Read Ateso 1 Ikorinton 9 Bible Online

1 Ikorinton 9 - Ateso bible

1 Ikorinton 9

¹ Mam kereka eoŋ ejakakai? Mam kereka arai ekiyakia? Mam kereka eoŋ abu kaany Yesu Ejakaitiwok? Mam kereka yes iraas akaswam toma Ejakait?

² Naarai arai mam eoŋ arai ekiyakia kama ka ice, konye arai ekiyakia kamakus; naarai iraas yesi aipucakinet naka ekiyakianekaŋ kotoma Ejakait.

³Ŋin ŋes aboŋokineteka mama ejaas ŋul lukeŋisete.

⁴ Emamei kereka sio apedor ainyam ka aimat?

⁵ Emamei kereka sio apedor aup kaberu naerai inac, kwape kikiyakia ice, ka iinacan luka Ejakait, ka Kepa da?

⁶Arai bo eoŋ bon ka Baranaba emamei apedor ainyein aswam?

⁷Eserikalet enyoin elosi ejie kotacakin ŋes elopet? Iŋai tope irai emusabibu komam enyami araitoke? Iŋai tope icokiei esipan komam emasi akile nuka esipan?

⁸Okwe enera kereka ŋun kotuŋanane? Arai bo mam inerasi ikisila ŋupe ŋun?

⁹ Naarai iwadikatai toma okisila luka Musa ebe, “Sirikien emoŋ loipudapudai aicom akima.” Epodo kereka Edeke imoŋin?

¹⁰ Arai bo inera ŋun kanuwok? Eebo, iwadikatai kanuwok, naarai ibusakinit ekakorion akor kamun, ekecoman da aicom kamun ebe edumuni ewaike.

¹¹ Aso arai kiraikinit yes akiro nuka emoyo, erai ca akirot naepol arai kiidweny nukakuan kamakus?

¹² Arai emorete ice apedor ŋin kamakus, mam kereka sio kitelekarit? Konye mam kitwasamata apedor ŋin, dimarai kiŋirikinit akiro kere, kenyeis aitikokin Akiro Nukajokak nuka Kristo.

¹³ Mam kereka ijenete ebe luiswamaete aswam naka eyekalu enyamete koboro luka eyekalu, ka ŋul da luijaanakinete kotem ejaas kewaikec kotoma oboro luka etem?

¹⁴ Kwape kwaŋin icorakinit Ejakait ebe ŋul luelimonokinete Akiro Nukajokak, ejarete kanuka Akiro Nukajokak.

¹⁵ Konye mam eoŋ etwasamat akiro ŋun karaida adiopet. Kwabo mam ewadikat ŋun tetere ejaunete kwaŋin kamakaŋ. Naarai ejok eoŋ atwanare itia idiotuŋanan aitapalaun aoloboboteka.

¹⁶ Naarai arai alimonokini Akiro Nukajokak, emamei eoŋ naaolobobotor. Naarai ketiŋaikinitai. Itukwi eoŋ arai mam eoŋ alimonokini Akiro Nukajokak!

¹⁷ Naarai arai eswamai ŋun kakoteka, ejai aropio, konye arai mere akoteka, kamunoi kotoma ajokon.

¹⁸ Aso enyoin kereka ekaropit? Ŋes lota, ebe, kalimonok Akiro Nukajokak atai, komam etwasamai akapedor kere nakijaar kotoma Akiro Nukajokak.

¹⁹ Naarai karaida kaosikinitai kotuŋa kere, etuluoro ebulesit loka kere, tetere eriuni luipu aitelekarit.

²⁰ Abu karau bala Eyudayat kama ejaas lyudayan, tetere eriuni Iyudayan; kama kaŋul kalueyaito ikisila, abu karau loeyaito ikisila-karaida mam eoŋ elopet kayaito ikisila-tetere eriuni lueyaito ikisila.

²¹ Kama kaŋul kaluemameete ikisila abu karau loemameete ikisila-mere ŋes amamuut kikisila kama ejai Edeke, konye aricit ikisila luka Kristo-tetere eriuni ŋul luemameete ikisila.

²² Abu karau ekalany kama ka luekalanyaka, tetere eriuni luekalanyaka. Karau lokiponesio kere kotuŋa kere, tetere korotin kere ketajar ice.

²³Eswamai ŋun kere kanuka Akiro Nukajokak, tetere kimori ka ice kotomakec.

²⁴ Mam kereka ijenete ebe lueboloboloete, eboloboloete kere, konye ediopet edumuni ainakinet? Aso koboloboloete tetere idumunete.

²⁵ Yenepega kabolobol eyaikina kakiro kere. Iswamaete ŋul kwaŋin tetere edumunete aboko naemunaar, konye oni namam emunaar.

²⁶Eoŋ da mam aboloboloi atitai, mam anaŋi da bala loenaŋi apak;

²⁷ konye eticani akakuan, ketubulesen ŋes, kenyek kadau alimonokin ice, araun eoŋ elopet loeneritoi.