Read Ateso 1 Ikorinton 15 Bible Online

1 Ikorinton 15 - Ateso bible

1 Ikorinton 15

¹Iinacan, ketejenik yes Akiro Nukajokak nuabu kalimonok yes, nuipotu yesi kijaut, nuicasitotor da,

²kanuka ŋun da kitajario, arai kiricata noi akirot naabu kalimonok yes-dimikito iyuunito atai.

³ Naarai abu kejaik yes nusodit nuabu eoŋ da kejau, ebe abu Kristo kotwana kanuka adiakanaretawok, kwape ejaatar nuiwadikatai,

⁴ ebe da aponi konukai, ebe da aponi kitajarunai kapaaran kanakiwuniet, kwape ejaatar nuiwadikatai,

⁵ ebe da kitakanikin Kepa, kosodi lutomon kaluarei.

⁶Kosodi kitakanikin irwan atipet iinacan luadeparito akwat akany, luipu kotomakec ejarete kiton kwana, konye ajotooros ice.

⁷ Kosodi kitakanikin Yakob, kosodi ikiyakia kere.

⁸ Awasia naka ituŋa kere, abu ketakanikin eoŋ da, kwape ikoku yenikijecuna.

⁹ Naarai arai eoŋ loadit noi kokiyakia kere, lomam kebusakinit anyarao ekiyakia, naarai abu kemanite ekanisa loka Edeke.

¹⁰ Konye kanuka asianut naka Edeke arai kwape araar kwana, akesianut da mamakaŋ mam kerai naatitai; dimarai abu keyatak noi aswam adepar kes kere, kwabo mere eoŋ, dimarai asianut naka Edeke nakijaar.

¹¹Aso arai kerai eoŋ, arai kes, kilimonokini kwaŋin, kwaŋin da ŋes ipotu kiyuuniata.

¹²Konye arai elimonokinio Kristo ebe aponi kitajarunai kokatwak, inerasi biai ice kayesi ebe emamei ajarun naka ikatwak?

¹³Konye arai emamei ajarun naka ikatwak, mam Kristo da itajarunitai.

¹⁴Konye arai mam Kristo itajarunitai, aso erai akosilimonokin atitai, akusiiyuun da atitai.

¹⁵ Ido kitakani kirai ikajenak luka Edeke lukeŋalak, naarai kitejenunit nuka Edeke ebe abu kitajar Kristo, lomam abu kitajar arai mam ikatwak itajarunio.

¹⁶ Naarai arai mam ikatwak itajarunio, Kristo da mam itajarunitai.

¹⁷Ido arai mam Kristo itajarunitai, erai akusiiyuun atitai, isalakinito toma adiakanaretakus.

¹⁸Ido ŋul da lukejotooros kotoma Kristo aoliosi.

¹⁹Arai kimunokina Kristo kotoma aijar kana bon, kirai lukitimitoi adepar ituŋa kere.

²⁰ Konye kwana adau Kristo aitajarunio kokatwak, ŋes araito nugeet nuka ŋul kaluejotooros.

²¹ Naarai kwape ajaunia atwanare kanuka etuŋanan, kwape kwaŋin ajau da ajarun naka lukatwak kanuka etuŋanan,

²²Naarai kwape etwakiata kere kotoma Adam, kwape kwaŋin ejarete da kere kotoma Kristo.

²³ Konye ŋinituŋanan kwape ebeikinia: Kristo ŋes araito nugeet; kosodete naebunio ŋesi ŋul lueraas luka Kristo.

²⁴ Kosodi edoluni esaŋe, naijaikinia ŋesi Edeke Papa ajakanut; naedaunia aitapalaun airumit kere, ka apolou kere ka apedor da.

²⁵ Naarai ibusakinit ŋes airumit aitodol naicakakinia lukasurupoke kere kwap kakejeneke.

²⁶ Lokasurup lokawasia amudiario ŋes atwanare.

²⁷ “Naarai itononokikini Edeke iboro kere kwap kakejeneke.” Konye naetemaria ebe itononokikinio iboro kere, idelelei ebe mam elimunitoi ŋol lokitononokikini iboro kere.

²⁸Naitononokikinitere iboro kere, ŋes konyet itononokikinitere Okoku da elopet mama ejai ŋol lokitononokikini iboro kere, tetere eraun Edeke loka kere kotoma kere.

