Read Ateso 1 Timoteo 2 Bible Online

1 Timoteo 2 - Ateso bible

1 Timoteo 2

¹ Aso nasodit kakere, ecori ebe kiswamaenenete aiŋaiŋa, ka ailip, ka aipur, ka aimal da, kanuka ituŋa kere,

²kanuka ikabakan ka ŋul kere luejaas apolou, tetere kijaun kaijar naitenera, naiyamakina, toma ayoŋit Edeke, ka aiyaparit kere.

³ Ejok ŋun, ido ecamunitai kakonyen nuka Edeke Eketajaraniwok,

⁴ loekot ituŋa kere aitajario, adolokin da ajenun abeit.

⁵ Naarai ejai Edeke ediopet, ejai da ekadiekan ediopet loka Edeke ka ituŋa, ŋes etuŋanan Kristo Yesu,

⁶ loabu koluŋakin araun alakunet kanuka kere, aitejenunet naejaun kapakioke.

⁷ Kebwaikinitai eoŋ araun ekalimonokinan, ekiyakia da kanuka ŋun, (enera abeit, mam eŋalai) ekesisianakinan loka Imo kotoma aiyuun ka abeit.

⁸Ŋes akotor ikiliok ailipenen kotoma ŋiniibois, koriorito akanin nukalaunak komamei anyunyura karaida aŋolopa;

⁹ kwape kwaŋin da aŋor kisirete anapito nuibusak, kaitasono ka acoit, mere kaicip itim, karaida kesabu, karaida ilulun, karaida igoen luketiai,

¹⁰ dimarai kaswamisio nuejok, kwape ibusakinitor aŋor nuelimorete ebe eyoŋito Edeke.

¹¹ Kisisia aberu kaiyamakina kanonokikinit kere.

¹² Konye mam esiikinit aberu aisisianakin, karaida ayait ekiliokit, dimarai aiyamaara.

¹³ Naarai kisiau Adam asubio, kosodi konyet Keba.

¹⁴ Bobo da mam Adam kijodijoditoi, konye Keba ejodijoditoi, kojaikin aibucar.

¹⁵Konye itajario aberu kanuka auruun idwe, arai esalete kesi toma aiyuun, ka amin, ka alaunit nepepe kacoit.