Read Ateso Aswamisio 7 Bible Online

Aswamisio 7 - Ateso bible

Aswamisio 7

¹Kotema losasedoti lopeti atiar, “Ikote kereka akiro ŋun nen?”

² Kosodi Sitepan ebe, “Iinacan ka lukapapa da, kiirarai. Abu Edeke loka aibuses kotakanik papaawok Aburaam, nakejaar Mesopotamia, eroko iboikino Karan,

³ kotema ŋes atiar, ‘Konyou kotoma akwapukon, ka ajenakon, kolot akwap naketodikini.’

⁴ Kosodi konyou kakwap naka Ikaludean, kiboikin Karan. Ketwana papake kitonyou Edeke ŋes kanen kiton akwap na naiboito yesi kwana;

⁵ kwabo mam keinakinit adioirumet, karaida nekicakakina akeju, konye kisumun ainakin ŋes airum, ka aurike naetupanakini, nakerokor ŋes ikoku emamei.

⁶ Kinera Edeke nuikote nen ebe eraun akeur apejonon kotoma akwap naka ituŋa ice, luitubulesenete kes, ikonakinete kes erono apak naka ikar akwat aoŋon.

⁷ Kobala Edeke ebe, ‘Atubokini eoŋ ateker ŋin naitubulesene kes; akaulo kaŋun elomunete, kamaete eoŋ kaibois kana.’

⁸ Koinak ŋes aitutuket naka aikep. Kouri do Aburaam Isaak, kokep kapaaran nakikanyetekauni; Isaak kouri Yakob, Yakob da kouri lukapapaawok lutomon ka luarei.

⁹ “Koreata lukapapaawok Yosep, kogwelasi Misiri. Kojai Edeke nenipe kaŋes.

¹⁰ Kolem ŋes kotoma aiticanioke kere, koinak aminunio ka acoa kakonyen nuka Parao, ekabaka loko Misiri, kitarau ŋes ekayaiton loko Misiri kere, ka eketogo da kere.

¹¹ Kosodi kojau ebeli akwap kere nako Misiri ka Kanaan da, ka aiticanio naepol, lukapapaawok da mam edumuna inyamat lukedaunito.

¹² Konye nakiiraria Yakob ebe ejaas akima Misiri, kijuka lukapapaawok irwan nasodit.

¹³ Kiton alosit nakiareit kitejenikin Yosep ikeinacan, kojenun do ateker naka Yosep kama ka Parao.

¹⁴ Kijuka Yosep, konyarau Yakob papake, ka akejena kere, ituŋa akaisakanykaarei ka lukany.

¹⁵ Kijesar Yakob Misiri, Kotwana, ŋes ka lukapapaawok;

¹⁶ koyaŋaarai kiton Sekem, kidaikinai toma ates ya nakegwelit Aburaam kotiai loka epuesa kama ejaas odwe luka Kamor koSekem.

¹⁷ “Konye nakeapuunia apak naka aisumunet naabu Edeke koinak Aburaam, kipuaros ituŋa, kiyatakinos noi koMisiri,

¹⁸aitodol naanyounio ekabaka ece koMisiri, lomam ajeni Yosep.

¹⁹ Koŋopik ŋol atekerewok, kikonak lukapapaawok erono, kicorak acakanar ikecemukerun tetere mam ejarete.

²⁰ Kouriai Musa kapak kaŋin, kerai ŋesi yenikejok noi kama ejai Edeke. Kosaai ilapio iuni kotogo loka papake;

²¹ kiton neacakarere, kiraru akoku naka Parao, kitan ŋes kwape ikekoku.

²²Kituutooroi Musa kacoa kere nako Misiri, kogogoŋor kotoma akiro ka aswamisio da.

²³ “Kedolo ikekaru bala akaisaoŋon, kineru kotauke alosit aanyun ikeinacan idwe luka Isirael.

²⁴ Koany ediopet ikonakinio erono, koyu ŋol lokereitai kinyaŋak kinom Emisiriat:

²⁵koomit ebe ejenunete iinacanake ebe ainak Edeke aitajario kakanike; konye mam apotu kojenut.

²⁶ Kapaaran naatupakini kitakanikin kes nakecelatar, kokoto aidiek kes, kobala ebe, ‘Ikatuŋa, iraas yesi iinacan, kanukinyo ikonanakinotor erono?’

²⁷ Konye lokikonakini onaceke erono koremo ŋes, kobala ebe, ‘Iŋai bo kiidakakini jo araut ekayaiton ka ekatubon kamakosi?

²⁸Ikoto kereka aiar eoŋ da, kwape bian iaria Emisiriat?’

²⁹ Koker Musa kakirot kaŋin, korau epejonon kakwap nako Midian, kouru kaŋina idwe iarei.

³⁰ “Kosodi ketuboros ikar akaisaoŋon, kitakanikin emalaika loka Ejakait kotoma amodiŋ naka Emoru Sinai, kaipelonoreta nuka akim kotoma okiot.

³¹Nakeanyunia Musa, koumok nuaanyu; nakikunyakinia aanyun, kobu eporoto loka Ejakait ebe,

³² ‘Arai eoŋ Edeke loka lukapapaakon, Edeke loka Aburaam, ka loka Isaak, ka loka Yakob da.’ Komaran Musa, komam etitiŋikini asesen.