²⁹Ikonakinete bo do ai luibatisauna kanuka lukatwak? Arai mam cut itajarunio ikatwak, kanukinyo kibatisaere kes kanukec?

³⁰ Kanukinyo do kijaar sio ationis ŋolisawa?

³¹ Iinacan, etogogoŋit kanuka aoloboboteka kanukus nakijaar toma Kristo Yesu Ejakaitiwok, ebe, atwani ŋinipaaran

³² Arai apotu kajioto kitiaŋ kotoma Epeso, kwape etuŋanan, ajokis anyoin? Arai mam itajarunio ikatwak, aso, “Kanyama, kamata, naarai kitwaki moi.”

³³Sirikiŋalas; “Aup kalueroko emunaari iponesio luejok.”

³⁴ Kikwarut kadolit, ido siridiakanarete, Naarai ejaas ice lumam ejenete Edeke. Enera ŋun aisurumia yes ileic.

³⁵Konye etemari ituŋanan atiar, “Ikwaikini ai itajarunio lukatwak? Ido epote kakuan anyoin?”

³⁶ Ibaŋaana ijo, ŋin yeniyei mam ejari dimikito ketwana.

³⁷Ŋin da yeniyei, mam iyei akuan naejauni, nabarai ikinyomit bon, motoko akimait, arai yenika epone ece.

³⁸ Konye Edeke einakini ŋes akuan kwape akotor, einakini ŋolikinyomit akuanake bon.

³⁹Naarai akiriŋ kere mam eputonoro; konye ejai akiriŋ naka ituŋa, ace naka itiaŋ, ace da naka ikweny, ace da naka lukecor.

⁴⁰Ejaas da awat nuka akuj, ka awat nuka akwap; konye aibuses nakokuju erai ace, aibuses da nakokwap erai ace.

⁴¹Ejai aibuses naka akoloŋ, aibuses ace naka elap, ka aibuses ace da naka aacer: naarai egelegela aacerit adiopet kaacerit ace kotoma aibuses.

⁴²Ikoni nen ajarun naka lukatwak.

⁴³ Eyeio komamei aibuses; itajarunio kaibuses; eyeio kakalanyanut; itajarunio kapedor.

⁴⁴Eyeio akuan naka akiriŋ; itajarunio akuan naka emoyo.

⁴⁵ Iwadikatai kwanata ebe, “Korau etuŋanan losodit Adam ekesa loejari.” Korau Adam lokawasia emoyo loeinakini aijar,

⁴⁶Konye lokemoyo mam kerai losodit, dimarai lokakiriŋ; kosodi konyet ŋol lokemoyo.

⁴⁷ Abuni etuŋanan losodit kotoma alup, ŋes lokapua; etuŋanan lokiareit abuni kotoma akuj.

⁴⁸Kwape ejaar etuŋanan loka apua, ikote nen luka apua; kwape ejaar da loka akui, ikote nen luka akui.

⁴⁹ Kwape kiputooro etuŋanan loka apua, kiputoori da lokokuju.

⁵⁰ Konye iinacan, enera nu ebe, mam epedorete akiriŋ ka aokot airum ajakanut naka Edeke; ido aibos mam irumi amamus aibos.

⁵¹ Koany, kalimokinete nakaiyeiyea ebe: Mam oni kere kijotoor, konye kilocokinio kere,

⁵² katipet, bala arwakakin akoŋu, keruiki arupepe nakawasia; naarai erui arupepe, itajarunio lukatwak kamamus aibos, kilocokinio oni da.

⁵³ Naarai ibusakinit naebosi na ainap amamus aibos, ibusakinit da naetwani na ainap amamus atwanare.

⁵⁴ Naebosi na naenapia amamus aibos, naetwani na da naenapia amamus atwanare, ŋes konyet itodolikinor akirot naiwadikatai ebe: “Ejwenyario atwanare kotoma aipikor.”

⁵⁵ “Wu jo atwanare, ai bo ejai akoniipikor? Wu jo atwanare, ai bo ejai ekonitidot?”

⁵⁶ Etidot loka atwanare ŋes aronis; apedor da naka aronis kes ikisila.

⁵⁷Konye kimalai Edeke lokiisipikori oni kanuka Ejakaitiwok Yesu Kristo.

⁵⁸ Aso do ikainacan luminan, kicata, komam iriaŋiriaŋas, kiyatanakis ŋinipaaran aswam naka Ejakait, naarai ijenete ebe mam itaaritos atai kotoma Ejakait.