Read Ateso Iburanian 7 Bible Online

Iburanian 7 - Ateso bible

Iburanian 7

¹ Naarai Melukisadek ŋol, ekabaka loko Salem, esasedoti loka Edeke Loejai kuju kakuj, loeriamunos ka Aburaam naaboŋunio kajar ikabakan, abu kilipak ŋes arereŋ;

²loabu Aburaam kokorak idiopet kotomon koboroke kere. Nasodit, arai ijulakini ekekiror, erai ŋesi ekabaka loka adolit, bobo da ekabaka loka Salem, ŋes atemar ebe ekabaka loka ainapakin.

³ Emamei ŋes papa, karaida toto, karaida lukapapaake, emamei ageunet naka apaarasiake, karaida esaŋe loka aijarake, konye itupusitoi ka Okoku loka Edeke, esalakinit erai esasedoti apaarasia kere.

⁴Aso ca koomito etuŋanan ŋol, kwape keraar loepol! Abu Aburaam papaawok koinak ŋes idiopet kotomon kaluŋatuna.

⁵ Ŋul da lukodwe luka Lebi lueinakinio esasedotene ejaas kaicorakinet ayaŋanar idiopet kotomon kotuŋa kwape ejaatar ikisila, kes iinacanakec, karaida ŋul da kelomunete kotoma akuan naka Aburaam.

⁶Konye ŋol lomam imaritai lukapapaake kamakec, abu kodum idiopet kotomon kama ka Aburaam, kilipak arereŋ loejaas kaisumuneta.

⁷Konye emamei epeget nepepec da, ebe, ŋipakini lokapolon lodidi arereŋ.

⁸Kane da edumunete ituŋa luetwakete idiopet kotomon, konye kalaije, ŋol loiteienunio ebe ejari,

⁹Epedorio einer ebe Lebi da, loedumuni idiopet kotomon, abu koinak idiopet kotomon kotoma Aburaam,

¹⁰naarai koriŋa ejai toma akuan naka papaake naeriamunotor Melukisadek kaŋes.

¹¹Aso arai kejai aitodolikinio kanuka esasedotene loka Ilebin, (naarai apotu ituŋa kodumut ikisila kanuka ŋol,) kanukinyo ipudare bobo esasedoti ece anyoun kwape ejaar epone loka Melukisadek, komam imarakinio kwape ejaar epone loka Aaron?

¹²Naarai naelocokinere esasedotene, ibusakinit ikisila da ailoeokinio.

¹³Naarai ŋol loalimitere akiro ŋun kerai loka ateker ace, nemam ebunitor etuŋanan kere lokijaanakini kotem.

¹⁴ Naarai idelelei ebe elomunit Ejakaitiwok kotoma Yuda, ateker namam apeŋo Musa elimitor akiro nuka esasedotene.

¹⁵Bobo da iyatasi ŋun aideleleun noi, arai enyounit esasedoti ece kwape ejaar aput naka Melukisadek,

¹⁶loaraun esasedoti, mere kwape ejaatar ikisila luka aicorakinet naka akuan, dimarai kwape ejaar apedor naka aijar namam edaun.

¹⁷ Naarai itejenunitai ebe, “Irai ijo esasedoti kiton ikar kere, Kwape ejaar epone loka Melukisadek.”

¹⁸Naarai kepuai epaluni aicorakinet nageet kanuka akalanyanut ka amamus ajokisike,

¹⁹ (naarai emamei ibore yenitodolete ikisila;) kepuai da aponi kitolomikin amun naitelekarit ajokis, nakikunyaria mama ejai Edeke.

²⁰Ido mam abu kojau komamei aiyaposit.

²¹ Naarai koraut kesi isasedotin komamei aiyaposit, konye je kitaraunai kaiyaposit kanuka ŋol lokelimokini ŋes ebe, “Abu Ejakait kiyapo, komam iitokini ebe, ‘Irai ijo esasedoti kiton ikar kere.’ ”

²² Abu Yesu da korau kwaŋin ekabwoaran loka aitutuket naitelekarit ajokis.

²³Kes da aponi kitaraununai isasedotin luipu, naarai etikokinit kes atwanare ajaenena osasedotene;

²⁴konye ŋol, esasedoteneke mam ikopanar, naarai ejaenena ikar kere.

²⁵ Kanuka ŋun ŋes epedoria aitajar cut luepote mama ejai Edeke kotomakeŋ, naarai ebusi ŋesi apaarasia kere apuronokin kes.

²⁶ Naarai ibusakinit oni ajaut kesasedoti lopeti loikoni nen, lokalaunan, loemamei aronis, karaida elos, loetiakunitai kama ejaas ikadiakanarak, loitopolooritai da adepar akuj.

²⁷ Mam ŋes iburao ŋinipaaran, kwape isasedotin kwi lupeti, ainanakin asuban, naegei kanuka adiakanaretake, kosodi konyet kokau kanuka ŋun nuka ituŋa; naarai abu ŋesi kiswama, kwaŋin irwan atipet bon naejaikinor elopet.

²⁸ Naarai eseunete ikisila ituŋa luekalanyaka, araun isasedotin lupeti; konye do akirot naka aiyaposit naetupakini ikisila, abu koseu Okoku loitodolikinitoi kiton ikar kere.