Read Ateso Yosua 22 Bible Online

Yosua 22 - Ateso bible

Yosua 22

¹Kosodi Yosua anyaraun Ireubenin ka Igadin ka atutubet naka ateker naka Manase.

² Kotema kes atiar, “Ipotu kidarata kere nuabu Musa ekejaanakinan loka EJAKAIT kicorak yes, ipupoto da ekaporoto kotoma kere nuabu kecorak yes:

³Mam ijalakinito ikusiinacan kapaarasia kanu nuipu, kiton lolo, konye ipotu kidarata akirot naka aicorakinet naka EJAKAIT Ekusideke.

⁴ Kwana esiyeŋu EJAKAIT Ekusideke ikusiinacan, kwape alimokinitor kes: aso do, koboŋosi, koloto owemanakus, akwap nairumito yesi, naabu Musa ekejaanakinan loka EJAKAIT koinak yes kokekwa loka Yorodan.

⁵ Konye kocoito kojokan aiswamaenen aicorakinet ka ekisil, loabu Musa ekejaanakinan loka EJAKAIT kicorak yes, aminenen EJAKAIT Ekusideke, alosenen korotinike kere, aidar aicorakinetake kere, ka aimorikikin kaŋes, ka aijaanakin ŋes kikusitauon kere ka akusiijar kere.”

⁶ Kwaŋin abu Yosua kilipak kes arereŋ, kotwar kes: koloto owemanakec.

⁷ Abu Musa koinakinite atutubet naka ateker naka Manase airumet koBasan: konye abu Yosua koinak nacetutubet kama ejaas iinacanakec kokekwa loka Yorodan kari nakoto.

⁸ Kotema kes atiar, “Koboŋosi kabar naepol owemanakus, ka ibaren luipu noi, ka epuesa, ka esabu, ka aisinit, ka asua, ka igoen luipu noi: komorata kikusiinacan luŋatuna kaneejaas lukasurupokus.”

⁹ Koboŋosi idwe luka Reuben, ka idwe luka Gad, ka atutubet naka ateker naka Manase, konyout koSilo loejai akwap naka Kanaan neejaas idwe luka Isirael, alosit akwap naka Gilead, akwap naka airumetekec, naerumito kesi, kwape ajaar aicorakinet naka EJAKAIT kama ka Musa.

¹⁰Kedoloto kesi akwap naidunyas ka Yorodan, naejai akwap naka Kanaan, apotu idwe luka Reuben ka idwe luka Gad ka atutubet naka ateker naka Manase kodukoto etem ariri naka Yorodan, etem loepol noi loetakani.

¹¹ Kopuput idwe luka Isirael ebakai ebe, “Koany, apotu idwe luka Reuben, ka idwe luka Gad, ka atutubet naka ateker naka Manase kodukoto etem loiteos kakwap naka Kanaan, kotoma akwap naidunyas Yorodan, kowai loerai loka idwe luka Isirael.”

¹² Kepuput idwe luka Isirael ŋun, kotukokin ekodet kere loka idwe luka Isirael Silo, alosit aitiji kes.

¹³ Kijukasi idwe luka Isirael Pinekas okoku loka Eleasar esasedoti mama ejaas idwe luka Reuben ka idwe luka Gad ka atutubet naka ateker naka Manase, akwap naka Gilead;

¹⁴ Kijukasi nepepe kaŋes ikapolok itomon, ekapolon ediopet loka ekal loka lukapapaa loka ŋiniteker naka Isirael; arai ŋinituŋanan kakesi ekapolon loka ikalia luka lukapapaakec kolukumin luka Isirael.

¹⁵Kodoloto mama ejaas idwe luka Reuben, ka idwe luka Gad, ka atutubet naka ateker naka Manase, akwap naka Gilead, kotemasi kes atiar,

¹⁶ “Inera kwanata ekodet kere loka EJAKAIT ebe, ‘Naanyoin aibucaret na naibucasi yesi kaneejai Edeke loka Isirael, aibelokin lolo ainyein atupit EJAKAIT, naarai idukut etem, aipaliikin lolo EJAKAIT?’

¹⁷ Kikidiokikinito kereka oni numam adolit nuka Peor, nueriŋa oni kitalauna kiton lolo, karaida kejauna atular okodet loka EJAKAIT.

¹⁸ Yes aibelokin lolo ainyein atupit EJAKAIT? Kosodi do kanu naarai ipaliikis yesi EJAKAIT lolo, enyunyurikini do ŋesi moi ekodet kere loka Isirael.

