Read Ateso 1 Ikorinton 6 Bible Online

1 Ikorinton 6 - Ateso bible

1 Ikorinton 6

¹Arai ejai edio kayesi akirot kama ka onaceke, ijecekini kereka ŋesi aosan ŋes kakonyen nuka lumam edolito, kwabo mere kakonyen nuka ikalaunak?

² Arai bo mam ijenete ebe etubokinete ikalaunak akwapin? Aso arai itubokinete yesi akwapin, mam kereka ipedorete aitub akiro nuedisiak noi?

³Mam kereka ijenete ebe kitubokini imalaikan? Kikurwokinito biai akiro nuka aijar kana!

⁴Aso arai ijaas kaitub akiro nuka aijar kana, idakakinete kereka lumam eomitai kokanisa araut ikatubok?

⁵Enera ŋun aisurumia yes ileic. Emamei kereka kotomakus lokacoa ediopet, loepedori aitub akiro nuka iinacanake,

⁶konye iwosanakinos iinacan bonik, bobo da kakonyen nuka lumam iyuunito.

⁷ Aso kwana ejai aŋwal kotomakus, naarai iwosanakinos bonik, Kanukinyo gwai mam kikonakinere erono? Kanukinyo gwai mam kinasere iborokus.

⁸Konye yes ikonakinete erono, ido iŋasete, kiton iinacanakus da.

⁹Mam kereka ijenete ebe lumam edolito mam irumete ajakanut naka Edeke? Sirikiŋalas; karaida idotea, karaida luemaete aputosia, karaida lueeloko, karaida ikiliok luituluoros bala aŋor, karaida iketepak ikiliok,

¹⁰ karaida ikokolak, karaida ikeraŋak, karaida ikamerak, karaida ikamoromorok, karaida ikaŋatak, mam irumete ajakanut naka Edeke.

¹¹ Ice kayesi da ipotu koraas kwaŋin; konye aponi kilotar, konye aponi kitalaun, konye aponi kitojoki araut luidolito, kokiror loka Ejakait Yesu Kristo, kotoma Emoyo da loka Edekewok.

¹² “Ibus iboro kere kamakaŋ”; konye mam iboro kere isigalikinete. “Ibus iboro kere kamakaŋ”; konye mam ketubulesene idiobore.

¹³ “Eraas inyamat luka akoik, akoik da naka inyamat” itapalauni Edeke kere, ŋin ka ŋul da. Mam akuan erai naka adoteu, dimarai naka Ejakait, Ejakait da loka akuan.

¹⁴ Konye abu Edeke kitajar Ejakait, kitajari oni da kapedorike.

¹⁵ Mam kereka ijenete ebe eraas awatekus atutubeta nuka Kristo? Aso kalema kereka atutubeta nuka Kristo, ketaraut atutubeta nuka naadote? Madi akuj!

¹⁶ Arai mam kereka ijenete ebe lokirotakinos kanaadote eraas adiopetekuan? Naarai ebala ebe, “Ŋul luarei eraunos adiopetekuan.”

¹⁷ Konye ŋol lokirotakinos ka Ejakait, erai emoyo ediopet kaŋes,

¹⁸Kinacata adoteu, ŋinidiakaret naiswamai ituŋanan erai nakokiŋa akuanake; konye ŋin yenedotei adiaka kotoma akuanake alopet.

¹⁹ Mam kereka ijenete ebe awatekus kes eyekalu loka Emoyo Lokalaunan loejai tomakus, lokiinakini Edeke? Mam iraas kanukus;

²⁰ naarai kigwelitai kakais nuipu. Aso kitopolooritos Edeke kotoma awatekus.