Read Ateso Iromayon 4 Bible Online

Iromayon 4 - Ateso bible

Iromayon 4

¹Aso kinera anyoika nuka Aburaam papaakosi kwape ejaar akuan?

²Naarai arai kitojokitai Aburaam kanuka aswamisioke, ejai naeolobobaa, konye mere kakonyen nuka Edeke.

³ Naarai inerasi biai nuiwadikatai? Ebe, “Abu Aburaam kiyu Edeke, kimarakinai ŋes araun adolit.”

⁴ Konye mama ejai ekeswaman, mam ekeropit imarakinio kanuka asianut, dimarai iburao.

⁵Kwabo mama ejai yenimam iswamai, konye iyuuni ŋol loitojoki luetumaaka, imarakinio akeiyuun araun adolit.

⁶ Kwape inerar Daudi ebe isirereŋitoi ituŋanan yenimarakinit Edeke araun ikadoliton komameete aswamisio;

⁷ Ebe, “Isirereŋitoi luisionio aronisio, ka luerapitai da adiakanareta;

⁸Isirereŋitoi etuŋanan lomam Ejakait imarakinit adiakar.”

⁹ Aso ca isirereŋitoi ŋol loekepitai arai bo ŋol lomam ekepitai da? Naarai kinera ebe, Kimarakinai aiyuun naka Aburaam araun adolit.

¹⁰Kimarakinio biai? Kedaun aikep, arai bo eroko kekepa? Mere kedaun aikep, dimarai eroko ekepa.

¹¹ Abu ŋesi kodum akepio araun aanyunet arai nakaipucakinet naka adolit naka akeiyuun eroko ekepa, tetere eraun papa loka lukeyuunak kere karaida mam ekepitai, tetere imarakinio kes adolit.

¹² Eraun da papa loka akepio mere mama ejaas ŋul luekepitai bon, konye mama ejaas ŋul da luetupito ikukut luka aiyuun naka papaakosi Aburaam nakejaatar eriŋa ekepa.

¹³ Naarai aisumunet ŋin mama ejai Aburaam ka aurike da ebe eraun ekeruman loka akwapin, mam kebuni kokisila, dimarai kanuka adolit naka aiyuun.

¹⁴ Naarai arai luka ikisila kes ikerumak, eraun aiyuun atitai, aisumunet da itapalaunio.

¹⁵ Naarai eyaŋaunete ikisila anyunyura, konye naemameatar ikisila emamei apaar.

¹⁶ Kanuka ŋun ebuni aisumunet kotoma aiyuun, tetere egoŋakina aisumunet asianut, kitogogoŋoi da mama ejai aur kere, mere mama ejaas ŋul luka ikisila bon, dimarai mama ejaas ŋul luka aiyuun naka Aburaam, (loerai papaawok kere,

¹⁷ kwape iwadikatere ebe, “Kadakaki jo araun papa loka atekerin nuipu,”) kakonyen nuka Edeke loiyuunit ŋesi, loeinakini lukatwak aijar, loenyarauni da iboro luemameete bala luejaas.

¹⁸ Kemamei amun abu kiyuu kotoma amun, tetere eraun papa loka atekerin nuipu; kwape kelimokinere ebe, “Kwape kwaŋin ejaun akoniwur.”

¹⁹ Mam abu akeiyuun kononokiar, naaomitor ejautene loka akuanake naketwanit, nakeraar loka ikar bala akwatat, ka akoik da naka Sara nakerakakinit,

²⁰ konye mam abu kobuonokin kanuka aisumunet naka Edeke kamamus aiyuun, dimarai kogogoŋor kaiyuun, kitopoloo Edeke,

²¹kojeni cut ebe epedori Edeke aswam nuisumunit.

²² Kanuka ŋun, “kimarakinai ŋes adolit.”

²³ Konye mam kiwadikatai kanukeŋ bon ebe, “Kimarakinai ŋes”,

²⁴ dimarai kanuwok da, Kiponio aimarakin oni da lukiyuunit ŋol lokitajaruni Yesu Ejakaitiwok kokatwak,

²⁵ lokeinakinio kanuka aibucanaretawok, kitajarunai da aitojok oni araun luedolito.