Read Ateso Iromayon 15 Bible Online

Iromayon 15 - Ateso bible

Iromayon 15

¹Kibusakinit oni lukagogoŋok aibwok akalanyanut naka luemamei agogoŋ, kwabo mere aisiyalamikina bonik.

² Kesiyalamikisi oni ŋinituŋanan ikeidunyet kodum ajokis kodukoi da.

³ Naarai Kristo da mam esiyalamikina elopet bon; dimarai kwape iwadikatere ebe, “Amorosito nuka lukimoromoroete jo, apotu kadoikis eoŋ.”

⁴ Naarai nuewadikatai sek, ewadikatai kanuka aisisianakinia oni, tetere kanuka atitiŋikin ka aitalakara naka nukiwadikatai kidumuni amun.

⁵ Edeke da loka atitiŋikin ka aitalakara koinak yes aomit adiopet bonik ka bonik koidicane loka Kristo Yesu,

⁶tetere itopoloorete Edeke Papa da loka Ejakaitiwok Yesu Kristo, ketau ediopet ka eporoto da ediopet.

⁷Kanuka ŋun, kisukunyanakinos bonik ka bonik, kwape kiisukunyikinia Kristo oni, tetere itopoloorio Edeke.

⁸ Naarai kalimokini ebe araun Kristo ebulesit loka aitutuket naka akepio kanuka abeit naka Edeke, tetere itogogoŋi aisumuneta nuka lukapapaakosi,

⁹ bobo da tetere Imo itopoloorete Edeke kanuka akeitim, Kwape iwadikatere ebe, “Kanuka ŋun ŋes kalimonoria jo kotoma atekerin, Ayeikinenei ekonikiror.”

¹⁰ Bobo da ebe, “Kolelata, yes atekerin, nepepe kiketuŋa.”

¹¹ Bobo da ebe, “Yes atekerin kere, kituroto Ejakait, Kituroto da ŋes Ituŋa kere.”

¹² Bobo da ebala Isaia ebe, “Ejaun aliasit naka Yese, Ŋes loenyouni ayait atekerin; Emunokinos ŋol atekerin.”

¹³Edeke da loka amun kilelebik yes aiyalama kere ka ainapakin kotoma aiyuun, kiyatanakinos noi ajaut kamun kotoma apedor naka Emoyo Lokalaunan.

¹⁴Ikainacan, etogogoŋit eoŋ elopet kanukus ebe ileleba yes da ajokis, isilelebitai acoa kere, bobo da ipedorete aikwenyanar bonik ka bonik.

¹⁵ Konye kewadikakinit yes katitiŋ naepol katutubeta ace, aisiitun, kanuka asianut nakainakinit Edeke,

¹⁶ tetere araun ebulesit loka Kristo Yesu mama ejaas atekerin, keswamak Akiro Nukajokak nuka Edeke aswam naka esasedoti, tetere eraunete atekerin asubanit naecamunitai, naitalaunit Emoyo Lokalaunan,

¹⁷Aso ejai akirot naaolobobotor kotoma Kristo Yesu kakonyen nuka Edeke.

¹⁸ Naarai mam atitiŋikini einer akirot namam Kristo iswamat kotomakaŋ, tetere erimarete atekerin, kanuka akirot arai aswamisioit,

¹⁹ kotoma apedor naka aanyuneta ka nukaumokin, kotoma apedor naka Emoyo Lokalaunan, kwaŋin ameun ka Yerusalem, kiton da airiamar Iliriko etodol alimonokin Akiro Nukajokak nuka Kristo,

²⁰ kwabo alosikinit alimonokin Akiro Nukajokak, mere neelimoritere ekiror loka Kristo, kenyek adukokin apetetait naka icetuŋanan,

²¹ konye kwape iwadikatere ebe, “Eanyunete ŋul lumam alimonokinitai akekiro, Ejenunete da ŋul lumam iirarito.”

²² Kanuka ŋun ŋes ketikokinitere irwan ipu kenyek abunore mamakus,

²³konye kwana, naarai emamei bobo eoŋ aibois katutubeta kanu, bobo da ameun ikar luipu emiela abunore mamakus,

²⁴ amuno aanyun yes naetorio alosit Sipain, yes da kinyamakinete eoŋ korotoka, kadau ber aipejokin yes adaun aimue.

²⁵ Konye kwana alosi Yerusalem, ejaanakini lukalaunak.

²⁶ Naarai isiyalamikinito luko Makedonia ka Akaia atukonokin iboro akorakin lukican lukotoma lukalaunak luejaas Yerusalem.

²⁷ Naarai isiyalamikinito kesi, ido da ejai kes apesen kamakec, naarai arai imorikikinete Imo arereŋesiokec nuka emoyo, ibusakinit da kes aijaanakin ŋul karereŋesiokec nuka akuan.

²⁸Aso kadau eoŋ ŋun, kepucak kes araito ŋin, etori mamakus alosit Sipain;

²⁹ ido ajeni ebe naabunio mamakus, abuni kaileleba naka arereŋ naka Kristo.

³⁰ Keŋaiŋait yes, iinacan, kanuka Ejakaitiwok Yesu Kristo, kanuka amin da naka Emoyo, koutas nepepe keoŋ kotoma ailipikus kanukaŋ mama ejai Edeke,

³¹ebe ketajari kama ejaas lukepali kotoma Yudaya, bobo da akaijaanakin nakijaar ŋina Yerusalem korau naisiyalamikinit lukalaunak;

³²tetere adoluni mamakus kaiyalama, kanuka akote naka Edeke, keyeŋ nepepe kayes.

³³Edeke loka ainapakin kojai nepepe kayes kere. Amen.