Read Ateso Ipeson 4 Bible Online

Ipeson 4 - Ateso bible

Ipeson 4

¹ Aso eoŋ eenat kotoma Ejakait, keŋaiŋait yes alosenen kwape ibusakinitor anyaraunio nakinyaraunere,

² kaitasono kere ka aiyapepera da, katitiŋikin, koŋirionokinos kotoma amin,

³ kodunyakinito aricit eipeone loka Emoyo kotoma olomorut loka ainapakin.

⁴ Ejai akuan adiopet, ka Emoyo ediopet, kwape kolo kinyaraunere kotoma amun adiopet naka anyarauniokus.

⁵ Ejakait ediopet, aiyuun adiopet, aibatis adiopet.

⁶ Edeke ediopet, ŋes Papa loka kere, loeyait kere, loitorit toma kere, loejai da toma kere.

⁷ Konye aponi koinakinai ŋinidiopet kaoni asianut kwape ejaar aitemis naka ainakinet naka Kristo.

⁸ Ŋes ebalar ebe, “Naadokaria kuju abu kijoreo ikijoreoro, Koinak da ituŋa ainakineta.”

⁹ Akirot ŋin ebe, “Abu kodoka”, ŋes atemar ai dimarai ebe abu kijesar da ariino nukokwap noi nuka akwap?

¹⁰Ŋol loabu kijesar ŋes ŋopeŋol loabu kodoka kuju noi adepar akuj kere, tetere itekori iboro kere.

¹¹ Ŋol da abu koinak ice araun ikiyakia, ka ice inabin, ka ice ikalimonokinak Akiro Nukajokak, ka ice ikecokok, ka ice da ikesisianakinak,

¹² aitodolikinio lukalaunak kanuka aswam naka aijaanakin, kosodi akuan naka Kristo adukio;

¹³ kiton nepekidolio oni kere oipeone loka aiyuun, ka ajenun da Okoku loka Edeke, kiton nekidolio okiliokone loibecokino, kiton aitemis naka apolou naka aitekoro naka Kristo;

¹⁴ tetere mam kirai bobo imukerun luiriaŋiriaŋas, lukiyaŋanari ŋolikwam loka aisisianakin kotoma aimod naka ituŋa, kotute lokibotei luitapaarete.

¹⁵ Konye karicata abeit kotoma amin, kapolooros da adolore tomakeŋ kakiro kere, loerai akou, ŋes Kristo.

¹⁶ Tomakeŋ akuan kere kerucokin ka ainicakinio ejok kanuka aisigalikin naka ŋinikilenyasit, kwape ejaar aswam kotoma aitemis naka ŋinitutubet, kiyatanakini akuan apoloor kanuka aiduk kotoma aminanar.

¹⁷ Aso enera na etejenun da kotoma Ejakait, ebe, sirilosenenete bobo kwape elosenenoto Imo, kotoma aamameak nuka aomisiokec;

¹⁸ itumutonitai akececoa, egelara kotoma aijar naka Edeke kanuka aolit naejai tomakec, kanuka aninik naka itauonokec.

¹⁹ Erum kes esumerededek, aluŋakinos kes ikulepek toma abenyanut aswam nukasilianut kere kotoma airaŋaanut,

²⁰Konye mam yes isisiato Kristo kwaŋin,

²¹arai ipotu kiirasi ŋes, ka aisisianakinio da kotomakeŋ, kwape ejaar abeit toma Yesu.

²² Kotoma akiro nuka iponesiokus lusodit, kolacasi etuŋanane lokolo, loebosi kanuka aiŋobel naka aiŋal,

²³ ido kiteteunos kotoma omoyo loka aomisiokus,

²⁴ konapata da etuŋanane lokitetet, lokesubio toma aput naka Edeke, toma adolit ka alaunit da naka abeit.

²⁵ Kanuka ŋun kolacasi asabanut kinerenenasi abeit, ŋinituŋanan kikeidunyet, naarai kirai atutubeta ŋinidiopet kayenice.

²⁶ Konyunyurasi, kwabo sirikidiakasi; kinyek akoloŋ alomar koriŋa inyunyurasi,

²⁷kwabo sirikiinakis Satana apak.

²⁸ Kinyek ekokolan akoko bobo, konye gwai kokokak aswam ejok kakaninike, tetere edumuni lueinakini yeniyarorotoi.

²⁹ Sirikelomu adiokirot kere naebosit kaitukekus, dimarai naejok naeduki kwape ipudar, kosodi ainakin asianut ŋul luepupunete.

³⁰ Ido sirikitakadikis Emoyo Lokalaunan loka Edeke, lokolo kipucakini yes aipucet kiton apaaran naka alakuniokus.

³¹ Kolemaros kamakus adwaris kere, ka anyunyura, ka adedeŋ, ka ecelet, ka ainyanakin, nepepe ka ameŋeranut kere,

³² koraas luisiaka bonik ka bonik, luitimonoros, ido kisionionoros, kwape kisionio Edeke da yes kotoma Kristo.