Read Ateso Yosua 21 Bible Online

Yosua 21 - Ateso bible

Yosua 21

¹ Kosodete ikapolok luka ikalia luka lukapapaa luka Ilebin aikunyakin mama ejai Eleasar esasedoti, ka Yosua okoku loka Nun, ka ikapolok luka ikalia luka lukapapaa luka atekerin nuka idwe luka Isirael;

² Kotemasi kes koSilo kakwap naka Kanaan atiar, “Abu EJAKAIT kicorak kama ka Musa ainakin sio ireria lukiboionono, ka ironyiakec kanuka ibarenekosi.”

³Apotu idwe luka Isirael koinakisi Ilebin ireria lu ka ironyiakec kotoma airumetekec, kwape ajaar aicorakinet naka EJAKAIT.

⁴ Kobeik eroet ikekia luka Ikokatin: kobeik eroet idwe luka Aaron esasedoti, luaraas Ilebin, kotoma ateker naka Yuda, ka ateker naka Isimeonin, ka ateker naka Benyamin, ireria itomon ka luuni.

⁵Kobeik eroet idwe luka luedeuna luka Kokat kotoma okekia luka ateker naka Epuraim, ka ateker naka Dan, ka atutubet naka ateker naka Manase, ireria itomon.

⁶Kobeik eroet idwe luka Gereson kotoma okekia luka ateker naka Isakar, ka ateker naka Aser, ka ateker naka Naputali, ka atutubet naka ateker naka Manase koBasan, ireria itomon ka luuni.

⁷Kodumut idwe luka Merari kwape ajaatar ikekiakec kotoma ateker naka Reuben, ka ateker naka Gad, ka ateker naka Sebulun, ireria itomon ka luarei.

⁸ Koinakis idwe luka Isirael Ilebin ireria ŋul ka ironyiakec kailamilam eroet, kwape ecorakinitor EJAKAIT kama ka Musa.

⁹Koinakis kotoma ateker naka idwe luka Yuda, ka ateker naka idwe luka Simeon, ireria lu luebilitai kane ikecekiroria.

¹⁰Koraas luka idwe luka Aaron, luka ikekia luka Ikokatin, luaraas luka idwe luka Lebi: naarai abu eroet losodit kobeik kes.

¹¹ Apotu koinakis kes Kiriat-araba, Araba ŋol ŋes papa loka Anak, (ŋopeŋol ŋes Keburon) kakwap nakiukon naka Yuda, ka ironyiake lualukunito.

¹² Konye imanikoria luka ere ka ireriake ludidik, apotu kesi koinakis Kaleb okoku loka Yepune airum.

¹³ Apotu koinakis idwe luka Aaron esasedoti Keburon ka ironyiake, ere loekuianari ikaaran, ka Libuna ka ironyiake;

¹⁴ ka Yatir ka ironyiake, ka Esitemoa ka ironyiake;

¹⁵ ka Kolon ka ironyiake, ka Debir ka ironyiake;

¹⁶ ka Ain ka ironyiake, ka Yuta ka ironyiake, ka Bet-semes ka ironyiake, ireria ikanykaoŋon kotoma atekerin ŋun nuarei.

¹⁷ Kotoma ateker naka Benyamin, Gibeon ka ironyiake, Geba ka ironyiake;

¹⁸ Anatot ka ironyiake, ka Alumon ka ironyiake; ireria iwoŋon.

¹⁹Ireria kere luka idwe luka Aaron, isasedotin, emwaasi itomon ka luuni ka ironyiakec.

²⁰ Apotu ikekia luka idwe luka Kokat, Ilebin, kes idwe kere luedeuna luka Kokat, kodumut ireria luka eroetekec kotoma ateker naka Epuraim.

²¹ Apotu koinakis kes Sekem ka ironyiake kakwap nakiukon naka Epuraim, ere loekuianari ikaaran, ka Geser ka ironyiake;

²²ka Kibisaim ka ironyiake; ka Bet-koron ka ironyiake; ireria iwoŋon.

²³Kotoma ateker naka Dan, Eliteke ka ironyiake, Gibeton ka ironyiake;

²⁴Aiyalon ka ironyiake, Gat-rimon ka ironyiake; ireria iwoŋon.

²⁵Kotoma atutubet naka ateker naka Manase, Taanak ka ironyiake, ka Gat-rimon ka ironyiake; ireria iarei.

²⁶Ireria kere luka ikekia luka idwe kere luedeuna luka Kokat emwaasi itomon ka ironyiakec.

²⁷ Apotu koinakis idwe luka Gereson, loka ikekia luka Ilebin, kotoma atutubet naka ateker naka Manase, Golan koBasan ka ironyiake, ere loekuianari ikaaran, ka Be-esetera ka ironyiake; ireria iarei.

²⁸Kotoma ateker naka Isakar, Kision ka ironyiake, Daberat ka ironyiake.

²⁹Yaramut ka ironyiake; En-ganim ka ironyiake; ireria iwoŋon.

³⁰Kotoma ateker naka Aser, Misal ka ironyiake, Abudon ka ironyiake;

³¹Kelekat ka ironyiake; ka Rekob ka ironyiake; ireria iwoŋon.

³² Kotoma ateker naka Naputali, Kedes koGalilaya ka ironyiake, ere loekuianari ikaaran, ka Kamot-dor ka ironyiake, ka Karutan ka ironyiake; ireria iuni.

³³Ireria kere luka Igeresonin kwape ajaatar ikekiakec emwaasi ireria itomon ka luuni ka ironyiakec.

³⁴ Apotu koinakis ikekia luka idwe luka Merari, luedeuna luka Ilebin, kotoma ateker naka Sebulun, Yokoneam ka ironyiake, ka Karuta ka ironyiake.

³⁵Dimuna ka ironyiake, Nakalal ka ironyiake; ireria iwoŋon.

³⁶Kotoma ateker naka Reuben, Beser ka ironyiake, ka Yakas ka ironyiake;

³⁷Kedemot ka ironyiake, ka Mepaat ka ironyiake, ireria iwoŋon.

³⁸ Kotoma ateker naka Gad, Ramot koGilead ka ironyiake, ere loekuianari ikaaran, ka Makanaim ka ironyiake;

³⁹Kesibon ka ironyiake, Yaser ka ironyiake, ireria kere iwoŋon.

⁴⁰Ŋul kere araas ireria luka idwe luka Merari kwape ajaatar ikekiakec, kes luedeuna luka ikekia luka Ilebin; kobeikis kes ireria itomon ka luarei.

⁴¹ Ireria kere luka Ilebin kotoma airumeta nuka idwe luka Isirael emwaasi ireria akaisaoŋon ka lukanykauni ka ironyiakec.

⁴²Alukunito ireria ŋul ironyiakec: ekote nen ireria ŋul kere.

⁴³ Kwaŋin koinak EJAKAIT Isirael akwap kere naeyapoikinit ainakin lukapapaakec: apotu kiruma ŋes, kiboioto kotoma.

⁴⁴ Kisiyeŋ EJAKAIT kes kowaitin kere, kwape ajaatar kere nueyapoikinit lukapapaakec: mam edio kalukasurupokec kere loabu kobwoik kes; abu EJAKAIT kijaik lukasurupokec kere akanikec.

⁴⁵ Emamei akirot namam abu kodol kakiro nuejok nuabu EJAKAIT kolimokinite ekek loka Isirael; apotu kere kodoloto.