Read Ateso Pilemon 1 Bible Online

Pilemon 1 - Ateso bible

Pilemon 1

¹ Paul eenat loka Kristo Yesu, ka Timoteo onac, Mama ejai Pilemon lominat, ekeswaman da aupakosi,

² ka Apia inac, ka Arikipo ekajion aupawok, ka ekanisa da loejai orekon:

³ Asianut kojai mama ijaas ka ainapakin nuepote kama ejai Edeke Papawok, ka Ejakait Yesu Kristo da.

⁴Emalai Ekadeke apaarasia kere nakeitununio jo kailipika,

⁵kapup nuka aminakon ka aiyuun da, naejai mama ejai Ejakait Yesu, ka lukalaunak da kere.

⁶ Elipi da ebe eidicane loka aiyuunikon iswamai noi kiton ajenun cut ajokis kere naerai nawok kotoma Kristo.

⁷ Naarai abu kadum aiyalama naepol ka aitalakario da kanuka aminakon, onace, naarai ibu kisiyeŋu itauon luka lukalaunak.

⁸Kanuka ŋun karaida ajai katitiŋ naepol toma Kristo aicorakin jo naipudai,

⁹konye gwai kanuka amin, keŋaiŋait-eoŋ loekoni nen Paul ekimat, konye kwana eenat da loka Kristo Yesu,—

¹⁰ keŋaiŋait jo kanuka ikakoku, Onesimo, loaurit kotoma aenioka.

¹¹Kolo amamei ŋes ajokis mamakon, konye kwana ejai ajokis mamakon ka mamakaŋ da.

¹²Enyakuni ŋes mamakon, ŋol loerai ekatau.

¹³ Akoto ti aitasal ŋes mamakaŋ, tetere kejaanakin eoŋ kanukon kotoma aenioka kanuka Akiro Nukajokak,

¹⁴ konye mam abu kakoto aswam ibore komam jo ijeni, tetere ejaun akonijokis mere kanuka aitiŋaikin, dimarai kanuka akot.

¹⁵Diat kanuka ŋun ŋes kitiakere kajo adaun apak, tetere ijaunete kaŋes ikar kere,

¹⁶ mere bobo kwape ebulesit, konye adepar ebulesit, onac lominat, aitelekarit mamakaŋ, konye gwai itelekarit ca ma mamakon, toma akuan ido toma Ejakait da.

¹⁷Aso arai kidica keoŋ, kisukunyik ŋes kwape kisukunyikinia eoŋ.

¹⁸Arai abu kiswamak jo adioronis arai bo ejai apesen, kitepesen eoŋ ŋun.

¹⁹ Eoŋ Paul ewadikai nu kakakan elopet, atacakini eoŋ-komam alimokini jo ebe ejai jo apesen mamakaŋ, ijo ilopet obe.

²⁰Eebo, onac, akoto adumun ajokis kamakon toma Ejakait. Kisiyeŋu ekatau toma Kristo,

²¹Kewadikak jo kajai kamun naka arimanutukon, ajeni da ebe iswamai ijo adepar nuenera eoŋ.

²² Bobo da kitemokino aisipejo eoŋ, naarai amuno ebe kanuka ailipikus, kainakinia mamakus.

²³ Kiyogai jo Epapuras, ekijoreoritono aupaka toma Kristo Yesu.

²⁴ Marako da, ka Aristariko, ka Dema, ka Luka, ikeswamak lukaupaka.

²⁵Asianut naka Ejakait Yesu Kristo kojai kimoyonokus.