Read Ateso 2 Ikorinton 8 Bible Online

2 Ikorinton 8 - Ateso bible

2 Ikorinton 8

¹ Konye iinacan, kikoto yes ajenun asianut naka Edeke nakeinakinio kotoma okanisan luko Makedonia.

²Naarai nakitemere kes kaiticanio naepol, abu ailelekec nailapara, ka aiyarorotoikec naepol kiyatanak kiton abarara naka aikorokec.

³Naarai etejenun ebe kwape ejaar apedorikec, ka adepar apedorikec, apotu koseut akorakin iborokec.

⁴ Apotu kilipata kaiŋaiŋa naepol, kanuka asianut ŋin ka eidicane loka ajiaanakin lukalaunak.

⁵Apotu kiswamata kwaŋin, mere kwape kimunor isio, dimarai apotu kogeut ainakin bonik mama ejai Ejakait, ido mamakosi da kanuka akote naka Edeke.

⁶Kanuka ŋun kipou kecorata Tito ebe kwape abu kogeunia, koŋetak da kwape kwaŋin asianut ŋin kotomakus.

⁷ Konye kwape itelekaritotor yesi kakiro kere, kaiyuun, ka einer, ka aijen, ka adunyanut kere, ka akusimina da mamakosi, kitelekarito da kasianut ŋin.

⁸Mam enera ŋun kaicorakinet, dimarai kanuka adunyanut naka ituŋa ice aitemio ebe erai akusimin nakabeit.

⁹ Naarai ijenete asianut naka Ejakaitiwok Yesu Kristo, karaida kerai lokabaran, konye korau lokican kanukus, tetere kitabari yes kanu ka icanike.

¹⁰Ido kakiro kaŋun ketetemik yes; ejok na kamakus luipotu kogeikis ekaru je, mere bon aswam, dimarai akot da,

¹¹konye kwana koŋetakis kaswam, tetere kwape ipotu kokapakinotor akot, kwape kwaŋin da koŋetakis kotoma kaluijaatar yesi.

¹² Naarai arai ekapakina ituŋanan aikor, ecamunitai kwape ejaatar luejaatar ŋesi, kwabo mere kwape ejaatar luemameete ŋes,

¹³Naarai mam enera ŋun tetere isiyeŋunio ice, ka yes da aiticanio,

¹⁴ konye aitirian, luidilasi yes kapaarasia kanu itodolete luetwakiarito kesi, kosodete luidilasi kes da itodolete luitwakiarito yesi, kwaŋin ejaun ariakanara.

¹⁵ Kwape iwadikatere ebe, “Yeniketukonokini loepol mam edeuni, yeniketukonokini loedit, mam epuda bobo.”

¹⁶Konye kimalai Edeke loibwaikinit adunyanut ŋipeŋin kanukus otau loka Tito.

¹⁷Naarai abu kocam aicorokosi, kwabo erai loedunyana noi ebuni mama ijaas kakoteke bon.

¹⁸Kijuku nenipe kaŋes onac loituritoi anatar ikanisan kere kanuka alimonokin Akiro Nukajokak,

¹⁹ ido mere ŋun bon, konye apotu ikanisan koseutu ŋes aupun kasio kakirot naka asianut kana nakijaanakini isio aitopolooria Ejakait, ka aitodiar da akapakinakosi,

²⁰Kicoikinit kinyek idiotuŋanan aitoron sio kanuka ainakinet kana naepol nakijaanakini isio,

²¹ naarai kipodo nuejok mere bon kakonyen nuka Ejakait, konye kakonyen nuka ituŋa da.

²²Nepepe ka ŋul da kijuku onacewok lokipou ketemoto irwan ipu kakiro nuipu araut loedunyana, konye kwana loedunyana aitelekarit kanuka amunoke naepol mamakus.

²³ Nuka Tito da, erai epadicika ka ekeswaman da nepepe keoŋ kanukus; nuka iinacanawok, eraas ikiyakia luka ikanisan, aibuses naka Kristo.

²⁴ Aso kitodikisi kes kakonyen nuka ikanisan aitodikinet naka aminakus, ka aolobobotekosi da kanukus.