Read Ateso 2 Ikorinton 7 Bible Online

2 Ikorinton 7 - Ateso bible

2 Ikorinton 7

¹Aso luminan, naarai kija kaisumuneta ŋun, ketesegaaros kotoma asilianut kere naka akuan ka naka emoyo da, ketodoloto alaunit kotoma ayoŋit Edeke.

² Koinakinai apak kotauonokus; mam kikonakinit idiotuŋanan erono, karaida amunaar idiotuŋanan, mam da kirodit idiotuŋanan.

³ Mam enera akirot ŋin tetere atubokini yes, naarai abu kenerite sek ebe ijaas yes otauonokosi, kiton atwanare nepepe ka aijar da nepepe.

⁴Kija katitiŋ naepol mamakus; kija kaolobob naepol kanukus; ileleba eoŋ alakara. Ilapara noi aileleka kotoma aiticaniokos kere.

⁵ Naarai nakidolio Makedonia da mam awatekosi iyeŋuna, konye kiticani kowaitin kere-kiŋa kejai ejie, toma da akurian.

⁶ Konye Edeke, loitalakari luitisilitoi, abu kitalaka sio kanuka abunore naka Tito;

⁷kwabo mere kanuka abunoreke bon, konye kanuka aitalakario nakitalakario ŋes kamakus, kolimonok sio akiro nuka eimielikus, nuka akuudianakus, ka adunyanutukus kanukaŋ, ŋes eyatakinia alakar.

⁸ Naarai karaida abu kesiturur yes kanuka ebaluaka, mam eitokina, (karaida abu keitok,) naarai aany ebe abu ebalua ŋol kisiturur yes, karaida adaun apak naedit.

⁹Konye kwana aleli, mere naarai kitururuoto, dimarai naarai kitururuoto kiton aitoronikin; naarai ipotu kitururuoto mama ejai Edeke, kinyeis atwakiar akirot kere kamakosi.

¹⁰ Naarai aiturur mama ejai Edeke iswamai aitoronikin, kiton aitajario namam iitokin, konye aiturur naka akwap iswamai atwanare.

¹¹Naarai koany aiturur ŋin mama ejai Edeke abu kiswamak yes adunyanut naetia nen, aiyara da, ka anyunyura, ka akurian, ka eimiel, ka akukuranut, ka ainyaŋ da. Kaŋinikirot itodiara yesi araut luilaete kotoma aswamisioit kaŋin,

¹²Aso karaida kewadikakinit yes, mere kanuka yenekonit erono, karaida kanuka ŋin yenikikonakinitai erono, dimarai kitoduunai adunyanutukus kanukosi mamakus kakonyen nuka Edeke.

¹³Kanuka ŋun kitalakaritai. Bobo da kotoma aitalakariokosi kipou kalelata noi jokan kanuka aile! naka Tito, naarai ipotu yesi kere kisiyenut ekemoyo,

¹⁴Naarai arai abu kaolobobote kamakeŋ kotoma akirot kere kanukus, mam kesurumitai ileic; konye kwape kiilimonokinitor yes akiro kere kabeit, kwape kwaŋin da aolobobotekosi kama ka Tito kerai nakabeit.

¹⁵ Ido iyatanakin aminake mamakus, naiitunio kwape irimatar kere, kwape kisukunyikiniata ŋes kakurian ka amaran.

¹⁶Aleli naarai kotoma ŋinikirot icasit amunoka kanukus.