Read Ateso Iromayon 11 Bible Online

Iromayon 11 - Ateso bible

Iromayon 11

¹ Aso abala ebe, Aŋer kereka Edeke iketuŋa? Madi akuj! Naarai arai eoŋ da loka Isirael, loka aur naka Aburaam, loka ateker naka Benyamin.

² Mam Edeke enerit iketuŋa luabu kogeu ajenun, Mam kereka ijenete nuineras nuiwadikatai kanuka Eliya, kwape iwosaa luka Isirael kakonyen nuka Edeke?

³ Ebe, “Ejakait, aarata inabinokon, atiyanakis da itemwanakon, eoŋ bon asal, ido emoete akaijar.”

⁴ Konye aboŋokinet naka Edeke ebala biai? Ebe, “Etasalit kanukaŋ ikiliok ilukumin ikanykaarei, lumam ekukokinos Baal.”

⁵ Aso kwape kwaŋin apak na, naka kwana, ejai aatoŋot naeseunitai kanuka asianut.

⁶ Konye arai erai kanuka asianut, mam bobo elomuni kanuka aswamisio; arai timam asianut eroko erai asianut.

⁷ Biai bo do? Ibore ŋin yenikemoot Isirael, mam edumuna. Luseuna apotu kodumut, konye ice kere aponi kitininikai,

⁸ kwape iwadikatere ebe, “Abu Edeke koinak kes emoyo loka ajo, Akonye numam eanyunete, Aki da numam iirarete, Kiton apaaran naka lolo.”

⁹ Ebala Daudi da ebe, “Korau emesakec eic ka akuluma, Ka ibore yenikitiguikinet, ka yenikitegelet kes.

¹⁰Kitumudakai akonyekec, tetere mam esesenete, Kitukukum ipuranakec apaarasia kere.”

¹¹ Aso abala ebe, eguikis kereka kiton aibiror cut? Madi akuj! Konye kanuka aibucarikec adolok aitajario Imo, tetere isurumio luka Isirael ekokote.

¹²Aso arai eraun aibucarikec abar naka akwapin, atwaniarikec da araun abar naka Imo, itelekarit cama aitodolikiniokec!

¹³Konye enera kayes Imo. Aso naarai arai eoŋ ekiyakia loka imo, etopoloori aijaanakinika,

¹⁴ tetere esurumi lukatekerika ekokote, ka aitajar da ice kakesi.

¹⁵Naarai arai acakariokec ayau aipuc naka akwapin, anyoin aisukunyuniokec dimarai aijar anyoun kokatwak?

¹⁶ Arai araito nageet erai nakalaunan, kwape kwaŋin aluŋuret da; arai da aliasit erai nakalaunan, kwape kwaŋin atenieik da.

¹⁷ Konye arai epakanaritai ace katenieik, ijo da, eseitun loka ais kiraikinitai kidiŋikec, korau ikamoran yenika ajokis naka aliasit,

¹⁸ sirikiwolobob katenieik kaŋun. Arai kiwolobob, mere jo idakit aliasit dimarai aliasit kidakit jo:

¹⁹Aso itemari atiar, “Kepakario atenieik ŋun tetere keraikinio eoŋ.”

²⁰ Abeit ŋun. Epakanaritai kes kanuka amamus aiyuunikec, ido da icasi kanuka aiyuunikon. Sirikiturokin, konye koyoŋ.

²¹Naarai arai mam Edeke itimit atenieik akulepek, mam kitimi jo da.

²² Aso koany ajokis ka adedeŋ naka Edeke; adedeŋ mama ejaas luibiroros, konye ajokis naka Edeke mamakon, arai kisalak ajokis ŋin; arai mere kwaŋin jo da kijepario.

²³ Ka ŋul da, arai mam esalito toma amamus aiyuun, iraikinio, naarai epedori Edeke airaikin kes bobo.

²⁴Naarai arai kijepunitai jo katorom naka eseitun loka ais, kiraikinitai oseitun lokoriot lomam erai einono, itelekarito cama atenieik akulepek airaikinio ainyakakin oseitunikec.

²⁵ Naarai iinacan, akoto yes ajenun aiyeiyea na kinyeis aomit bonik araut lukacoa; ebe, aninikiar atutubet naka Isirael aitodol naelomunia etiai kere loka Imo,

²⁶ kwaŋin itajario luka Isirael kere; kwape iwadikatere ebe, “Ebuni Ekalakunan koSion, Isiyekari amamus ayoŋit Edeke kotoma Yakob”;

²⁷ “Na da ŋes akaitutuket kakes, Naalemaria adiakanaretakec.”

²⁸Aso kotoma Akiro Nukajokak araut lukasurup luka Edeke kanukus; konye kotoma aseunio araut lueminai kanuka lukapapaakec.

²⁹Naarai mam Edeke iitokini ainakinetake ka anyariteke da.

³⁰Naarai kwape kolo kipaliikinioto yesi Edeke, konye kwana idumut aitimio kanuka aipaliikinikec,

³¹kwape kwaŋin epaliikinioto kesi kwape kwana tetere edumunete aitimio kanuka aitim naipotu yesi kodumut.

³² Naarai agoloki Edeke kere nepepe toma aipaliikin, tetere itimi kere.

³³ Eiliili cama abar ka acoa ka aijen naka Edeke Mam ireikinos itubesiake, irotinike da mam ibwapunos!

³⁴ “Naarai iŋai tope ejeni aomisio nuka Ejakait, Arai iŋai bo kerai ekapetan akiroke?”

³⁵ “Arai iŋai bo keinakinit ber ŋes ainakinet, Etacakinio ŋes bobo?”

³⁶ Naarai epote iboro kere kamakeŋ, ejaas da kanukeŋ, ido eboŋorete mamakeŋ. Kojai aibuses mamakeŋ ikar kere. Amen.