Read Ateso 2 Ikorinton 2 Bible Online

2 Ikorinton 2 - Ateso bible

2 Ikorinton 2

¹ Konye alosikinit na ebe mam bobo abuni mamakus kotoma akadakinit.

²Naarai arai keetakadik yes, aso iŋai bo ketalakari eoŋ, dimarai ŋol loetakadikinit eoŋ?

³Abu kewadikak ŋupeŋun kenyek naabunio akadakin kanuka ŋul lutiketalakasi eoŋ, naamunokinor yes kere ebe alakaraka ŋes nakus da kere.

⁴ Naarai abu kewadikak yes kotoma aiticanio naepol ka aburun naka etau, ka akiyo da nuipu, mere aitakadikin yes, dimarai tetere ijenunete kwape edeparitor noi aminaka mamakus.

⁵ Konye arai itakadikinit ituŋanan, mam ketakadikinit eoŋ bon, dimarai yes kere nepetai, kenyek ainuar.

⁶Ilosikino aiticanet ŋin yenikoni nen naedumuni kama ejaas luipu;

⁷ŋes ibusakinitor yes gwai aitim ka aitalakar ituŋanan yenikoni nen, kinyek diat yenikoni nen ailikorio kotoma akadakinike naedeparit.

⁸Kanuka ŋun keŋaiŋait yes aitogogoŋ amin kamakeŋ.

⁹ Naarai abu kewadik kanuka ŋun, tetere ketemi yes, wolo bo irimasi kotoma akiro kere.

¹⁰ Konye arai isioniete ituŋanan akirot kere, eoŋ da esioniei ŋes. Naarai arai esionit ituŋanan akirot, esionit kanukus, kakonyen nuka Kristo,

¹¹ kinye Satan aipikor oni; naarai mam kiswakit aijen iboteike.

¹² Naadolio Teroa alimonokin Akiro Nukajokak nuka Kristo, aponi kaŋaikin ekek kotoma Ejakait;

¹³konye mam ekamoyo eyeŋunit naarai mam adumunit Tito onaceka. Konye abu katwar kes, kalot Makedonia.

¹⁴Konye kimalai Edeke lokisipikonori tir kotoma Kristo, ido loitodiari aures naka aijen ŋes kaŋiniibois kotomakosi.

¹⁵ Naarai kirai isio asakat naka Kristo kama ejai Edeke, kotoma kaŋul kaluitaiario, kaŋul da lueoliorito,

¹⁶ mama ejaas lukiareit, aures naka atwanare naeyauni atwanare, konye mama ejaas ŋul lusodit aures naka aijar naeyauni aijar. Iŋai kereka ilosikino ŋun?

¹⁷ Naarai mam kirai kwape luipu luegwelanarete akirot naka Edeke, konye kinera kotoma Kristo kwape luipiororoete itauon, kwape luepote kama ka Edeke, akonyen nuka Edeke.