Read Ateso 1 Ikorinton 7 Bible Online

1 Ikorinton 7 - Ateso bible

1 Ikorinton 7

¹Konye nuka akiro nuipotu kiwadikakis eoŋ. Ejok kama kekiliokit kinyek atiror aberu.

²Konye kanuka adoteu, kojau ŋolikiliokit kakeberu, ŋiniberu da kokilenike.

³Kotacak ŋolikiliokit akeberu nuibusakinito ŋes, kwape kwaŋin da kotacak ŋiniberu nuibusakinito okilenike.

⁴Mam aberu alopet eyait akekuan, dimarai okilenike; kwape kwaŋin da mam ekiliokit elopet eyait akekuan, dimarai akeberu.

⁵Sirimikanaros bonik, alemar diat icamanaros adaun apak, tetere iluŋakinos ailip; kosodete konyet aimorikikin bobo, kinyek Satan acodun yes kanuka amamus ayaikina.

⁶Enera ŋun kacamun, kwabo mere kaicorakinet.

⁷ Konye emiela ituŋa kere araut kwape kaeoŋ elopet. Konye ejai ŋinidiopet ainakineteke naebuni kama ejai Edeke, idiopet kopone ece, idiopet da kopone ece.

⁸Konye alimokini lumam edukokina ka apuserun da, ebe ejok kamakec arai esalito kwape kaeoŋ.

⁹ Konye arai mam epedorete ayaikina bonik, kodukokinos. Naarai ejok adukokin itia ainok.

¹⁰ Ecorakini luedukokina, kwabo mere eoŋ, dimarai Ejakait, ebe, kinyek aberu aisac okilenike.

¹¹Konye arai esaci, kosal mam edukokina, arai bo kopuco kokilenike. Bobo da kinyek ekiliokit aireŋear akeberu.

¹²Alimokini ice, eoŋ mere Ejakait, ebe, arai ejaas onace kaberu namam iyuunit, ecamuni ŋin da aiboienen kaŋes, kinyek aireŋear ŋin.

¹³Arai da ejaas aberu kekiliokit lomam iyuunit, ŋes da ecamuni aiboienen kaŋin, kinyek anyoun kama kokilenike.

¹⁴ Naarai italaunitai ekiliokit lomam iyuunit kanuka akeberu, aberu da namam iyuunit italaunitai kanuka okilenike. Arai mere kwaŋin tieraas ikusidwe lumam elaete, konye kwana eraas lukalaunak

¹⁵ Konye arai enyouni lomam iyuunit, konyou do ŋesi; kakiro nuikote nen mam onac arai kinac eenitai. Naarai abu Edeke konyarau oni toma ainapakin.

¹⁶ Ijo aberu, ijenuni biai, wolo bo itajari okilenikon? Ijo da ekiliokit, ijenuni biai, wolo bo itajari akoniberu?

¹⁷ Konye na bon, kolosenenei ŋinidiopet kwape kekorakinitor Ejakait, ŋinidiopet da kwape kenyaraunitor Edeke. Ecoranakini kwaŋin kotoma okanisan kere.

¹⁸Kenyaraunitai kereka etuŋanan ekepitai? Kinyek araun lomam ekepitai. Kenyaraunitai kereka etuŋanan lomam ekepitai? Kinyek akepio.

¹⁹ Naarai akepio mam erai ibore, amamus akepio da mam erai ibore, dimarai aricit aicorakineta nuka Edeke.

²⁰Kosalak ŋolituŋanan kanyaraunio nakenyaraunere.

²¹Irai kereka ebulesit nakinyaraunere? Siripodo ŋun, Konye arai ipedori araun loeosikinitai, kitwasama gwai kwaŋin.

²² Naarai lokenyaraunio erai ebulesit, erai loeosikinitai loka Ejakait; kwape kwaŋin da lokenyaraunio erai loeosikinitai erai ebulesit loka Kristo.

²³Aponi kogweli yes kakais nuipu; sirikiraut ibulesin luka ituŋa.

²⁴Aso iinacan, kosal ŋinidiopet nepepe ka Edeke kwape kenyaraunere.

²⁵ Nuka abekon emamei eoŋ aicorakinet naka Ejakait, konye kapesikis yes akiro kwape etuŋanan lomunot kanuka aitim naka Ejakait.

²⁶Aomit eoŋ ebe kanuka ican luka tinenikwana ejok arai kesal ituŋanan kwape ejaar.

²⁷Kirotakinitai kereka jo kaberu? Sirimoot alacakinio, Emamei kereka jo aberu? Sirimoot aberu.

²⁸ Konye arai imanyi, mam idiakit, arai da edukokin apese, mam ŋin ediakit. Konye luikote nen eanyunete ican luka akuan, ido akoto aiyar yes ŋul.

²⁹ Enera na, iinacan, ebe eŋoŋar apak; kanuka ŋun koraut luejaas kaŋor kwape kaluemameete,

³⁰luemonyete da kwape kalumam emonyete, ka luiyalamasi kwape kalumam iyalamasi, luegwelete da kwape kaluemameete iboro,

³¹ luitwasamaete akwap koraut kwape kalumam itwasamaete, Naarai etubor epone loka akwapin kanu.

³²Akoto yes koraut lumam iyaloŋoŋoete. Lomam emanyi iyaloŋoŋoi akiro nuka Ejakait, kwape epedoria aitelel Ejakait;

³³ konye loamanyit iyaloŋoŋoi akiro nuka akwapin, kwape epedoria aitelel akeberu,

³⁴ido ejai atiaket. Aberu namam edukokinitai, arai bo apese, iyaloŋoŋoi akiro nuka Ejakait, tetere eraun nakalaunan toma akuanake ka omoyoke da. Kwabo naedukokina iyaloŋoŋoi akiro nuka akwapin, kwape epedoria aitelel okilenike.

³⁵Enera ŋun kodumut yes ajokis, mam akoto ailok yes koic, dimarai aitetemikin nuibusakinito, kijaanakinete Ejakait komamei yenitapaari aomisiokus.

³⁶Arai eomit etuŋanan ebe mam ikonakinit ejok naisinerit, arai imiela noi, ido ibusakinit, aso kiswama ŋesi kwape ekotor, komany ŋes, mam ediaki.

³⁷Konye loicasit kotauke, komamei ibore yenitinaikinit, loepedori ayait akoteke, itogogoŋit da kotauke aricit naisinerit, iswamai ejok.

³⁸Kwaŋin loemanyi naisinerit, iswamai ejok; lomam emanyi da iswamai ejok aitelekarit.

³⁹ Irotakinio aberu kokilenike apak kere naejaria ŋol. Konye arai ketwana okilenike, eosikinitai adukokin loekot, konye toma Ejakait.

⁴⁰Konye aomit eoŋ ebe iyalama aitelekarit arai esali kwaŋin, Ido aomit ebe ajai kEmoyo loka Ejakait.