Read Ateso Aswamisio 8 Bible Online

Aswamisio 8 - Ateso bible

Aswamisio 8

¹ Kitojokit Saul da akeario. Kapaaran kaŋin kodakun aimanit naepol aluikin ekanisa lokejai Yerusalem; kisiarakinos kere akwap nako Yudaya ka Samaria, dimarai ikiyakia.

² Apotu ituŋa lueyoŋito Edeke kidaata Sitepan, kokuudianata da ŋes noi.

³ Konye komuna Saul ekanisa, kolomanari ŋolitogo, kidilidiliununei ikiliok ka aŋor da, kibwaik aidaris.

⁴Kosodete ŋul lukisiarakinio koloto elimonokinete akirot.

⁵ Kijesar Pilip ore loko Samaria, kolimonok Kristo.

⁶Kopupokis ikodeta kacoit ketau ediopet nukinera Pilip, naiirariata ka aanyun da aanyuneta nukiswamai.

⁷ Naarai apotu ajokin nuipu nueroko kolomut kama kaŋul lukikamunito, kiworoto keporoto loepol: luipu da lukasenyak ka iŋwalasik kitaŋaleunoi.

⁸ Kojau aiyalama naepol ore ŋol.

⁹Konye kojai etuŋanan ekekiror Simon, lolem eswamaenenei nukecudet kore kaŋol, kisiwumok ituŋa luko Samaria, kobala ebe ŋes lokapolon.

¹⁰Kopupokito kesi kere kacoit, ameun ka yenididi kiton yenikapolon kobalas ebe, “Etuŋanan lo erai apedor naka Edeke naenyaritai Nakapolon.”

¹¹Kopupokito kacoit, naarai abu kisiwumok kes apak naepol kanuka ecudeteke.

¹² Konye nakiyuuniata Pilip elimonokin akiro nukajokak nuka ajakanut naka Edeke, ka ekiror da loka Yesu Kristo, kibatisai, ikiliok ka aŋor da.

¹³Simon da elopet abu kiyu; kedau aibatisao koupakinos ka Pilip. Koumok nakeanyunia aanyuneta ka nukapedor nukapolok nukiswamai Pilip.

¹⁴ Kosodete nakiirariata ikiyakia lukejaas Yerusalem ebe eyuu Samaria akirot naka Edeke, kiyakiasi Petero ka Yokana mama ejaas,

¹⁵lukijesaros kilipakis kes, tetere edumunete Emoyo Lokalaunan:

¹⁶naarai mam ber kedoikinit idio kakesi, konye ebatisatai ber kokiror loka Ejakait Yesu.

¹⁷ Kosodete kidokokis kes akecekanin, kodumut do Emoyo Lokalaunan,

¹⁸Konye nakeanyunia Simon ebe einakinio Emoyo Lokalaunan kanuka aidokokin akanin nuka ikiyakia, kokoto ainakin kes arupian,

¹⁹kobala ebe, “Koinakinai eoŋ da apedor na, tetere ŋinituŋanan yenedokokini akakanin kodumun Emoyo Lokalaunan.”

²⁰Konye kotema Petero atiar, “Koolio epuesakon nepepe kajo; naarai iwomit ebe idumuni ainakinet naka Edeke kanuka arupian.

²¹ Emamei jo akorakinet karaida ewai kotoma akirot kana; naarai mam itenara ekonitau kakonyen nuka Edeke.

²²Aso kitoronikin aronisikon na, kilip Ejakait, elemuni kisionii aomisioit na naketaukon.

²³ Naarai kaanyu jo ileleba adwaris kwape kepiu, ido da kienit elomorut loka amamus adolit.”

²⁴Koboŋok Simon ebe, “Kilipakinai yesi eoŋ kama ejai Ejakait, kenyeis akiro ŋun nuinerata adolokin eoŋ.”

²⁵Kosodi nakedauniata aitejenun ka alimonokin akirot naka Ejakait, koboŋos! Yerusalem, elimonokinete Akiro Nukajokak oreria luipu luka Isamarian.

²⁶Konye kinerata emalaika loka Ejakait ka Pilip, kotema atiar, “Konyou kobe ari naka eŋalakimak kiton orot loijesar anyoun ko Yerusalem alosit Gasa.” Ŋes amodiŋ.

²⁷ Konyou kolot. Ido koany, etuŋanan loko Etiopia, ebwacit, ejakait loka Kadake akabaka naka Etiopia, loapolokinit abarake kere, kelosit ŋesi Yerusalem aima;

²⁸eboŋuni ŋesi iboie kagalike, esiomi eitabo loka enabi Isaia.

²⁹Kotema Emoyo Pilip atiar, “Kikunyak agali ŋin, koupakinos kaŋes.”

³⁰Aso koker Pilip mama ejai, kiira ŋes esiomi eitabo loka enabi Isaia, kiŋit ebe, “Ijeni kereka ijo ŋun nuisiomi?”

³¹ Kobala ebe, “Ekonakini ai ajenuni, arai mam keŋarenikinit ituŋanan?” Kiŋaiŋa ŋesi Pilip adokar aiboikin kaŋes.

³² Ewai loka nukiwadikatai lokisiomi ŋesi ŋes lota ebe: “Koyaŋaarai aario kwape kamerekek; Ido kwape ililiŋia ikoku yenika amerekek kama kekatubon ajul, Kwape kwaŋin mam ŋes eoŋari akeituk;

³³Kaitisilioke aponi kolemarai aketubokinio; Iŋai bo epedori aitejenikin aketur? Naarai alemar akeijar kakwap.”

³⁴Kotema ebwacit Pilip atiar, “Keŋaiŋait, kinera enabi akiro ŋun kanuka ŋai? Eraas kereka akekiro, arai bo nuka ece?”

³⁵Kooŋ Pilip akeituk, kogeu kanakiwadikatai kaŋin kolimok ŋes akiro nukajokak nuka Yesu.

³⁶ Napelosete korot, kodoloto neajaas akip; kotema ebwacit atiar, “Koany, akipi nu; inyo ca kesimikit eoŋ aibatisao?” [

³⁷Kotema Pilip atiar, “Arai iyuunit kekonitau kere, epedoros.” Koboŋok ebe, “Eyuunit ebe Erai Yesu Kristo Okoku loka Edeke.”]

³⁸Kicorak agali aibwo; kijesaros kesi iarei akipi, Pilip ka ebwacit, kibatisa ŋes.

³⁹ Kedaut adokun kakipi abu Emoyo loka Ejakait kourupo Pilip; mam bobo ebwacit eanyuna, konye kiyatak akelosit iyalama.

⁴⁰ Konye kotakanu Pilip kotoma Asoto, nakitoritor kolimonok akiro nukajokak koreria kere, kiton adolore Kaisarea.