Read Ateso 1 Isesalonikan 3 Bible Online

1 Isesalonikan 3 - Ateso bible

1 Isesalonikan 3

¹ Kanuka ŋun namam bobo kipedoria atitiŋikin, kipou ketojokata ainyeinio bon ko Asene,

² kejukas Timoteo onacekosi ido ekejaanakinan loka Edeke toma Akiro Nukajokak nuka Kristo, tetere iticasi yes ka uitalakar da kotoma aiyuunikus,

³ kinyek ituŋanan kere airiaŋiriaŋa kotoma aiticanio kana. Naarai ijenete yesi ebe kitebeitai ŋin.

⁴ Naarai nakijaar kayes, kipou kekwenyasi yes ebe kidumuni aiticanio; kwape kedounio da, ido kwape ijeniata.

⁵ Kanuka ŋun namam bobo apedoria atitiŋikin, abu kejuk kasodi ajenun aiyuunikus, kinyek ekacodan acodun yes, aitaaritoikosi da koraun natitai.

⁶ Konye kwana naadolunio Timoteo mamakosi ebuni kamakus, abu koinu sio akiro nukajokak nuka aiyuunikus ka aminakus, ebe da kiitununete yesi sio ejok apaarasia kere, kimuito aanyun sio, kwape sio da yes,—

⁷ kanuka ŋun, iinacan, kitalakaritai kanukus kotoma aridakiniokos kere ka aiticanio, kanuka aiyuunikus,

⁸naarai kwana kijari arai ibwoete yesi icasito kotoma Ejakait.

⁹Naarai aimal anyoin kipedori atacakin Edeke kanukus, kanuka aiyalama kere nakiyalamar kanukus kakonyen nuka Edekewok,

¹⁰kidunyakinit ailip akuare ka apaaran da ebe kaanyut akusikonyen, ka aitemonokin nuiŋoŋara kotoma aiyuunikus?

¹¹ Konye Edeke elopet Papawok ka Ejakaitiwok Yesu kiteten ekosirot aponare mamakus;

¹²Ejakait da koinak yes aiyatanakin ka aidilakin aminanar bonik, ka ituŋa kere, kwape sio da kiminar yes,

¹³ tetere kiticat ikusitauon koraas Iuemamei aitoronet kotoma alaunit kakonyen nuka Edeke Papawok, naebunio Ejakaitiwok Yesu nepepe kalukalaunakake kere.