Read Ateso 1 Ikorinton 11 Bible Online

1 Ikorinton 11 - Ateso bible

1 Ikorinton 11

¹ Koputoorito eoŋ, kwape eoŋ da aputoritor Kristo.

²Keturit yes naarai kiitunito eoŋ kakiro kere, ido iricito iponesio kwape kejaikinitor yes.

³ Konye akoto yes ajenun ebe erai Kristo akou naka ŋolikiliokit, ekiliokit da erai akou naka aberu, akou da naka Kristo ŋes Edeke.

⁴ Ŋolikiliokit loilipi arai loedwari kimukorite akouke, itisili akouke,

⁵Konye ŋiniberu nailipi arai naedwari komam akekou imukoro, itisili akouke. Naarai esubit bala ebarenitoi akouke.

⁶Naarai arai mam imukoro aberu, koŋera do itimake, Konye arai irumete aberu ileic abarenio arai aŋerio, kimukori do.

⁷ Naarai mam ibusakinit ekiliokit aimukorit akouke, naarai erai aput ka aibuses naka Edeke; konye aberu ŋes aibuses naka ekiliokit.

⁸ Naarai ekiliokit mam elomunit kama ka aberu, dimarai aberu kama kekiliokit.

⁹Ido mam aponi kosubai ekiliokit kanuka aberu, dimarai aberu kanuka ekiliokit.

¹⁰ Kanuka ŋun ibusakinit aberu ajaut kaimukoret akouke kanuka imalaikan.

¹¹Kwabo toma Ejakait emamei aberu komamei ekiliokit, karaida ekiliokit komamei aberu.

¹²Naarai kwape kelomunia aberu kotoma okiliokit, kwape kwaŋin da euruunio ekiliokit kama ka aberu. Epote da iboro kere kama ejai Edeke.

¹³Kotuboto kanukus; ibus kereka aberu ailip Edeke komam imukoro?

¹⁴Mam kereka einono elopet kisisianak yes ebe, arai ipisi ekiliokit itimake eraas nukileic kamakeŋ?

¹⁵Konye arai eojak itima luka aberu, ŋes aibuses kamakeŋ? Naarai einakinitai itimake araparia.

¹⁶Konye arai ekot ituŋanan aitepeg, emamei sio epone loikoni nen, karaida ikanisan luka Edeke.

¹⁷Konye kaicorakinet kana mam keturit yes, naarai naitukonokinotor mam erai ajokis, dimarai aronis.

¹⁸ Nasodit, naarai naitukonokinotor okanisa, eira ebe ejaas atiaketa kidiŋikus, eyuunit da ace.

¹⁹ Naarai ibusakinit irioŋeta ajaut kotomakus, tetere etakanunete lukabeit kotomakus.

²⁰Naitukonokinotor yesi mam erai tetere inyamete inyamat luka Ejakait,

²¹Naarai kotoma ainyamakus, eyaŋaari ŋinidiopet ikenyamat, kogei ainyam, idiopet da eriebi eteŋei, ice da emerikin.

²² Okwe emameete kereka yes itogoi neinyamiata, ka aimat? Arai bo imenete ekanisa loka Edeke, itisilete da luemameete iboro? Enera anu kayes? Keturit gwai yes? Mam keturit yes kanuka ŋun.

²³ Naarai abu kadum kama ka Ejakait, ŋun nukejaikinit yes ebe, kakuare kaya nakebilakinere ebotet, abu Ejakait Yesu kolem emugati,

²⁴kedau aimal, kobilibil; kotema atiar, “Lo ŋes akakuan naerai kanukus. Kiswamaenenete ŋun aiitunitor eoŋ.”

²⁵ Kwape kwaŋin da kedaut ainyam, kirum akoli, kobala ebe, “Akoli na erai aitutuket nakitetet kotoma akaokot. Kiswamaenenete ŋun naimasiananata kere, aiitunitor eoŋ.”

²⁶ Aso irwan kere nuinyamenenata emugati ŋol, arai imasenenata akoli ŋin, ilimorete atwanare naka Ejakait, aitodol naebunio ŋesi.

²⁷ Kwaŋin ŋin yenenyami emugati arai yenemasi akoli naka Ejakait komam ibusakinit, egwaunit akiro nuka akuan ka aokot nuka Ejakait.

²⁸ Konye koŋica ituŋanan ilopet, kosodi konyam nuka emugati, komat da nuka akoli.

²⁹Naarai yenenyami ka aimat komam imisiikini akuan, enyami emasi da atubokinio.

³⁰ Kanuka ŋun ipu kayesi luekalanyaka, ka luedekasi, ice da ajotooros.

³¹Konye arai kimisiikina bonik, mam kitubokinio.

³² Konye nakitubokini oni Ejakait, kilecorio, kenyeis aitelekario nepepe kakwapin.

³³Aso do ikainacan, naitukonokinotor ainyam, kidareununos,

³⁴arai ejai yeneriebi eteŋei, konyam korekeŋ; kinyek atukonokinikus atubokinio. Etetemi acekiro kere naabunio.