Read Ateso Iburanian 6 Bible Online

Iburanian 6 - Ateso bible

Iburanian 6

¹ Kanuka ŋun kenyeis einer akiro nusodit nuka Kristo, keyatakinos apoloor; kenyeis bobo aipet apetetait naka aitoronikin kanuka aswamisio nuetwakito, ka aiyuun Edeke,

²aisisianakin naka aibatis, ka aidokokinio akanin, ka ajarun naka lukatwak, ka atubokinio da naka ikar kere,

³Kiswamai da kwaŋin arai ekoto Edeke.

⁴ Naarai ŋul luadaut kolo ainwakakinio, kiirata da ainakinet nakakuj, luaraunos ikamorak Emoyo Lokalaunan,

⁵ kiirata da ajokis naka akirot naka Edeke, ka apedor da naka ikar luepote,

⁶mam epedorete aiteteun bobo aitoronikin arai kibiroros ainyein ŋun, naarai ebubukis bobo Okoku loka Edeke kanukec, esurumata da ileic kaitebeikin.

⁷ Naarai akwap naamat akiru naetepanakini irwan ipu, kosodi kobwaŋ akui nuibusakinito ŋul luekorionokinio, edumuni arereŋ naebuni kama ejai Edeke.

⁸ Konye arai kitolom ikukwa ka isukukur, eneritoi, ido eapie aikenio; esaŋeke aicweio.

⁹Konye luminan, karaida kinera ŋun kwaŋin, kitogogoŋ kamakus akiro nuejok adepar, ido nueraas nuka aitajario.

¹⁰ Naarai Edeke mam erai lomam edolit aimurwokin aswamukus, ka amin naipotu kitodiasi mama ejai ekirorike naijaanakiniata lukalaunak, ido kwana iroko ijaanakinete.

¹¹ Konye kiŋata noi ŋinituŋanan kayesi aitodiar adunyanut ŋipeŋin kanuka aitodolikin cut amun ŋin kiton osaŋe,

¹²kinyeis araut luijalijalasi, konye luipusete ŋul luirumete aisumuneta kanuka aiyuun ka atitiŋikin da.

¹³ Naarai naesumunio Edeke Aburaam, naarai amamei loapol aitelekarit ŋes loelimit iyapoi, abu kiyapo kolimite elopet,

¹⁴ kobala ebe, “Abeit kotoma arereŋ kesirereŋenenei jo, ka aiyat keyatanakinenei jo.”

¹⁵Kwape kwaŋin kanuka atitiŋikin abu kodum aisumunet ŋin.

¹⁶ Naarai iyapoete ituŋa kolimito loepol aitelekarit kes, ido kotoma opegetakec kere, edauni aiyapoet aitogogoŋ,

¹⁷Aso naakotor Edeke aitodikin cut noi ikerumak luka aisumunet kwape mam ijulakinor akekot, abu kodiek kaiyaposit,

¹⁸ tetere kanuka akiro aarei numam ijulakinos, numam epedori Edeke aiŋal, kidumuni aitalakario naegogoŋ, oni lukirurukit aikamun amun naibwaikinitai kakonyenewok.

¹⁹ Kija kaŋin kwape edobo loka aijar, loicasit loegogoŋ, amun naelomari mama ejai naejai toma aigalisit,

²⁰ neabu Yesu koloma kwape ekeŋarenon kanuwok, abu koraun esasedoti lopeti ikar kere kwape ejaar epone loka Melukisadek