Read Ateso 1 Ikorinton 14 Bible Online

1 Ikorinton 14 - Ateso bible

1 Ikorinton 14

¹ Kotupasi amin, kimielasi noi ainakineta nuka emoyo, konye aitelekarit tetere ilimonokinete,

²Naarai yeninera kaŋajepa mam ineras kituŋa dimarai ka Edeke, naarai emamei yenepupuni konye inera nukaiyeiyea kotoma Omoyo.

³Konye ŋin yenelimonokini ineras kituŋa nuedukete ka nuitalakarete, ka nuisicerededete da.

⁴Yeninera kaŋajep eduko bon, konye yenelimonokini eduki ekanisa.

⁵ Akoto yes kere einer kaŋajepa, konye aitelekarit noi tetere ilimonokinete. Naarai yenelimonokini epol adepar yeninera kaŋajepa, alemar ejai yenijuli, tetere epedorio aiduk ekanisa.

⁶Aso iinacan, arai kabu mama ijaas, kener kaŋajepa, ketudumikini yes ajokis anyoin, dimarai kinera kayes kotoma apukokinio, arai korot loka aijen, arai kalimonokin, arai kaisisianakin?

⁷Iboro luemamei aijar lueruos, bala alamaru arai adeudeu, arai tope mam eruosi kiporotoi luegelegela, ikonakinio ai etiakunio yenekusio arai yeneramio?

⁸Arai da itorokok eporoto loka arupepe, iŋai bo ekapakin kanuka ejie?

⁹Kwape kwaŋin yes da; arai ineras kaŋajep akiro numam ideleleete, ikonakini ai akirot nainerasi ejenun kama ejaas luepupete? Naarai inerasi apak atai,

¹⁰Motoko ejaas iporotoi luka iponesio luipu akwapin, konye emamei loemamei apolou,

¹¹Aso arai mam ajeni apolou naka eporoto kaŋol, araun bala emoit kama ejai yeninera, ka yeninera da eraun imoit kamakaŋ,

¹²Kwape kwaŋin yes da; naarai imielasi noi araut luka ainakineta nuka emoyo, komoata araut luitekoro kotoma aiduk ekanisa.

¹³Kanuka ŋun yeninera kaŋajep kilip aijul.

¹⁴Naarai arai kelip kaŋajep, ilipi ekamoyo, konye emameete akaomisio araito.

¹⁵ Aso anyoika bo do? Elipi kemoyo, elipi da kaomisio; ayei kemoyo, ayei da kaomisio.

¹⁶Arai imalai kemoyo, eboŋokini biai yeniboie kaibois naka yenemamei ainakineta ebe, “Amen,” naidaunia aimal, arai mam ejeni nuinera ijo?

¹⁷Naarai elemuni imalai ijo ejok, konye mam yenice edukio.

¹⁸Emalai eoŋ Edeke, naarai enera kaŋajepa adepar yes kere;

¹⁹konye kotoma okanisa akoto einer akiro akany kaomisioka, tetere esisianakini ice, itia einer akiro alukumin atomon kaŋajep.

²⁰ Iinacan, sirikiraut idwe kotoma aomisiokus; konye kotoma aronis koraut imukerun, konye kotoma aomisiokus koraut luipolok.

²¹ Iwadikatai kotoma okisila ebe, “Ebala Ejakait ebe, Abuni einer kituŋa kalu kotuŋa luka aŋajepa ace, kaituke da nuka imo, karaida kwaŋin, mam keirarete eoŋ.”

²²Aso eraas aŋajepa aanyunet mere mama ejaas luiyuunito, dimarai lumam iyuunito, konye alimonokin mam erai kanuka ŋul lumam iyuunito dimarai kanuka luiyuunito.

²³ Aso arai etukokina ekanisa kere, kinerasi kere kaŋajepa, arai kelomasi luemameete ainakineta, arai lumam iyuunito, mam kereka ebalasi ebe kikerepiki yes?

²⁴ Konye arai elimonokinete kere, kolom yenimam iyuunit, arai yenemamei ainakineta, itoronete ŋes kere, etubokinete ŋes kere,

²⁵ ilepilepio nukaiyeiyea nukotauke; kwaŋin ibirori ebuburia, emai ŋesi Edeke, elimori ebe, “Abeit ejai Edeke kayes.”

²⁶ Aso iinacan, anyoika bo? Nakitukokinotor, ejai ŋinidiopet ekosio, arai aisisianakin, ejai apukokinio, arai aŋajep, arai aijul. Kiswamas akiro kere kanuka aiduk.

²⁷Arai inera ituŋanan kaŋajep, kinerata iarei arai iuni, mere adepar, bobo da kabeanakin; kijul da idiopet.

²⁸Konye arai emamei yenikejulan, kililiŋ kotoma okanisa, kinerakin ilopet ka Edeke.

²⁹ Kinerata da inabin iarei arai iuni, komisiikis luce.

³⁰Konye arai kepukokin yeniboie akirot, kililiŋ yenisodit.

³¹Naarai ipedorete yesi kere alimonokin idiopet idiopet, tetere isisiaunete kere, kitalakarai da kere;

³²korima emoyo loka inabin inabin.

³³Naarai mam Edeke erai Edeke loka ecelet, dimarai loka ainapakin. Kwape ejaar kokanisan kere luka lukalaunak,

³⁴ kililiŋete aŋor kotoma okanisan. Naarai mam ecamakinitai einer, dimarai korimasi, kwape ebalatar ikisila da.

³⁵Arai ekotos aisisiaun akirot kere, kiŋita ikiliokokec koreriakec, Naarai mam ibus aberu einer kokanisa.

³⁶Kebuni kereka akirot naka Edeke kamakus, arai bo kidolokinit yes bonik?

³⁷ Arai eomit ituŋanan ebe erai enabi, arai bo yenikemoyo, koŋic ŋun nuewadikakinit yes, ebe, eraas aicorakinet naka Ejakait.

³⁸Konye arai emamei ituŋanan aijen, kojau kwaŋin.

³⁹Aso ikainacan, kimielas alimonokin, sirikitikokinos einer kaŋajepa;

⁴⁰ konye kiswamas akiro kere kwape ibusakinitor, ido kopone kaloejok.