Read Ateso 1 Ikorinton 4 Bible Online

1 Ikorinton 4 - Ateso bible

1 Ikorinton 4

¹ Koomit ituŋanan sio kwanata, kwape ikejaanakinak luka Kristo, ka ikeŋadak da luka nukaiyeiyea nuka Edeke.

² Bobo da iburao ikeŋadak atakan eraas lumunon.

³Konye kamakaŋ erai akirot naedit noi yes, arai airabet kere naka etuŋanan, atubokin eoŋ. Mam da atubokin bon.

⁴ Naarai mam ajeni nuewosakin bon, konye mam kemarakinio adolit kanuka ŋun, konye Ejakait ŋes katubokini.

⁵ Aso sirikitubo akirot eroko apak, aitodol naebunio Ejakait, loitacauni nuibwaitai nuka amuton, ido isideleleuni ainerun naka itauon. Kosodi edumuni ŋinituŋanan akeiturio kama ejai Edeke.

⁶ Aso iinacan, etuputoo ŋun aputokaŋ ka Apolo da kanukus, tetere kanukosi isisiaete ainyein adepar nuiwadikatai, kinye idio kayesi adakanun kanuka ediopet aitelekarit loce.

⁷ Naarai iŋai kitegelikinit jo kama kaluce? Inyoin kereka ejai jo yenimam kiinakinitai? Konye arai kiinakinitai, kanukinyo iwolobobotor bala mam kiinakinitai?

⁸ Idaut aimonikin! Idaut adumun abar! Iyaitos kamameete isio! Eebo, arai tiiyaito, tetere kimori ayait kayes!

⁹ Naarai aomit ebe etodia Edeke sio ikiyakia awasia, kwape ituŋa luetubokinitai aario: naarai kiraun isio ibore yenisesena kakwap, kama ka imalaikan ka ituŋa da.

¹⁰ Kirai isio ibaŋiok kanuka Kristo, konye iraas yesi lukacoa kotoma Kristo, Kikalanyaka isio, konye igogoŋ yesi. Kitubusikinitai yes, konye sio kitisilitoi.

¹¹ Kiton osawa lo da, kiriebi eteŋei ka akure da, kimujalal, kibuŋao, bobo da emameete sio ireria,

¹² kitaaritoi aswam kakaninikosi. Nakimoromoroere, kilipanakini arereŋ; nakiticanere, kititiŋikinit;

¹³ nakisabanakinere, kiŋaiŋai; kitusubi bala asusuj nuka akwap, ediirit da loka iboro kere, kiton kwana.

¹⁴Mam ewadikai nu aisurumia yes ileic, konye aikwenyar yes kwape idweka luminan.

¹⁵ Karaida kejaas yes ikesisianakinak ilukumin itomon kotoma Kristo, konye emameete lukapapa luipu. Naarai eoŋ ŋes kaurit yes kotoma Kristo Yesu kanuka alimonokin Akiro Nukajokak.

¹⁶ Aso keŋaiŋait yes koputoorito eoŋ.

¹⁷ Kanuka ŋun ejuk Timoteo mamakus, loerai okokuka lominat, lomunot da kotoma Ejakait, lokisiituni yes irotinika luejaas toma Kristo, kwape esisianakinia kaŋiniibois kotoma ŋolikanisa.

¹⁸Konye edakanunos ice kayesi ebe mam abuni mamakus.

¹⁹ Konye abuni atipet mamakus, arai ekot Ejakait, abuni eoŋ ajenun mere akiro nuka ŋul kaluedakanunos dimarai apedorikec.

²⁰ Naarai mam ajakanut naka Edeke ejai toma akirot, dimarai toma apedor.

²¹Ikotosi anyoika? Kabu kereka mamakus kebela, arai bo kabu kamin komoyo loiyapepera?