Read Ateso 1 Ikorinton 10 Bible Online

1 Ikorinton 10 - Ateso bible

1 Ikorinton 10

¹ Naarai iinacan, akoto yes ajenun ebe abu edou kiteriborite lukapapaakos kere, kitoroto kere aŋolol,

²aponi kibatisai da kere kama ka Musa kotoma odou kotoma aŋolol da,

³ konyamata da kere inyamat luka emoyo,

⁴ ido komata kere numatan nuka emoyo. Naarai apotu komata kAtiiba naka emoyo naatupit kes, Atiiba ŋin da kerai Kristo.

⁵ Konye mam Edeke abu kolelakinite luipu kakesi; naarai aponi komudiarai kamodiŋ.

⁶ Aso keraas akiro ŋun aput mamawok, tetere mam kiraŋai nueroko, kwape kiraŋaata ŋul.

⁷ Sirikiraut luimaete aputosia, kwape ice kakesi; kwape kiwadikatere ebe, “Kiboikinos ituŋa ainyam ka aimat, kosodete konyout abolia.”

⁸ Kwabo sirikidoteata, kwape ice kakesi, kibiroros da ituŋa ilukumin akaisaarei ka luuni kapaaran adiopet.

⁹ Kwabo sirikikodut Ejakait, kwape kekoduniata ice kakesi, komudiasi imunwo.

¹⁰ Kwabo sirikirurumakis, kwape ice kakesi, komudia kes Ekamudiaran.

¹¹ Aso akiro ŋun apotu kodoikis ŋul aikwenyar, iwadikatai aituutooria oni, lukidoloki awasia naka ikar.

¹²Kanuka ŋun kocoite ŋin yeneomit ebe ebwoi, kinyek aibiror.

¹³Emamei acodunet nakidoikini yes, namam erai naka ituŋa kere. Konye erai Edeke lomunot, mam ejalakini yes acodunio adepar nuipedorete, konye nenipe kacodunet itemokini neekuianara, tetere ipedorete atitiŋikin.

¹⁴ Kanuka ŋun, luminanaka, kinacata aima aputosia.

¹⁵Enera kayes kwape lukacoa; kotuboto yesi nuenera eoŋ.

¹⁶ Aikopo ŋin nakarereŋ nakilipakini arereŋ, mere kereka ŋes aimor kaokot nuka Kristo? Emugati ŋol lokibili, mere kereka ŋes aimor kakuan naka Kristo?

¹⁷ Naarai erai emugati ediopet, oni da lukipu, kirai akuan adiopet, naarai kimori oni kere emugati ediopet.

¹⁸ Koanyutu kwape kiswamaa Isirael; mam kereka eraas luenyamete asuban ikamorak luka etem?

¹⁹ Aso do enera anu? Luainakinitai aputosia eraas kereka ibore? Arai bo ebe erai aput ibore?

²⁰ Mam, konye lueinakinete ikapirin, einakinete mama ejaas ajokin, kwabo mere Edeke. Eoŋ da mam akoto yes aimor kajokin.

²¹ Mam ipedorete aimat aikopo naka Ejakait, ka aimat da aikopo naka ajokin. Mam ipedorete aimor komesa loka Ejakait, komesa da loka ajokin.

²² Kisurumikereka oni Ejakait ekokote? Ejai tope oni agogoŋ aitelekarit nakeŋ?

²³ “Ibusak akiro kere,” konye mam kere isigalikinete. “Ibusak akiro kere,” konye mam kere edukete.

²⁴ Sirikemo ituŋanan akejokis bon, konye naka lucekeŋ.

²⁵ Konyam ŋinibore kere yenegwelario kagwelaret naka akiriŋ, komam iŋisete kanuka abuonokin.

²⁶ Naarai “erai akwap naka Ejakait, ka ailelebake.”

²⁷ Arai kiinyara yes lomam iyuunit, ikotosi da alosit, konyamata ŋinibore yenibwaikinio kakonyenekus, komam iŋisete kanuka abuonokin.

²⁸ Konye arai kiilimok ituŋanan ebe, “Ibore ŋin ainakinitai araut asubanit,” sirikinyama, kanuka ŋin yenikiitodikini yes, kanuka abuonokin da—

²⁹abala eoŋ ebe kanuka abuonokin, mere nakus, konye nakeŋ. Naarai kanukinyo etubokinere akaosikinio kanuka abuonokin naka ice?

³⁰ Arai amori kaimal, kanukinyo kamoromoroere kanuka ŋin yenemalai?

³¹ Aso arai inyamete arai imasete, arai iswamaete adiokirot kere, kiswamata kere kanuka aibuses naka Edeke.

³² Sirikitiguikis Iyudayan, karaida Iyonanin, karaida ekanisa loka Edeke,

³³ kwape etalakaritor eoŋ kere kakiro kere, komam amoot akajokis dimarai naka luipu, tetere itajario.