Read Ateso Iburanian 13 Bible Online

Iburanian 13 - Ateso bible

Iburanian 13

¹ Kojaenena amin iinacan.

² Sirikiimurwokis aisukuny ipejok, naarai kanuka ŋin apotu ice kisukunyikis imalaikan komam ejenete.

³ Kiitunito ienan, bala kienitai nepepe kakes; ka luiswamakinitai erono, naarai ijaas yesi da toma akuan.

⁴ Kitubusikis ituŋa kere adukokin, ejam da korai lomam emunaara; naarai etubokini Edeke ludotea ka lueelosi.

⁵ Kidaras kinyeis amin apesan, kodaut luijaatar; naarai abu ŋesi elopet kobala ebe, “Mam ketukurwori jo cut, karaida aijal.”

⁶ Ŋes kinerar katitiŋ ebe, “Ejakait ŋes erai ekeŋarakinanika, Mam akurianari, Inyo bo epedori ituŋanan aiswamakin eoŋ?”

⁷ Kiitunito ikeŋarenikinokokus, lukilimonokinete akirot naka Edeke; koŋicete noi esaŋe loka ejautenekec, korokosi aiyuunikec.

⁸ Erai Yesu Kristo ŋopeŋol bian ka lolo, ido kiton ikar kere.

⁹ Sirikiyananario kaisisianakin nakiponesio luipu naegelara; naarai ejok aitogogoŋ etau kasianut, kwabo mere kanuka inyamat, lumam apotu kiŋarakis ŋul lualosioto.

¹⁰ Ejai oni etem loemamei luijaanakinete ewema apedor ainyam iboroke.

¹¹ Naarai itiaŋ lueyaŋaari esasedoti lopeti aokotokec toma aibois nakalaunan kanuka adiakar, icweio awatekec kokiŋ kiidukurun.

¹² Kanuka ŋun Yesu da, abu korieba kokiŋ kerute, tetere italauni ituŋa kaokotoke elopet.

¹³ Aso kalomasi oni da mamakeŋ kiŋa kiidukurun, kebwokitos amorositike.

¹⁴ Naarai emamei oni ere loeperonori kane, konye kimoot je loekot ajaun.

¹⁵ Aso kainanakis Edeke asubanit naka aiturit tiritir kotomakeŋ, ŋes araito nuka aituke nuelimorete ekekiror.

¹⁶ Konye sirikimurwokis aswam ejok, ka aimor luijaatar, naarai itojokit Edeke asuban nuikote nen.

¹⁷ Korimarito ikeŋarenikinokokus, kononokikinito da; naarai ekwenyete ŋul kanuka aijarakus, kwape luinyakunete akirot; tetere iswamaete ŋun kaiyalama kwabo mere keidiny; naarai timam ŋin kiiŋarak yes.

¹⁸ Kilipanakinai sio, naarai kitogogoŋit ebe kija kaomisio nuejok, kikoto ajaut kiponesio luejok kotoma akiro kere.

¹⁹Ido aitelekarit noi keŋaiŋait yes aikonenen nen, tetere kenyakunio katipet mamakus.

²⁰ Konye Edeke lokainapakin, loetoboŋuni Ejakaitiwok Yesu Kristo kokatwak, ekecokon lokapolon loka amerekekin, kanuka aokot nuka aitutuket naka ikar kere,

²¹kitodolik yes kotoma kaŋinikirot naejok, tetere iswamaete nuekot ŋesi, kiswamai ŋesi da kotomakus naitojokitai kakonyeneke, kanuka Yesu Kristo; kojai aibuses mamakeŋ ikar ka ikar. Amen.

²² Konye iinacan, keŋaiŋait yes, koŋirikis akirot naicori, naarai kewadikakinit yes kanuesupaaka.

²³Kojenutu ebe alacakin onacewok Timoteo. Arai kebu ŋol katipet, kaanyuni yes nepepe kaŋes.

²⁴Kiyogaete ikeŋarenikinokokus kere, ka lukalaunak da kere. Kiyogaete yes luko Italia.

²⁵Asianut kojai kayes kere, Amen.