Read Ateso Yosua 14 Bible Online

Yosua 14 - Ateso bible

Yosua 14

¹ Nu kes airumeta nuerumete idwe luka Isirael kakwap naka Kanaan, nuakorokoroete Eleasar esasedoti, ka Yosua okoku loka Nun, ka ikapolok luka ikalia luka lukapapaakec luka atekerin nuka idwe luka Isirael.

² Kwape ajaar ailamilam eroet kanuka airumetakec, kwape ecorakinitor EJAKAIT kama ka Musa, kanuka atekerin akanykaoŋon, ka atutubet naka ateker.

³ Naarai abu Musa koinak atekerin aarei ka atutubet naka ateker airumet kokekwa loka Yorodan: konye mam abu koinak Ilebin airumet kotomakec.

⁴ Naarai araas idwe luka Yosep atekerin aarei, Manase ka Epuraim: mam apotu koinakis Ilebin akorakinet kakwap dimarai ireria luiboioto, ka ironyiakec kanuka ibarenekec ka iborokec.

⁵ Kwape ecorakinitor EJAKAIT Musa, kiswamata idwe luka Isirael kwaŋin, kokorokorata akwap.

⁶ Kosodete idwe luka Yuda aikunyakin mama ajai Yosua Giligal: kotema Kaleb okoku loka Yepune Ekenisit ŋes atiar, “Ijeni ijo akirot naabu EJAKAIT kolimok Musa etuŋanan loka Edeke nakalimitor eoŋ ka jo koKades-barunea.

⁷ Kolo arai eoŋ loka ikar akaisaoŋon nakejukaria Musa ekejaanakinan loka EJAKAIT eoŋ anyoun koKades-barunea airot akwap; kasodi ainun ŋes akirot kwape ajaar otauka.

⁸ Konye apotu ikainacan lukiupara keoŋ kipirisiasi itauon luka ituŋa; konye abu eoŋ katup cut EJAKAIT Ekadeke.

⁹ Kiyapoik Musa kapaaran kaŋin ebe, ‘Abeit akwap naecak akonikeju eraun airumetekon ka naka idwekon ikar kere, naarai itup cut EJAKAIT Ekadeke.’

¹⁰ Ido koany, ketubut EJAKAIT eoŋ, kwape abu kolimunio, ikar lu akaisaoŋon ka lukany, ameun kapak naalimokinia EJAKAIT Musa akirot ŋin, kirim Isirael kamodiŋ: aso koany, arai lolo eoŋ loka ikar akaisakanykauni ka lukany.

¹¹ Konye aroko lolo agogoŋ kwape ajaar akagogoŋ kapak kaya, ejai akagogoŋ kwape kwaŋin kwana, kanuka ejie, alomar ka alomun da.

¹² Aso do koinakinai eoŋ eroŋat lo, loenerar EJAKAIT kapaaran kaya; naarai ibu kopup kapaaran kaya ebe ajaas luka Anakim ŋina, ka ireria lukapolok luabwaitai; arai ejaun EJAKAIT keoŋ, ereŋeari kes, kwape abu EJAKAIT kolimunio.”

¹³ Kilipak Yosua ŋes arereŋ; koinak Kaleb okoku loka Yepune Keburon araun airumet.

¹⁴Koraun do Keburon airumet naka Kaleb okoku loka Yepune Ekenisit, kiton lolo; naarai abu kotup cut EJAKAIT, Edeke loka Isirael.

¹⁵ Arai sek ekiror loka Keburon Kiriat-araba; Araba ŋol arai lokapolon kama ejaas luka Anakim. Kiyeŋu akwap ejie.