Read Ateso Ipeson 5 Bible Online

Ipeson 5 - Ateso bible

Ipeson 5

¹ Aso koputorito Edeke kwape idwe luminan.

² Kolosenenete da kotoma amin, kwape Kristo da kiminar yes koinakin elopet kanuwok, ainakinet ka asubanit da naeuru maa mama ejai Edeke.

³ Konye adoteu ka asilianut kere ka airaŋaanut sirielimitoi cut kotomakus, kwape ibusakinitor lukalaunak.

⁴ Kinyeis nukileic, ka eyala nukabaŋaanut, karaida aboliar akiro, numam ibusakinito; konye gwai aimalaenen.

⁵ Naarai ijenete yesi kabeit ebe emamei yenedote, karaida yenesiliana, karaida yeniranaana, ŋes yenemai aputosia, yenejaas kairumet toma ajakanut naka Kristo ka Edeke.

⁶ Kinyek ituŋanan aiŋalaŋal yes kakiro nuemameete, naarai kanuka ŋun ŋes ebunokinia anyunyura naka Edeke odwe luiulaka.

⁷Aso sirikimorianakinos kakes,

⁸ naarai iraas kolo amuton, konye kwana iraut aica kotoma Ejakait; kolosenenete do kwape idwe luka aica.

⁹Naarai araito nuka aica ejaas ajokis kere ka adolit ka abeit da.

¹⁰ Kitemete nuitojokit Ejakait.

¹¹ Kwabo siridicasi kaswamisio numam eraete, nuka amuton, konye kitoronata kes.

¹² Naarai erai nakileic alimit ŋun nuiswamaete kesi kaiyeiyea;

¹³ konye nuitoronit aica kere, etakanunete, naarai ŋinikirot kere naetakanunitai, ŋes aica.

¹⁴ Ŋes ebalar ebe, “Kokweny, ijo yenijotoi, kojaru kokatwak, Kicaikini Kristo.”

¹⁵ Aso kocoito noi kwape ilosenenoto, mere kwape luemamei acoa, dimarai kwape luejai acoa,

¹⁶ koyuununete apak, naarai eroko apaarasia nu.

¹⁷ Kanuka ŋun siriraas ibaŋiok, konye kojenut nuekot Ejakait kwape ejaatar.

¹⁸ Kwabo sirimeranakinos ajon, naarai eyaunete iceleta; konye kilelebununos Emoyo,

¹⁹ kinerenenas kotoma osabulin, ka ikososinei, ka nupwakan nuka emoyo, koyeenenete, kituruonokinete Ejakait lueruos kotauonokus,

²⁰ kimalaenenete Edeke Papa apaarasia kere, kanuka kere, kokiror loka Ejakaitiwok Yesu Kristo.

²¹ Kononokianakinos bonik kotoma ayoŋit Kristo.

²² Yes aŋor, kononokikis ikiliokokus kwape inonokikiniata Ejakait,

²³ naarai ekiliokit ŋes akou naka aberu, kwape Kristo da eraar akou naka ekanisa, ŋes Eketajaran loka akuan.

²⁴Konye kwape enonokikinitor ekanisa Kristo, kwape kwaŋin aŋor da kononokikis ikiliokokec kaŋinikirot.

²⁵ Yes ikiliok, kominasi aŋorokus, kwape Kristo da keminar ekanisa koinakin kanukeŋ,

²⁶ tetere italauni ŋes, kedau aitesegaar kailotar kakipi toma akirot,

²⁷ tetere ijaikini ŋes elopet ekanisa lokaibuses, komamei akemer, karaida asukokinet, karaida ibore kere yenikoni nen, konye korai lokalaunan, loemamei aitoronet,

²⁸Kwape kwaŋin da ibusakinit ikiliok aminenena aŋorokec kwape awatekec kikulepek. Loemina akeberu eminakina bon.

²⁹Naarai emamei etuŋanan loelait akekuan elopet, konye itani ka aricit, kwape Kristo da iswamakinitor ekanisa,

³⁰ naarai kirai atutubeta nuka akuanake.

³¹ “Kanuka ŋun ŋes inyeinia etuŋanan papake ka totoke da, kirotakinos kakeberu, kes da iarei eraunos adiopekuan.”

³² Epol aiyeiyea ŋin, konye enera nuka Kristo ka ekanisa.

³³Konye ŋolituŋanan kayesi kominenena akeberu, kwape eminar bon, koyoŋitenenei aberu da okilenike.