Read Ateso 2 Ikorinton 5 Bible Online

2 Ikorinton 5 - Ateso bible

2 Ikorinton 5

¹ Naarai kijeni ebe arai emunauna iswamuwok yenika akwap kana yenikiboiororor, kija kaduket naebuni kama ejai Edeke, ŋes etogo lomam iswamatai kakanin, loka ikar kere kotoma akuj.

² Naarai kane kidinya kabeit, kemielas noi aitanapio etogowok loebuni kokuju,

³kosodi nakitanapere, kenyeis atakanun kimujalal.

⁴ Naarai kidinya oni lukija toma oswam yen, naarai kilaŋirikinito; mam kikoto alacar, konye aitanapio, tetere ejwenyari aijar yenetwani.

⁵ Konye ŋol lokiswamakinit oni akirot ŋin ŋes Edeke, lokiinakinit oni Emoyo araun aititiŋet.

⁶ Aso kititiŋikini oni apaarasia kere, naarai kijeni ebe nakijaar toma akuan, kilwaniar kama ejai Ejakait,

⁷ naarai kilosi kanuka aiyuun mere kanuka aanyun.

⁸ Kanuka ŋun kititiŋikini, kikoto alwaniar kakuan, kajaut die ka Ejakait.

⁹ Aso kigipari aisiyalamikin Ejakait, arai kija die arai kilwaka da.

¹⁰ Naarai kibusakinit kere atakanun koiŋaren keicoloŋ loka aitub loka Kristo; kodum ŋinituŋanan nukiswamai akuanake, kwape eswamator, arai nuejok arai nueroko.

¹¹ Aso naarai kijeni ayoŋit Ejakait, kijodouni ituŋa; konye kitakanunitai sio kakonyen nuka Edeke, ido amuno ebe kitakanunitai kotoma aomisiokus da.

¹² Mam kiturokina bobo kamakus, dimarai ainakin yes nuiwolobobototor kanukosi, tetere ipedorete aboŋokin ŋul luewoloboboto kakiro nukokuju bon, kwabo mere nukotauon.

¹³Naarai arai kemamu sio acoa, erai kanuka Edeke; arai da kijau isio acoa, erai kanukus.

¹⁴Naarai kitiŋaikinit sio amin naka Kristo, naarai kitogogoŋit ebe abu ediopet kotwanik ituŋa kere; kanuka ŋun apotu kere kotwaka.

¹⁵ Ido abu ŋesi kotwanik ituŋa kere, tetere luejarete mam ejarete bobo kanukec bonik, dimarai kanuka ŋol loabu kotwana, kojaru da kanukec.

¹⁶Ŋes mam kitenunia ituŋanan kere kwape ejaar akuan amear lolo, karaida kipou kajenutu Kristo kwape ejaar akuan, konye kwana mam bobo kijeni ŋes kopone kaŋol.

¹⁷ Kanuka ŋun, arai ejai ituŋanan kotoma Kristo, arau isubat yenikitetet; atuboros nukolo; koany, araut nukitetiak.

¹⁸ Epote kere kama ejai Edeke, loabu kitupuc oni kanukeŋ kotoma Kristo, abu koinak da sio aijaanakin naka aitupuc;

¹⁹ ŋes atemar ebe kejai Edeke toma Kristo itupuci akwap kanukeŋ, komam imarakini kes aibucanaretakec, ebwaiki da tomakosi akirot naka aitupuc.

²⁰ Ŋes kiraar ikiyakia kanuka Kristo, kosubit bala iŋaiŋai Edeke kotomakosi. Kiŋaiŋait yes, kanuka Kristo, kopucoto ka Edeke.

²¹ Lomam ajeni adiakar kitarau adiakar kanuwok, tetere kiraun oni adolit naka Edeke kotomakeŋ,