Read Ateso Iburanian 2 Bible Online

Iburanian 2 - Ateso bible

Iburanian 2

¹Kanuka ŋun ibusakinit oni aiyatakin noi aibwaikin itauon ŋun nukipupu, kenyeis aikaleleorio kamakec.

² Naarai arai icasit akirot nakineras imalaikan, tape eropio kadolit ŋiniibucaret ka ŋiniiulanut,

³ kikwaikini ai kikui oni arai kijali aitajario naetia nen? Abu Ejakait kogeu alimokin ŋin, kosodete lukiirarete ŋes apotu kitogogoŋoto mamawok.

⁴ Edeke da abu kitejen nepepe kakes kotoma aanyuneta ka nukaumokin, ka nukapedor nuka iponesio luegelegela, kotoma akorakineta da nuka Emoyo Lokalaunan, kwape ejaar akoteke elopet.

⁵Naarai mam einakinit Edeke akwapin nueponito nukinera, anonokikin imalaikan.

⁶ Konye ejai aibois naitejenunitor ediopet, kinera ebe, “Inyo bo etuŋanan, tape jo iitunit ŋes? Arai bo okoku loka etuŋanan, tape jo ianyanari ŋes?

⁷Ibu kosub ŋes nepetai airianakin ka imalaikan adaun apak naedit, Itanapit ŋes aboko naka aibuses ka ayoŋio, Isurumit ŋes aswamisio nuka akonikanin.

⁸ Itononokikinit iboro kere aibwaikin kwap kakejeneke.”

⁹ Konye kiseseni Yesu loaponi kosubai nepetai airianakin ka imalaikan adaun apak naedit, kanuka aiticanio naka atwanare, aponi kitanapai aboko naka aibuses ka ayoŋio, tetere kanuka asianut naka Edeke, iiri atwanare kanuka ŋinituŋanan.

¹⁰ Naarai ebusakinit ŋol, loejaas iboro kere kanukeŋ, ido loepote iboro kere kamakeŋ, naeyaunia odwe luipu toma aibuses, aitodolikin ekapeleunan loka aitajariokec kanuka aisiriebio.

¹¹ Naarai loitalauni ka luetalaunitai eraas kere luka ediopet. Kanuka ŋun ŋes mam irumiata ŋes ileic anyarit kes iinacan,

¹² kinera ebe, “Alimokini ikainacan ekonikiror, Keturenenei jo, kokidiŋ katukot.”

¹³ Bobo da ebe, “Amunoneno eoŋ ŋes.” Ido bobo ebe, “Koany, eoŋ ka idwe lukainak Edeke.”

¹⁴ Aso naarai imorikikinete idwe aokot ka awat, abu ŋesi da elopet komor kakes ejautenekec, tetere kanuka atwanareke emudiari ŋol loejai apedor naka atwanare, ŋes Satan.

¹⁵Tetere elacakini da ŋul kere lukejaas toma obulesene apaarasia kere nuka aijarakec, kanuka akurian atwanare.

¹⁶ Naarai abeit mam iŋarakinit imalaikan, dimarai iŋarakinit aur naka Aburaam.

¹⁷ Ŋes iburaa ŋes aitupusio ikeinacan kotoma kere, tetere eraun esasedoti lopeti lokaitim lomunot kotoma akiro nuejaas neejai Edeke, kanuka ailuc adiakanareta nuka ituŋa.

¹⁸ Aso naarai abu ŋesi da elopet korieba ecodunio, ŋes epedoria aiŋarakin ŋul luecodunio.