Read Ateso Iromayon 9 Bible Online

Iromayon 9 - Ateso bible

Iromayon 9

¹Enera abeit kotoma Kristo, mam eŋalai; itejenunete akaomisio kotoma Emoyo Lokalaunan,

²ebe kakadakinit noi ka ariebo da namam enaŋi kotauka.

³ Naarai tikapedo ailip eoŋ elopet aikenio atiakario kama ka Kristo kanuka ikainacan, lukatekerika kwape ejaar akuan,

⁴ kes luka Isirael, lukeinakinio araut odwe, ka aibuses, ka aitutuketa, ka ainakinio ikisila, ka aijaanakin Edeke, ka aisumuneta da;

⁵ eraas lukapapaa lukec, ido kotomakec alomunia Kristo kwape ejaar akuan. Kituritete Edeke loeyait kere ikar ka ikar. Amen.

⁶ Kwabo mere ebe ekarun akirot naka Edeke. Naarai luelomunete kotoma Isirael, mere kere luka Isirael obe,

⁷ karaida keraas lukaur naka Aburaam, mam kere eraas idwe; konye “toma Isaak ŋes enyaritere akoniwur.”

⁸ Ŋes atemar ebe idwe luka akuan mere ŋul idwe luka Edeke, dimarai idwe luka aisumunet imaritai araut akeur.

⁹ Naarai akirot na ŋes ebalar aisumunet ebe, “Kedol apak, aboŋuni, ido ejaunete Sara da kikoku.”

¹⁰ Kwabo mere ŋin bon, konye Rebeka da kedum akoik kokiliokit ediopet, ŋes Isaak papaawok,

¹¹karaida mam ber euruunitai idwe ŋul, komam iswamato adiokirot naejok arai naerono, tetere icasit alosikinit naka Edeke naka aseun, mere kanuka aswamisio, dimarai kanuka anyariteke,

¹² aponi kolimokinai ŋin ebe, “Ijaanakini lokapolon lodidi.”

¹³ Kwape iwadikatere ebe, “Abu kamina Yakob, konye kala Esau.”

¹⁴ Aso kinera anu? Ejai kereka amamus adolit kaneejai Edeke? Madi akuj!

¹⁵ Naarai ebala ŋesi Musa ebe, “Etimi yenakoto aitim, ido ekonakini asianut yenakoto aikonakin asianut.”

¹⁶ Aso do mere kanuka loekot karaida loekeri, dimarai kanuka aitim naka Edeke.

¹⁷ Naarai ebala nakiwadikatai Parao ebe, “Kanuka nu ŋes ketonyounio jo tetere etodikini akapedor mamakon, ido tetere elimorio ekakiror kakwapin kere.”

¹⁸ Aso do itimi loekot, ido itininiki loekot.

¹⁹Aso kitemari eoŋ ebe, “Kanukinyo eriŋar ŋesi itoronitor? Naarai iŋai kereka enyoikini nuelosikinit ŋesi?”

²⁰ Ijo ba ituŋanan, iŋai bo ijo yeniboŋokini Edeke? Epedori kereka ibore yenisubuna alimokin yenikesubuni ebe, “Kanukinyo kiisubia eoŋ kwana?”

²¹ Emamei kereka ekajean apedor kama kelupe, asubun ibore yenibus ka ibore da yenesil kaluŋuret ŋipeŋin?

²² Konye anyoika bo arai ekoto Edeke aitodikin anyunyura ka aitejenun da akepedor, abu kotitiŋikin katitiŋ kanaepol iboro luka anyunyura luasubitai amudiario,

²³ tetere itejenuni abarara naka akeibuses kotoma oboro luka aitim, luetemonokinit apeŋo kodumut aibuses,

²⁴kes oni lukiinyarauni mere Iyudayan bonik, dimarai Imo da?

²⁵ Kwape kineritor da kama ka Kosea ebe, “Ŋul lumam araas ikatuŋa, anyarai ikatuŋa, ŋin da namam kerai naminataka, anyarai naminat.”

²⁶ “Bobo da toma aibois ŋin nakelimokinitere kes ebe, ‘Mam yes iraas ikatuŋa,’ Nepenen enyaraere idwe luka Edeke lokajaran.”

²⁷ Kiworo Isaia da nuka Isirael ebe, “Karaida kerai etiai loka odwe luka Isirael kwape asiŋe naka aŋolol, aatoŋotokec bon itajario;

²⁸naarai iswamai Ejakait akekirot kakwap aitodol ka atubutub da.”

²⁹ Ido kwape kegeunia Isaia einer ebe: “Arai kemam Ejakait loka ajoresio kinyeinitor oni aur, Ti kiirau bala Sodom, ti kiiputokin ka Gomora.”

³⁰ Aso do kinera anu? Ebe Imo lumam atupito adolit apotu kodumut adolit, ŋes adolit naelomuni kaiyuun.

³¹ Konye do luka Isirael luetupito ikisila luka adolit, mam edolokinito ikisila ŋul.

³² Kanukinyo? Naarai mam apotu kotupata korot loka aiyuun, dimarai korot loka aswamisio. Kitiguikinos kamoru naketiguikinan,

³³ kwape iwadikatere ebe, “Koany, ebwaikini toma Sion amoru naketiguikinan ka atiiba nakebiroron; Yeniyuuni ŋes mam isurumio ileic.”