Read Ateso Ipilipin 1 Bible Online

Ipilipin 1 - Ateso bible

Ipilipin 1

¹ Paul ka Timoteo, ibulesin luka Kristo Yesu, Mama ejaas lukalaunak kere lukotoma Kristo Yesu luejaas Pilipi, nepepe kikaanyanarak ka ikejaanakinak;

² Asianut kojai mama ijaas ka ainapakin nuepote kama ejai Edeke Papawok ka Ejakait Yesu Kristo.

³ Emalaenenei Ekadeke nakeitununoo yes,

⁴nakelipanakinia yes kere tir, eŋaiŋaenenei kaiyalama,

⁵kanuka eidicanekus aisilosikin Akiro Nukajokak ameun kapaaran nasodit kiton kwana.

⁶ Eoŋ da etogogoŋit ebe ŋol loabu kogeu aswam naejok kotomakus, itodoli kiton apaaran naka Yesu Kristo,

⁷kwape eraar naedolit eoŋ aomit ŋin kanukus kere, naarai ijaas yesi otauka, naarai iraas yesi kere luidicakina keoŋ kotoma asianut, kotoma aenioka, ka aiyar kaitogogoŋ da Akiro Nukajokak.

⁸ Naarai erai Edeke ekajenanika, kwape kemuitor yes kere kotoma otau loka Kristo Yesu.

⁹Na da ŋes ailipasitika ebe, kiyatanakin akusimin ailapanar kotoma aijen ka amisiikin kere,

¹⁰ tetere icamunete nuejok, iraunos luliogot, komamei aitoronet kiton apaaran naka Kristo,

¹¹ kilelebi araito nuka adolit nuepote kama ejai Yesu Kristo kanuka aibuses ka aitopoloorio naka Edeke.

¹² Konye iinacan, akoto yes ajenun ebe nukadoikinete apotu kisilosikis Akiro Nukajokak,

¹³ kiton akaenio atakanun ebe ejai kotoma Kristo, kokidiŋ oserikalei kere, ka ice da kere;

¹⁴luipu da luka iinacan agogonoros kotoma Ejakait kanuka aenioka, etitiŋikinete aitelekarit einer akirot naka Edeke komam ekuriaka.

¹⁵Elimonokinete ice Kristo kanuka ekokote ka epeget, konye ice ketau kaloejok,

¹⁶Elimonokinete lu kanuka amin, kojenete kwape kebwaikinere ne kanuka aiyar naka Akiro Nukajokak,

¹⁷konye kwi elimonokinete Kristo kanuka aŋolopa, mere kotoma abeit, koomito aitican eoŋ kotoma aenioka.

¹⁸ Aso anyoika bo? Dimarai kotoma oponesio kere, arai kotoma ojose, arai kotoma abeit, elimonokinio Kristo; ido alelakinit ŋin.

¹⁹ Eebo, alelakini do. Naarai ajeni ebe kainunete eoŋ ŋun aitajario kanuka ainainakus ka ainakinio naka Emoyo loka Yesu Kristo,

²⁰ kwape emielar noi kamuno da ebe mam kerumete ileic kakirot kere, dimarai katitiŋ kere, kwana, kwape kapaarasia kere, kitopolooroi Kristo kotoma akuanaka, arai kotoma aijar, arai bo kotoma atwanare.

²¹ Naarai kamakaŋ aijar ŋes Kristo, atwanare da erai ameda.

²² Konye arai aijar toma akuan ŋes araito naka aswam kamakaŋ, aso mam ajeni nuaseuni.

²³ Karidakinito akiro ŋun aarei, emiela alosit ajaut ka Kristo, naarai ŋes ejok aitelekarit.

²⁴Konye asalit toma akuan ibusakinit aitelekarit kanukus,

²⁵Ido naarai etogogoŋit kwaŋin, ajeni ebe asali, ido asalenenei nepepe kayes kere, tetere iyatanakinos yesi kaiyalama kotoma aiyuun,

²⁶tetere ilapar akusiwolobobot kanukaŋ kotoma Kristo Yesu, kanuka ajaun kayes bobo.

²⁷ Konye ejautenekus korai loibusakinit Akiro Nukajokak nuka Kristo, tetere arai abuni aanyun yes, arai bo amamei, apupuni nukus ebe icasitos kotoma omoyo ediopet, iutas nepepe, ketau ediopet kanuka aiyuun naka Akiro Nukajokak,

²⁸kwabo mam ikuriaka lukasurupokus kotoma akirot kere. Kowaikec ŋes aanyunet naka aolior, konye kowaikus ŋes aanyunet naka aitajario, naebuni kama ejai Edeke.

²⁹Naarai kiinakinitai yes, kanuka Kristo, mere bon aiyuun ŋes, dimarai aisiriebio da kanukeŋ,

³⁰ kojaas kauta kaŋin nakianyunete kotomakaŋ, ido naipupete kwana ejai tomakaŋ.