Read Ateso Yosua 13 Bible Online

Yosua 13 - Ateso bible

Yosua 13

¹ Amojoŋit Yosua kokokosanite noi; kotema EJAKAIT ŋes atiar, “Imojoŋit ijo ikokosanit da noi, konye ideuna akwap naepol nakiruma.

² Na ŋes akwap naeroko ideuna: akwap kere naka Ipilisitian ka Igesurin kere;

³ Ageun koSikor, loejai kiŋaren naka Misiri, kiton oikor loka Ekuron kari naka agolitomei, loemarakinitai oKanaanin: ijaka ikany luka Ipilisitian; Igasin, ka Isudodain, ka Isikelonain, ka Igitin, ka Iyekuronin; luka Abim da.

⁴ Kari naka eŋalakimak: akwap kere naka Ikanaanin, ka Meara loerai loka Isidonin, kiton Apek, kiton oikor loka Imorain:

⁵ Akwap da naka Igebalin, ka Lebanon kere, kama eŋiunia akoloŋ, ageun koBaal-gad kwap kemoru Kerumon kiton neelomarere Kamat:

⁶ Luiboiete kere kakwap nakiukon ageun koLebanon kiton Misirepot-maim, kes Isidonin kere; ereŋeari eoŋ ŋul kakonyen nuka idwe luka Isirael: konye kokorak ijo idwe luka Isirael akwap ŋin araun airumet, kwape kecorakinia jo.

⁷Aso kokorak akwap na araun airumet naka atekerin akanykaoŋon, ka atutubet naka ateker naka Manase.”

⁸ Apotu Ireubenin ka Igadin kodumut airumetekec nepepe kaŋes, naabu Musa koinak kes kokekwa loka Yorodan kari nakokide, kwape ainakinia Musa ekejaanakinan loka EJAKAIT kes;

⁹ Ageun koAroer, loejai osiep loka aditot naka Arunon, ka ere loejai kidiŋ aditot, ka apuuton kere naka Medeba kiton Dibon;

¹⁰ka ireria kere luka Sikon ekabaka loka Imorain, loayait Kesibon, kiton oikor loka idwe luka Amon;

¹¹ ka Gilead, ka eikor loka Igesurin ka Imaakatin, ka moru Kerumon kere, ka Basan kere kiton Saleca;

¹² Ajakanut kere naka Og koBasan, loayait Asitarot ka Ederei (ŋopeŋol loedeuna loka luedeuna luka Irepaim); naarai abu Musa kodany ŋul, kireŋea da.

¹³Konye mam idwe luka Isirael apotu kireŋeasi Igesurin, karaida Imaakatin: konye apotu Gesur ka Maakat kiboikinos kidiŋ kIsirael, kiton lolo.

¹⁴ Ateker naka Lebi bon ŋes mam ŋes abu koinak airumet; ainakineta nueinakinere kakim nuka EJAKAIT Edeke loka Isirael, kes airumeteke, kwape abu kolimokinia Ŋes.

¹⁵Koinak Musa ateker naka idwe luka Reuben kwape ejaatar ikekiakec.

¹⁶ Ageunit eikorukec koAroer, loejai osiep loka aditot naka Arunon, ka ere loejai kidiŋ aditot, ka apuuton kere naka Medeba;

¹⁷Kesibon, ka ireriake kere luejaas apuuton; Dibon, ka Bamot-baal, ka Bet-baal-meon;

¹⁸ Ka Yakas, ka Kedemot, ka Mepaat;

¹⁹ ka Kiriataim ka Sibima, ka Seret-sakar komoru loka aditot;

²⁰ka Bet-peor, ka neijululuoro Pisiga, ka Bet-yesimot;

²¹ ka ireria kere luka apuuton, ka ajakanut kere naka Sikon, ekabaka loka Imorain, loayait Kesibon, loabu Musa kodany nepepe kijaka luka Midian, Ebi, ka Rekem, ka Sur, ka Kur, ka Reba, ikapolok luka Sikon, lueboiete kakwap.

²² Apotu idwe luka Isirael koarata Balaam da okoku loka Beor, ekadwaran, kotoma kaŋul luaponi koarai.

²³Arai Yorodan eikor loka idwe luka Reuben, ka eikoruke. Ŋin ŋes airumet naka idwe luka Reuben kwape ejaatar ikekiakec, ireriakec lukapolok ka ludidik da.

²⁴Koinak Musa ateker naka Gad, kes idwe luka Gad, kwape ejaatar ikekiakec.

²⁵ Arai Yaser eikorukec, ka ireria kere luka Gilead, ka atutubet naka akwap naka idwe luka Amon, kiton Aroer loitei Raba;

²⁶Ageun koKesibon kiton Ramat-misipe, ka Betonim; ageun da koMakanaim kiton oikor loka Debir;

²⁷ Kaditot da, Bet-karam, ka Bet-nimura, ka Sukot, ka Sapon, ka ajakanut kere naedeuna naka Sikon ekabaka loka Kesibon, Yorodan ka eikoruke, kiton osaŋe loka aŋolol naka Kinerot, okekwa loka Yorodan kokide.

²⁸Ŋin ŋes airumet naka idwe luka Gad kwape ejaatar ikekiakec, ireriakec lukapolok ka ludidik.

²⁹Koinak Musa atutubet naka ateker naka Manase airumet: arai naka atutubet naka ateker naka Manase kwape ejaatar ikekiakec.

³⁰ Ageunit eikorukec koMakanaim, Basan kere, ajakanut kere naka Og ekabaka loka Basan, ka ireria kere luka Yair, luejaas Basan, ireria akaisakanykape:

³¹ ka atutubet naka Gilead, ka Asitarot, ka Ederei, ireria luka ajakanut naka Og koBasan, araas luka idwe luka Makir okoku loka Manese, kes atutubet naka idwe luka Makir kwape ejaatar ikekiakec.

³²Ŋun kes airumeta nuakorokoroi Musa kapuutona nuka Moab kokekwa loka Yorodan koYeriko, kokide.

³³ Konye mam Musa abu koinak ateker naka Lebi airumet: EJAKAIT, Edeke loka Isirael, ŋes airumetekec, kwape abu kolimokinia kes.