Read Ateso Ipilipin 4 Bible Online

Ipilipin 4 - Ateso bible

Ipilipin 4

¹ Aso iinacanaka luminan, lukemuit da, akaiyalama ka akaboko da, kobwaata kwaŋin kicasito kotoma Ejakait, luminan,

²Eŋaiŋait Euodia, eŋaiŋait da Suntuke, kojaas kaomit adiopet, kotoma Ejakait.

³ Eebo, kelipit jo da, ekiŋariŋaret ajookot lokabeit, kiŋarak aŋor ŋun, nuetaaritos nenipe keoŋ toma Akiro Nukajokak, ka Kelement da, ka ikeswamak ice da lukaupaka, luejaas ikiroriakec toma oitabo loka aijar.

⁴ Kiyalamas kotoma Ejakait apaarasia kere; abala bobo ebe kiyalamas.

⁵ Kojenun akusiiyapaara kotuŋa kere. Eapie Ejakait.

⁶ Siriyaloŋoŋoete akirot kere, konye kotoma akiro kere toma ailip ka aiŋaiŋa nepepe kaimal, kitejenut Edeke nuikotosi.

⁷ Ainapakin da naka Edeke naedeparit ajenun kere, kidarenenei itauonokus ka aomisiokus kotoma Kristo Yesu.

⁸ Nuesalito iinacan, nueraas nukabeit kere, nuibusakinito kere, nuedolito kere, nukalaunak kere, nutemela kere, nuisupete kere, arai ejai ajokis kere, ido arai ejai aiturit, koomoomoete ŋun.

⁹ Akiro da nuipotu kisisiata kamakaŋ, kodumutu da, kopuputu da, koanyutu da kamakaŋ, kiswamaenenete ŋun; ejaenena da Edeke loka ainapakin kayes.

¹⁰Konye eyalama noi kotoma Ejakait, naarai kwana atubor apak ekwarutu da akusiwomisio kanukaŋ, kwabo ipotu koomitos ŋun konye kemamei yes apak.

¹¹ Mere ebe enera kanuka eipud; naarai abu kesisia adauna kwape ajaar kere.

¹² Ajeni aitisilio, ajeni da alitoro; kaŋinikirot, ido kotoma akiro kere, ketuutooritai aiyeiyea naka aimonikin ka ariebo eteŋei da, alitoro ka aiŋonara da.

¹³ Apedorit kere kotoma kaŋol kaloketogogoni.

¹⁴Konye ipotu kiswamata ejok naimorikikinotor kaiticaniokaŋ.

¹⁵ Ijenete yesi da Ipilipin ebe, kotoma ageunet naka Akiro Nukajokak, naanyounio koMakedonia, amamei ekanisa loemorikikina keoŋ kotoma akirot naka aikor ka aijaun, dimarai yes bonik,

¹⁶ naarai koSesalonika da ipotu kijukakis eoŋ irwan atipet ka nakiareit kanuka eipudika.

¹⁷ Mere naarai amoot ainakinet, konye amoot araito nuiyatanakinos otiaikus.

¹⁸ Konye ajai kiboro kere, alitoro da; etekoro, kadau aijaun lukijukunete kama ka Epapurodito, aures naeuru maa, asubanit naecamunitai naitojokit Edeke.

¹⁹Ekadeke da itekori luipudasi kere kwape ejaar akebar kotoma aibuses toma Kristo Yesu.

²⁰Kojai aibuses mama ejai Edeke Papawok ikar ka ikar. Amen.

²¹Kiyogaete ŋinikalaunan kere kotoma Kristo Yesu. Kiyogaete yes iinacan luejaas keoŋ.

²² Kiyogaete yes lukalaunak kere, aitelekarit ŋul lukokal loka Kaisar.

²³Asianut naka Ejakait Yesu Kristo kojai kimoyonokus.