Read Ateso Yosua 9 Bible Online

Yosua 9 - Ateso bible

Yosua 9

¹ Kosodi kanen kepuput ikabakan kere luajaas okekwa loka Yorodan, akwap naka iukon, akwap naka apuutona, ka ariri kere naka aŋolol nakapolon kiŋaren naka Lebanon, Ekitit, ka Emorait, ka Ekanaanit, ka Eperisit, ka Ekibit, ka Eyebusit;

² Kotukonokinos aitiji Yosua ka Isirael ketau ediopet.

³ Konye kepuputu lueboienenete koGibeon nuabu Yosua kiswamak Yeriko ka Ai.

⁴ Kiswamata kesi da kapirianut, koloto kijoseikis bala araas ikiyakia, koyaŋaasi ipukoi lumojoŋ kasigirianakec, ka imukulen luka ebino, lumojoŋ ka luecilicila luedonyodonyo;

⁵Ka amuk numojon nuepedepedo kakejekec, konapitos inapen lumojoŋ; inyamat kere da luajaatar aokito kirourounito.

⁶ Koloto neajai Yosua Giligal oidukurun, kotemasi ŋes ka ituŋa luka Isirael atiar, “Kiponi isio kakwap naelwana: aso kitutukoto do yesi kasio.”

⁷ Kotemasi ituŋa luka Isirael Ikibin atiar, “Musiki eapie bukus kasio; kikwaikini isio ai kitutuki kayes?”

⁸ Kotemasi Yosua atiar, “Kirai isio ikonikejaanakinak.” Kotema Yosua kes atiar, “Lukaŋai yesi? Ido lali bo kiponiata?”

⁹ Kotemasi ŋes atiar, “Apote ikonikejaanakinak kakwap naelwana noi kanuka ekiror loka EJAKAIT Ekonideke: naarai kipupu eemutuke, kaŋun kere nuabu ŋesi kiswama koMisiri.

¹⁰ Kere da nuabu ŋesi kiswamak ikabakan iarei luka Imorain, luajaas okekwa loka Yorodan, Sikon ekabaka loka Kesibon, ka Og ekabaka loka Basan loajai Asitarot.

¹¹Apotu imakiokosi kere ka luiboiete kere kakwapukosi kotemasi sio atiar, ‘Koyaŋaasi inyamat luka erot, koloto airiamun kakes, kolimokis kes ebe, “Kirai isio ikonikejaanakinak: aso kitutukoto kasio.” ’

¹²Kiyaŋauni isio inyamatakosi lu komwaka kotogoikosi kapaaran nakilomunia aponare mamakus; konye kwana, koany, aokoto, erourooto da:

¹³Ka imukulen lu luka ebino luapotu kelelebata, etetiak; ido koany, ecilicila: amojoŋata ikosinapen lu ka akosimuk kanuka alosit naelwana noi.”

¹⁴ Kijaut ituŋa inyamatakec, komam iŋitunito akirot kama ejai EJAKAIT.

¹⁵ Kisumun Yosua kes ainapakin, kitutuk kakes, aitajar kes: kiyapoikis ikapolok luka ekodet kes.

¹⁶Kosodi kanen ketuboros apaarasia auni kedaut kesi aitutuk kakes, apotu kesi kopuput ebe eraas ŋul iidunyetakec, ebe da eapie bukec kakes.

¹⁷ Kolototo idwe luka Isirael, kodoloto oreriakec apaaran nakiwuniet. Ireriakec kes lu, Gibeon, ka Cepira, ka Beerot, ka Kiriat-yearim.

¹⁸ Mam apotu idwe luka Isirael kodanyata kes, naarai apotu ikapolok luka ekodet kiyapoikis kes kolimito EJAKAIT, Edeke loka Isirael. Kirurumak ekodet kere ikapolok.

¹⁹Konye kotemasi ikapolok kere ekodet kere ebe, “Kipou keyapoikis kes kalimito EJAKAIT, Edeke loka Isirael: kanuka ŋun mam kipedori atiror kes.

²⁰ Kiswamakini kes nu, ketajarata kes; kinyek anyunyura abunokin oni, kanuka aiyaposit nakipou keyapoikis kes.”

²¹ Kotemasi ikapolok kes atiar, “Ketajarata kes:” kwaŋin koraunos ikebetak akito ka ikeritok akipi nuka ekodet kere; kwape alimokinitotor ikapolok kes.

²²Konyarau Yosua kes kotema kes atiar, “Kanukinyo kimodiata sio ebe, ‘Kilwaka noi kamakus;’ kwabo kiapiete kasio?

²³ Aso kanuka ŋin kikeni yes, mam iswakete araun ibulesin, ikebetak akito ka ikeritok akipi nuka etogo loka Ekadeke.”

²⁴ Koboŋokis Yosua ebe, “Naarai aponi kolimokinai cut ikonikejaanakinak kwape ecorakinitor EJAKAIT Ekonideke ekekejaanakinan Musa ainakin yes akwap kere, ka amudiar kere luiboiete kakwap kakonyenekus; kanuka ŋun kipou kakuriakata noi kanuka aijarakosi kanukus, ŋes kiswamaa akirot ŋin.

²⁵ Aso koany, kijaa akanikon: kiswamakinai sio nuitojokit ijo nuedolit jo aiswamakin sio.”

²⁶Kiswamak ŋesi kes kwaŋin, kolaku kes kakan naka idwe luka Isirael, mam apotu koara kes.

²⁷ Kitarau Yosua kes kapaaran kaŋin ikebetak akito ka ikeritok akipi nuka ekodet, ka nuka etem loka EJAKAIT, kiton lolo, kaibois naeseuni ŋesi.