Read Ateso Yosua 3 Bible Online

Yosua 3 - Ateso bible

Yosua 3

¹ Konyou Yosua tupuruc sek, konyout koSitim, kodoloto Yorodan, ŋes ka idwe kere luka Isirael; koperoto nen eroko kedoka.

² Kosodi kanen ketuboros apaarasia auni, kitoro ijaka kidiŋ kiidukurun;

³ Kicorakis ituŋa ebe, “Naianyuniata asaduku naka aitutuket naka EJAKAIT Ekusideke, ka isasedotin Ilebin edakitos ŋes, inyounete do kaiboisiokus, kotupasi ŋes.

⁴ Konye ejaun apak kidiŋikus ka ŋes, aitemis naka ikubitin [1] ilukumin iarei: sirikikunyakis ŋes, tetere ijenunete erot lokibusakinit aitor; naarai mam ber lem yes itorito orot lo.”

⁵ Kotema Yosua ituŋa atiar, “Kitalaunos, naarai iswamai moi EJAKAIT nukaumokin kamakus.”

⁶ Kotema Yosua isasedotin atiar, “Kodakata asaduku naka aitutuket, kiŋarenikis ituŋa adokar.” Apotu kodakata asaduku naka aitutuket, kiŋarenikis ituŋa alosit.

⁷ Kotema EJAKAIT Yosua atiar, “Ageuni eoŋ lolo aitopoloor jo kakonyen nuka Isirael kere, tetere ejenunete ebe kwape ajaar kolo ka Musa, ajaikin kwape kwaŋin kajo da.

⁸Icorakini ijo isasedotin luedakito asaduku naka aitutuket ebe, ‘Naidolioto ariri kakipi nuka Yorodan, ibwoete kopalarito koYorodan.’ ”

⁹Kotema Yosua idwe kere luka Isirael atiar, “Kopotu ne, kopuput akiro nuka EJAKAIT Ekusideke.”

¹⁰ Kotema Yosua atiar, “Ijenunete kanu ebe ejai Edeke lokajaran mamakus, ebe da mam ekurwori cut aireŋear Ekanaanit, ka Ekitit, ka Ekibit, ka Eperisit, ka Egirugasit, ka Emorait, ka Eyebusit kakonyenekus.

¹¹ Koany, kiŋarenikinit yes asaduku naka aitutuket naka EJAKAIT loka akwap kere adokar Yorodan.

¹² Aso do koseutu ituŋa itomon ka luarei luka atekerin nuka Isirael, etuŋanan kanuka ŋiniteker.

¹³ Kosodi kanen, naicakiata akeje nuka isasedotin luedakito asaduku naka EJAKAIT, EJAKAIT loka akwap kere, akipi nuka Yorodan, itikorio akipi nuka Yorodan, ka neeleleununiata; esipokinos atukit adiopet.”

¹⁴ Kosodi kanen, naanyounioto ituŋa kowemanakec aidok Yorodan, apotu isasedotin luadakito asaduku naka aitutuket kiŋarenikinito ituŋa:

¹⁵ Kedoloto luadakito asaduku Yorodan, kicakata akeje nuka isasedotin luadakito asaduku akipi, (naarai ilelebunun Yorodan kiton aririke kere, apak kere naka aisak,)

¹⁶ Kosipokinos akipi nualeleunete, koraunos atukit adiopet, kaneelwana noi, koAdam, ere loidunyas ka Saretan: akipi da nueleleete aŋolol naka Araba, ŋes Aŋolol naka Abalaŋ, kitikoroi; kotuboros ituŋa kiton Yeriko.

¹⁷ Kobwaata isasedotin luadakito asaduku naka aitutuket naka EJAKAIT kaneonit, kokidiŋ Yorodan, kotubor Isirael kere kaneonit, aitodol neatuboror cut ateker kere koYorodan.