¹⁹ Aso do, arai mam akwap naka airumetekus elai, kodokasi yesi akwap naka airumet naka EJAKAIT, neiboio ewema lokalaunan loka EJAKAIT, kirumata nepepe kasio; konye sirikipaliikis EJAKAIT, karaida aipaliikin sio, adukun etem loegelara ketem loka EJAKAIT Ewokodeke.

²⁰ Mere abu Akan okoku loka Sera kibuca koboro luetateleoritai, kobunok anyunyura ekodet kere loka Isirael? Mam etuŋanan ŋol abu kotwana bon kotoma numam adoliteke.”

²¹ Kosodete idwe luka Reuben, ka idwe luka Gad, ka atutubet naka ateker naka Manase aboŋokin, kotemasi kesi ikapolok luka ilukumin luka Isirael atiar,

²² “EJAKAIT, Edeke loka idekesio, EJAKAIT, Edeke loka idekesio, ŋes ejeni, Isirael da ejenuni; arai kanuka epali, arai kanuka aibucaret mama ejai EJAKAIT, (siri jo kiitajar sio lolo.)

²³ Kidukunio isio etem aibelokin ainyein atupit EJAKAIT; arai ainakin kanen ainakinet naicweio, arai ainakinet naka akiria, arai ainakin asuban nuka ainakineta nuka ainapakin kanen, kitepesen EJAKAIT elopet;

²⁴Arai mam sio kiswamat ŋun kaiyaparit, kaomitos ebe, Kapaarasia nuepote epedorete ikusidwe atemar ikosidwe atiar, ‘Inyo bo ejai yes ka EJAKAIT, Edeke loka Isirael?

²⁵Naarai etuluo EJAKAIT Yorodan eikorukosi kayes, yes idwe luka Reuben ka idwe luka Gad; emamei yes akorakinet kaneejai EJAKAIT:’ kwaŋin isimikete ikusidwe ikosidwe ayoŋit EJAKAIT.

²⁶Ŋes kitemaria ebe, ‘Ketemokinos oni aiduk etem, mere kanuka ainakinia ainakinet naicweio, karaida asubanit:

²⁷ Konye eraun ekajenan mamakosi kayes, mama ejaas aturiowok nukitupanakinete, tetere kijaanakini kakonyen nuka EJAKAIT kainakinetawok nuicweio ka asubanawok, ka ainakinetawok nuka ainapakin; tetere mam ikusidwe etemarete ikosidwe kapaarasia nuepote atiar, “Emamei yes akorakinet kama ejai EJAKAIT.” ’

²⁸Ŋes kitemaria ebe, ejaun do ebe naetemariata sio arai aturiokosi kwaŋin kapaarasia nuepote, kitemari do isio ebe, ‘Koany aput naka etem loka EJAKAIT, loadukunete lukapapaakosi, mere kanuka ainakinia ainakinet naicweio, karaida asubanit; konye erai ekajenan mamakosi kayes.’

²⁹ Madi akuj, arai kiipaliiki isio EJAKAIT, aibelokin lolo ainyein atupit EJAKAIT, aiduk etem ainakinia ainakinet naicweio, ka ainakinet naka akiria, arai asubanit, kogelara kaneejai etem loka EJAKAIT Ewokodeke loejai owemake lokalaunan.”

³⁰Kepupu Pinekas esasedoti, ka ikapolok luka ekodet, kes ikapolok luka ilukumin luka Isirael luajaas kaŋes, akiro nuapotu idwe luka Reuben, ka idwe luka Gad, ka idwe luka Manase kinerata, apotu kesi kitojokata noi.

³¹ Kotema Pinekas okoku loka Eleasar esasedoti idwe luka Reuben, ka idwe luka Gad, ka idwe luka Manase atiar, “Kijeni lolo ebe ejai EJAKAIT kidiŋiwok, naarai mam yes ibucarito aibucaret ŋin kaneejai EJAKAIT: iyuut do yesi idwe luka Isirael kakan naka EJAKAIT.”

³²Koboŋo Pinekas okoku loka Eleasar esasedoti, ka ikapolok, kaneejaas idwe luka Reuben, ka idwe luka Gad, anyoun kakwap naka Gilead, alosit akwap naka Kanaan, mama ejaas idwe luka Isirael, kinyakakis kes akiro.

³³ Kitojokata idwe luka Isirael akirot; kituroto idwe luka Isirael Edeke, mam bobo apotu kinerata nuka alosit aitiji kes, amudiar akwap naeboiononoto idwe luka Reuben ka idwe luka Gad.

³⁴ Komaikisi idwe luka Reuben ka idwe luka Gad etem Ed,[5] naarai abakas ebe, erai ekajenan kamawok ebe EJAKAIT ŋes Edeke.