³³ Kotema Ejakait ŋes atiar, ‘Kolaca amuk kakejenekon, naarai aibois naibwoia erai akwap nakalaunan.

³⁴ Abeit aany aiticanio naka ikatuŋa luejaas Misiri, eira da eidinyikec, ejesun eoŋ ayuun kes. Aso kwana, kejukari jo Misiri.’

³⁵ “Musa ŋol lokegirete kobalas ebe, ‘Iŋai bo kiidakakini jo araut ekayaiton ka ekatubon da?’ ŋes kijukari Edeke araut ekayaiton ka ekayuunan kakan naka emalaika lokitakanikin kotoma okiot.

³⁶ Ŋol ŋes kitolomuni kes, kedau aswam nukaumokin ka aanyuneta koMisiri ka Aŋolol Nakareŋan, kamodiŋ da apak naka ikar akaisaoŋon.

³⁷ Ŋes Musa ŋol lokelimokini Isiraelin ebe, ‘Kitonyoikini Edeke yes enabi kotoma oinacanakus kwape kaeoŋ.’

³⁸ Ŋol ŋol loajai okanisa toma amodiŋ nepepe ka emalaika Iokineras kaŋes kotoma Moru Sinai, ido kalukapapaawok; ŋes lokedumuni akiro nuka aijar ainakin oni.

³⁹ Kogiroto lukapapaawok arimar ŋes, konye koremosi, kinyakasi ikecetauon Misiri,

⁴⁰ kolimokis Aaron ebe, ‘Kosubakinai sio idekesio lukiŋarenikinete; naarai mam kijeni nuadoikis Musa ŋol, lokiitolomuni kotoma akwap nako Misiri.’

⁴¹ Kapaarasia kaŋun kosubut itaok, koinakis asuban mama ejai aput ŋin, kolelakis aswam naka akaninikec.

⁴² Konye kibelokin Edeke, kojalak tetere emaete ajore naka akuj; kwape kiwadikatere oitabo loka inabin ebe, ‘Ipotu kereka koinakis eoŋ itiaŋ luearitai ka asuban, Ŋo ekek loka Isirael, ikar akaisaoŋon kamodiŋ?

⁴³Ipotu kodakasi ewema loka Molok, Ka aacerit naka edeke Repan, Aputosia nuiswamata tetere imaete: Ketwobosi yes koloto neelwana adepar Babulon.’

⁴⁴ “Kejaas lukapapaawok ewema loka aitejenunet kamodiŋ, kwape kicorakinia lokineras ka Musa, aswam koriakas kaput nakeanyuni.

⁴⁵ Apotu lukapapaawok, kabeikinikec kitolomut ŋes nepepe ka Yosua, nakebeata airumet naka atekerin, nuereŋear Edeke kakonyen nuka lukapapaawok, kiton apaarasia nuka Daudi;

⁴⁶ lokedumun asianut kakonyen nuka Edeke, kilip adumakin Edeke loka Yakob eyekalu.

⁴⁷ Konye abu Solomon kodukok ŋes etogo.

⁴⁸ Kwabo Loejai kuju kakuj mam iboie kotogoi luiswamao kakanin; kwape inerar enabi ebe,

⁴⁹ ‘Akuj ŋes ekaicoloŋ, Ka akwapin da iicoloŋ yenika akakeje, Ebala Ejakait ebe, Etogo enyoin kidukokinete eoŋ? Arai aibois anyoin naebworaria?

⁵⁰Mere kereka akakan iswamat ŋun kere?’

⁵¹ “Yes lueninik imurisiŋa, lumam ekepitai itauon ka aki, irebirebete tiritir Emoyo Lokalaunan. Kwape eswamaata lukapapaakus, yes da iswamaete kwape kwaŋin.

⁵² Enabi ali lomam lukapapaakus areito? Apotu koarata lukedwarete akiro nuka abunore naka Ekadoliton; lokwana ibilakis yesi ebotet, koarata da,

⁵³ yes luipotu kodumut ikisila kwape icorakinitotor imalaikan, komam iricito.”

⁵⁴ Kosodi nakiirariata akiro ŋun, konomos noi itauonokec, kiriamanakis ikel asurokinia ŋes.

⁵⁵ Konye Sitepan kileleba Emoyo Lokalaunan, kosesen toma akuj, koany aibuses naka Edeke, ka Yesu da ebwoi kakan nakoteten naka Edeke;

⁵⁶kotema atiar, “Koany, aanyuni akuj eŋaara, ka Okoku loka etuŋanan ebwoi kakan nakoteten naka Edeke.”

⁵⁷Konye koresiaros keporoto loepol, kisikakis akeceki, kosomakinos ketau ediopet.

⁵⁸ Kireŋeasi kore, kibiribiroto kamor; kibwaikis ikajenak ikecenapen akeje nuka ekatumunan loanyaritai Saul.

⁵⁹ Kibiribiroto Sitepan kamor, kilip ŋesi ebe, “Ejakait Yesu, kiira ekamoyo.”

⁶⁰ Kokukokin kiworo keporoto loepol ebe, “Ejakait, sirikimarak kes aronis na.” Kedau einer ŋun, kojotoor.