Read Ateso Iromayon 1 Bible Online

Iromayon 1 - Ateso bible

Iromayon 1

¹ Paul ebulesit loka Kristo Yesu, Iokenyaraunio araun: ekiyakia, Iokegitakinio alimonokin Akiro Nukajokak nuka Edeke,

² nuesumunit Edeke kolo kama ka inabinoke kotoma nukiwadikatai nukalaunak,

³ kes akiro nuka okokuke Yesu Kristo Ejakaitiwok, lokeurio kaur naka Daudi kwape ejaar akuan,

⁴ loedakakinitai araut Okoku loka Edeke kapedor kwape ejaar Emoyo loka Alaunit, kanuka ajarun kokatwak,

⁵ kotomakeŋ ŋes kipou kadumuniata asianut ka eiyakiane tetere erimarete lukatekerin kere aiyuun kanuka ekekiror,

⁶kotomakec yes da kinyaritai araut luka Yesu Kristo.

⁷ Mama ejaas ŋul kere luejaas Rome luminan luka Edeke luenyaritai araut ikalaunak: Asianut kojai mamakus ka ainapakin nuepote kama ejai Edeke Papawok ka Ejakait Yesu Kristo.

⁸ Esiauni aimal Ekadeke kotoma Yesu Kristo kanukus kere, naarai elimonokinio akusiiyuun anatar akwapin kere.

⁹ Naarai Edeke, loamai komoyoka kotoma Akiro Nukajokak nuka Okokuke, ŋes ekajenanika ebe alimununei yes kailipika komam apalari.

¹⁰ Ecebokinit ailip arai motoko kanuka akoteke kesipedori Edeke arurukun mama ijaas.

¹¹ Naarai kemuit aanyun yes tetere kekopakin yes adioinakinet naka emoyo nakiticasi yes,

¹² ŋes atemar ebe aitalakanario bonik ka bonik kanuka aiyuunikus, ka nakaŋ da.

¹³ Konye iinacan, akoto yes ajenun ebe irwan ipu alosikinit abunore mamakus, tetere adumuni adioraito kamakus kwape kama kImo ice, konye ketikokinitai kiton kwana.

¹⁴Keburaete Iyonanin ka lukacekwapin da, keburaete lukacoa ka lueolito da:

¹⁵kanuka ŋun akapakina eoŋ kowaika alimonokin Akiro Nukajokak kiton mamakus da luijaas Rome.

¹⁶ Naarai mam Akiro Nukajokak kesurumito ileic: naarai erai apedor naka Edeke ainun aitajario mama ejai ŋinituŋanan yeniyuuni, mama ejai Eyudayat ber, ka Eyonanit da.

¹⁷ Naarai tomakec epukoritai adolit naka Edeke, anyoun kaiyuun kiton aiyuun; kwape iwadikatere ebe, “Ebusi ikadoliton kanuka aiyuun.”

¹⁸ Naarai epukoritai anyunyura naka Edeke abunore kokuju mama ejai epali kere ka amamus adolit naka ituŋa luitikokinete abeit kanuka amamus adolitekec.

¹⁹ Naarai ejenas akiro nuka Edeke ideleleete kotomakec, naarai abu Edeke kisideleleu mamakec.

²⁰ Naarai ameun kaisub akwap, atakanut iboroke lumam etakanete, ŋes atemar akepedor namam enaŋi, ka Eidekeoneke, kotoma oboro lukesubi. Aso emamei kes aiyar:

²¹ naarai apotu kojenut Edeke, mam kes itubusikinito ŋes kwape Edeke, karaida aima ŋes, dimarai kooliosi kotoma aomisiokec, kitumutoroi ikecetauon luemamei ajenun.

²² Kineras ebe eraas lukacoa, kobaŋaakaros,

²³ kisiecata aibuses naka Edeke lomam etwani aituputoor aputosia nuka ituŋa kaluetwakete, arai nuka akweny, arai nuka itiaŋ, arai nuka lueliatos.

²⁴ Kanuka ŋun abu Edeke kojalak kes toma oraŋasia luka itauonokec mama ejai amamus aila, ka aitisilio da naka awatekec bonik ka bonik,

²⁵ naarai apotu kisiecata abeit naka Edeke araun aiŋal, koyoŋito komaata da isubat itia Ekasuban loituritoi ikar kere! Amen.

²⁶Kanuka ŋun abu Edeke kojalak kes ainekit naka ileic, naarai apotu aŋorokec da kilocokis einono lokaurunet aituluor lomere lokaurunet,

²⁷ ikiliok da kwape kwaŋin kinyeis einono lokaurunet loka aberu kibworo kotoma oraŋakec ŋolituŋanan mama ejai locekeŋ, ikiliok kiswamanakis ikiliok nukileic, ido koinanakinos eropit loebusakinit apaarikec.

²⁸Ido kwape mam apotu kocamuniata ajenun Edeke, abu Edeke kojalak kes aomisio numam ajokis, kiswamata numam ibusakinito.

²⁹Ileleba amamus adolit kere, nukaronok, airaŋaanut, ameŋeranut; ileleba ekokote, earit, aŋolopa, aiŋal, aomisio nueroko, ikedeideok,

³⁰ikasiomak, luelaito Edeke, lukepali, luepogaka, luituros, ikapwakak nueroko, luiulakinito ikauriakakec,

³¹luemamei acoa, luejalete aitutuket, lumam eminanara, luemamei aitim,

³²luejenete aitepesenit naka Edeke, ebe luiswamaete nuikote nen ibusakinit atwanare, mam bon iswamaete ŋun, konye itojokito da ŋul lukiswamaete ŋun.