Read Ateso Iromayon 12 Bible Online

Iromayon 12 - Ateso bible

Iromayon 12

¹ Kanuka ŋun, iinacan, keŋaiŋait yes, kanuka aitimeta nuka Edeke, kijaikis akusiwat koraut asubanit naejari, nakalaunan, naisiyalamikinit Edeke, ŋes erai aimakus naibus.

² Kwabo sirikiputo nuka ikar kalu, konye kanuka aisiteteunio naka aomisiokus kijulakinos, tetere igimorete nuekoto Edeke, nuejok, ka nuisiyalamikinito, ka nuedolito da.

³ Naarai kanuka asianut nakainakinitai alimokini ŋinituŋanan kayesi ebe siriwomiara adepar naibusakinit aomit, konye koomito kacoit, kwape ekorakinitor Edeke aitemis naka aiyuun.

⁴ Naarai kwape kijaar katutubeta nuipu toma akuan adiopet, kwabo mam atutubeta kere iswamaete aswam adiopet,

⁵ kwape kwaŋin oni da lukipu, kirai akuan adiopet kotoma Kristo, ka atutubeta da nuka lucewok bonik ka bonik.

⁶ Aso naarai kija kainakineta nuegelegela kwape ejaar asianut nakiinakinitai, ketwasamata kes; arai adwaranut, kwape ejaar aiyuuniwok;

⁷ arai aijaanakin, kotoma aijaanakiniwok; yenisisianakini, kotoma aisisianakinike;

⁸ yenicori, kotoma aicoroke; yenekori, kotau loliogot; yeniŋarakini, kadunyanut; yenitimi da, kaiyalama.

⁹ Korau amina naemamei aisoswanut. Kolaata aronis, kiketakinos kotoma kanuejok.

¹⁰ Kotoma amin naka einacane, kominanaros bonik ka bonik; kotoma aibuses kitopoloorite ŋinituŋanan aupake.

¹¹ Kotoma adunyanut sirikalanyaka, kokokito komoyo, kijaanakis Ejakait.

¹² Kolelakinito amun kotitiŋioto kocan, kicebokinito ailip.

¹³ Kokoranakisi lukalaunak nuipudasi, kisukunyanakisi ipejok.

¹⁴ Kilipanakisi arereŋ lukimanito yes; kilipanakisi arereŋ kwabo sirikilamata.

¹⁵ Kolelata kaluelelete, komonyata kaluemonyete.

¹⁶ Koomito adiopekirot bonik ka bonik. Siridakara, konye koupanaros kaluitasonos. Siriraas lukacoa kakonyenekus ikulepek.

¹⁷ Siritacakis aronis kanuka aronis, kocoito nuejok kakonyen nuka ituŋa kere.

¹⁸ Arai epedoros kowaikus, kinapakina kituŋa kere.

¹⁹ Luminan, sirinyaŋanakinos, konye kinac anyunyura; naarai iwadikatai ebe, “Ebala Ejakait ebe, Enyaŋit ekaŋ, eoŋ atacakini.”

²⁰ Konye “arai eriebi lokasurupikon eteŋei, kitanyam, arai ejakit akur, kitamat ŋes; naarai naiswamaa kwaŋin inokokini atotole akouke.”

²¹Sirikiipiko aronis, konye kipiko aronis kanuka ajokis.