Read Ateso 2 Ikorinton 4 Bible Online

2 Ikorinton 4 - Ateso bible

2 Ikorinton 4

¹ Kanuka ŋun, kija kaijaanakin na kwape kidumunitor aitimio, mam kitapalikina,

² konye kiŋer nuibwaitai nuka ileic; kwabo mam kilosenenei ketute karaida aipurujaun akirot naka Edeke kaiŋal, konye kaitodiar naka abeit kitubusikina mama ejaas aomisio kere nuka ituŋa kakonyen nuka Edeke.

³ Ido arai imukoritai Akosikiro Nukajokak, imukoritai kama kalueoliorito.

⁴ Abu edeke loka ikar kalu kitumudak acoa naka lumam iyuunito kinyeis aanyun ailiya naka Akiro Nukajokak nuka aibuses naka Kristo, loerai aput naka Edeke.

⁵ Naarai mam kilimonokini bonik dimarai Kristo Yesu Ejakait, ka sio da ikusibulesin kanuka Yesu.

⁶ Naarai ŋes Edeke loabu kobala ebe, “Kocai aica kotoma amuton,” loecaikinit itauonowok tetere iliyai aijen naka aibuses naka Edeke kakonyen nuka Kristo.

⁷ Konye kija kabar kana oboro lukelupe, tetere ebuni aidiles naka apedor kama ejai Edeke, kwabo mere kamakosi.

⁸ Kiticanitoi koponesio kere, konye mam kiridakinio; kibuonokin, konye mam kitapalikina;

⁹kimanio, konye mam kijalakinitai; kicakario, konye mam kimudiario;

¹⁰ kidakenenei tir kawatekosi atwanare naka Yesu itetere etakani da aijar naka Yesu kawatekosi.

¹¹ Naarai nakijaria kijaikinio tir atwanare kanuka Yesu, tetere etakani da aijar naka Yesu kawatekosi nuetwakete.

¹²Kwaŋin iswamai atwanare tomakosi, konye aijar tomakus.

¹³ Konye kija kemoyo ediopet loka aiyuun, kwape iwadikatere ebe, “Abu keyuu, ŋes enerar.” Isio da kiyuunit, kanuka ŋun da kinera.

¹⁴ Kijeni ebe ŋol lokitajaruni Ejakait Yesu, itajaruni sio da nepepe ka Yesu, ka aisibwo sio nenipe kayes kakonyeneke.

¹⁵ Naarai eraas kere kanukus, tetere kwape iyatanakinor asianut kanuka luipu, iyatanakini da aimal, kitopolooritete Edeke.

¹⁶ Kanuka ŋun mam kitapalikina. Karaida emunauna etuŋananekosi Iokokiŋa, konye iteteo lokotoma ŋinipaaran.

¹⁷ Naarai ican lu luebenen luka apak naedit, kiswamakinete oni alaŋir naedepari noi noi naka aibuses,

¹⁸ naarai mam kiseseni iboro lueanyuna, dimarai lumam eanyuna; naarai lueanyuna eraas luka apak naedit, kwabo lumam eanyuna eraas luka ikar kere.