilwaritoi kotomakec, naarai ituŋa kere lukejaas amanat arai itogoi, apotu kogwelanasi, koyaata etiai loka iboro lukegwelunete

³⁵kibwaikis akejen nuka ikiyakia: kokorakinai ŋinituŋanan kwape kipudar.

³⁶ Yosep da, lokenyaraete ikiyakia Baranaba, (apolouke Okoku loka aitalakaar) Elebit, lokeurikinio Kupuro,

³⁷kejai ŋes amana kogwela, koyau apesan kibwaik akejen nuka ikiyakia.