Read Ateso 1 Ikorinton 1 Bible Online

1 Ikorinton 1 - Ateso bible

1 Ikorinton 1

¹Paul, lokenyarao araut ekiyakia loka Kristo Yesu kanuka akot naka Edeke, ka Sosetene onace.

² Mama ejai ekanisa loka Edeke loejai Korinto, ŋul lukitalaunio kotoma Kristo Yesu, lukenyarao koraut lukalaunak, nepepe kaŋul kere luiwoneto ekiror loka Ejakaitiwok Yesu Kristo kaŋiniibois, loerai Ejakaitikec ka lowok da:

³ Kojai asianut mama ijaas, ka ainapakin nuepote kama ejai Edeke Papawok ka Ejakait Yesu Kristo.

⁴Emalaenenei Edeke tiritir kanukus, kanuka asianut naka Edeke nakiinakinio yes, kotoma Kristo Yesu.

⁵Naarai aponi kitabari yes kaŋolipone kotomakeŋ, kotoma akiro kere ka aijen da kere

⁶kwape kitogogoŋere aitejenunet naka Kristo kotomakus,

⁷ tetere mam itwakiarete amodioinakinet kere, idarete apukorio naka Ejakaitiwok Yesu Kristo;

⁸ loitogogoŋi yes kiton awasia, komamei aitoronio kapaaran naka Ejakaitiwok Yesu Kristo.

⁹ Erai Edeke lomunot, lokinyarauni yes alomun oidicane loka Okokuke, Yesu Kristo Ejakaitiwok.

¹⁰ Aso iinacan, keŋaiŋait yes, kokiror loka Ejakaitiwok Yesu Kristo, ebe kinerata kere adiopekirot, kinye atiakatiakaun ajaun kidiŋikus, konye kidicakina ketau ediopet ka ainerun da adiopet.

¹¹Naarai, ikainacan, kalimokis eoŋ lukokale loka Kloe, ebe ejai aŋolopa kidiŋikus.

¹² Aso naabala nata ebe, ebala ŋinidiopet kayesi ebe, “Arai eoŋ yenika Paul,” ice da ebe, “Konye eoŋ yenika Apolo,” ka ice da ebe, “Arai eoŋ yenika Kepa,” ka ice da ebe, “Arai eoŋ yenika Kristo.”

¹³Okwe, etiakatiaka kereka Kristo? Ibubukinitoi kereka Paul kanukus? Arai bo iponi kibatisai kokiror loka Paul?

¹⁴ Emalai naarai mam ebatisat idio kayesi dimarai Keresipo ka Gaio;

¹⁵kinyek idiotuŋanan atemar ebe aponi kibatisai kokirorikaŋ.

¹⁶ (Abu kebatis da lukokale loka Sitepan, Alemar ŋul mam ajeni arai abu kebatis ice kere.)

¹⁷ Naarai mam Kristo keyakit aibatis, dimarai alimonokin Akiro Nukajokak, kwabo mere kacoa naka akirot, kinyek emusalaba loka Kristo araun aamameak.

¹⁸ Naarai akirot naka emusalaba erai abaŋaanut kama ejaas lueoliorete, konye mama kija oni lukitajario erai apedor naka Edeke.

¹⁹ Naarai iwadikatai ebe, “Amudiari acoa naka lukacoa, Etapalauni da apirianut naka luepiriaka.”

²⁰ Ai bo ejai lokacoa? Ai bo ejai ekewadikan? Ai bo ejai eketepegan loka ikar kalu? Mam kereka Edeke abu kitababaŋ acoa naka akwap?

²¹ Naarai kotoma acoa naka Edeke, mam akwap abu kojen Edeke kanuka acoa, abu kisiyalamik Edeke aitajar luiyuunito kotoma abaŋaanut naka akirot naelimonokinio.

²² Naarai ekotosi Iyudayan aanyuneta, Iyonanin da emootos acoa,

²³ konye sio kilimonokini Kristo loebubukinitoi, loerai aitiguikinet mama ejaas Iyudayan, abaŋaanut da mama ejaas Imo,

²⁴ konye mama ejaas ŋul luenyaritai, Iyudayan ka Iyonanin da, erai Kristo apedor naka Edeke, ka acoa da naka Edeke.

²⁵ Naarai abaŋaanut naka Edeke erai acoa aitelekarit naka ituŋa, akalanyanut da naka Edeke egogoŋ aitelekarit naka ituŋa.

²⁶ Naarai, iinacan, koomito anyarauniokus, ebe mam luipu kayesi keraas lukacoa kwape ejaar aitemis naka akwap, mam ipu lukapedor, mam ipu lukapolou da luenyaraunitai,

²⁷konye abu Edeke koseu lukabaŋaanut luka akwap tetere isurumi lukacoa ileic; bobo da abu Edeke koseu luekalanyaka luka akwap tetere isurumi lukagogoŋok ileic;

²⁸bobo da abu Edeke koseu imukopin, ka luemwaŋitai kotoma akwap, eebo, ka iboro da luemameete, tetere itamamauni ŋul luejaas,

²⁹ kinyek idiotuŋanan aolobobot kakonyen nuka Edeke.

³⁰ Konye kanukeŋ ijaut yes toma Kristo Yesu, loabu Edeke kituluo awokocoa, ka adolit, ka aitalaunio, ka alakunio da;

³¹ kanuka ŋun kwape iwadikatere ebe, “Yeneolobobot, koolobobote kotoma Ejakait.”