Read Ateso Ipeson 2 Bible Online

Ipeson 2 - Ateso bible

Ipeson 2

¹ Ido kitajaru yes da, lukolo itwakito kanuka akusiibucanareta ka adiakanareta da,

² nukolo kilosenenete kotoma, kwape ejaar epone loka akwapin kanu, kwape ejaar ekapolon loka apolou naka apak, emoyo loiswamakini kwana odwe luiulaka.

³ Kipou isio da kere kekonenenete nen kolo kotoma aiŋobel naka awatekosi, keswamaenenete nuekoto akuan ka aomisio, kirai koinono idwe luka anyunyura kwape kaluce da kere.

⁴Konye Edeke loebarit aitim, kanuka akemin naepol nakiminaar oni,

⁵ nakitwakitor kanuka aibucanaretawok, abu kituluo oni ikajarak nepepe ka Kristo, (itajarunitai kanuka asianut,)

⁶ kitonyou oni nepepe kaŋes, kisiboik oni nepepe kaŋes aiboisio nuka akuj kotoma Kristo Yesu,

⁷ tetere kokar luepote itodikini abar naedeparit naka akesianut kotoma ajokis naejai mamawok kotoma Kristo Yesu.

⁸ Naarai asianut ŋes kitajari yes kanuka aiyuun; kwabo mam kebuni kamakus, ŋes ainakinet naka Edeke,

⁹ mam kebuni kanuka aswamisio, kinyek ituŋanan kere aolobobotor.

¹⁰ Naarai kirai oni akeswamisio, nuesubunitai kotoma Kristo Yesu aswam aswamisio nuejok nukegeunia Edeke aitemonokin tetere kilosenenei kotomakec.

¹¹ Kanuka ŋun kiitunito ebe iraas kolo Imo kotoma akuan, luenyarito ŋul luenyarakina bonik luekepitai, lumam ekepitai, ŋes atemar ebe, akepio naka akuan nakiswamaete akanin,—

¹² kiitunito ebe kapak kaŋin amamei yes Kristo, igelara kajena naka Isirael, imo luamameete aitutuketa nuka aisumunet, amamei yes amun, amamei da yes Edeke kotoma akwapin.

¹³ Konye kwana kotoma Kristo Yesu yes lukolo kilwaka, kisukunyunitai die kotoma aokot nuka Kristo.

¹⁴ Naarai erai ŋesi ainapakiniwok, lokiituluorit oni kere ediopet, kotiyaik arwatat nakokidiŋ nakitiakit oni,

¹⁵ kitamamau asurup kotoma akuanake, ikisila luka aicorakineta kotoma apucuneta, tetere esubuni kotomakeŋ luarei araut etuŋanan ediopet lokitetet, kiswama ainapakin,

¹⁶ tetere itupuci da luarei kere mama ejai Edeke kotoma akuan adiopet kanuka emusalaba, nakearia ŋes elopet asurup.

¹⁷ Kosodi kobu kolimonok Akiro Nukajokak nuka ainapakin yes lukilwaka, ainapakin da lueapiete;

¹⁸ naarai kanukeŋ oni kere iarei kikunyakini Papa kotoma Omoyo ediopet.

¹⁹ Aso do mam bobo iraas Imo ka luiboiororos, konye iraas lukajen naka lukalaunak, ka lukokal da loka Edeke,

²⁰ naarai aponi kodukokin apetetait naka ikiyakia ka inabin, kerai Kristo Yesu elopet amor nakapolon naka agor,

²¹ kotoma ŋol imorianakino aduketa kere, epoloor araun eyekalu lokalaunan kotoma Ejakait;

²² kotoma ŋol yes da kidukio nepepe araut aibois naiboio Edeke kotoma Omoyo.