Read Ateso Yakob 1 Bible Online

Yakob 1 - Ateso bible

Yakob 1

¹ Yakob ebulesit loka Edeke ka loka Ejakait Yesu Kristo, Mama ejaas atekerin atomon kanuarei nuesiarakinos: Yoga.

² Iinacanaka, koomitos kere araut nukaiyalama, naidoioto toma acodunio nakiponesio luipu,

³ kojenete ebe aitemio naka aiyuunikus eyauni atitiŋikin,

⁴Ido kojau atitiŋikin kaswam naedoliorit, tetere iraunos luipolok, luitekoro, komam adiokirot nakiwolikinit.

⁵ Arai ejai kayes yenewolikinit acoa, kilip Edeke loeinakini kere kajalit, kwabo mam itoroni, ŋes da einakinio.

⁶ Konye kilip kotoma aiyuun, komam ebuonokin, naarai yenebuonokini eputosi bala akailan naka aŋolol, naekutanari ekwam kibukanari.

⁷Kinyek ituŋanan ŋin aomit ebe edumuni ibore kama ejai Ejakait;

⁸ituŋanan yenika itauon iarei, yenimam icasit korotinike kere.

⁹ Konye koolobob onace loitisilitoi kanuka aitopoloorioke,

¹⁰ koolobob lokabaran da kanuka aitisilioke, naarai eraraar kwape aturot naka inya.

¹¹Naarai elomuni akoloŋ isirinyori amwanis inya, edoi aturotoke, eoliori da ajokis naka aputoke. Isokokoi lokabaran da kwape kwaŋin kotoma alositeke.

¹² Isirereŋitoi etuŋanan loetitiŋikin acodunio, naarai kedau acamunio, edumuni aboko naka aijar naisumunikinit Ejakait lueminasi ŋes.

¹³Kinyek yenecodunio einer ebe, “Edeke kacoduni eoŋ” naarai mam epedori Edeke acodunio kanukaronok, ido ŋes elopet mam ecoduni ituŋanan kere.

¹⁴ Konye ŋinituŋanan ecodunio kiriite ekeimiel elopet kaijodijodio,

¹⁵Kosodi kepotuu eimiel euriei adiakar, adiakar ŋin da kepoloor idouni atwanare.

¹⁶Ikainacan luminan, siriŋalas.

¹⁷ Ŋiniinakinet naejok, ka ŋiniijaikina naedolit ebuni kokuju, ijesuni kama ejai Papa loka luecaete, emamei ailoconokin kamakeŋ, karaida etoribe loka aibelonokin.

¹⁸ Kanuka akoteke abu kouri oni kakirot naka abeit, tetere kirauni kwape araito nusodit nuka isubanake.

¹⁹ Ijenete ŋin, iinacanaka luminan. Aso korai ŋinituŋanan yenisunyit aiirar, yeniyapi einer, yeniyapi anyunyura,

²⁰ naarai anyunyura naka etuŋanan mam iswamai adolit naka Edeke.

²¹ Kanuka ŋun kolacasi asilianut kere ka aronis naelitoro, kijaut kaiyapepera akirot nairaitai toma, naepedori aitajar aijarakus.

²² Konye koraas ikeswamak akirot, kwabo mere ikeirarak bon, luimodas.

²³Naarai arai iirari ituŋanan akirot, komam iswamai, eputosi ŋin ituŋanan yeneanyuni akonyen nuka aurioke kotoma aroet;

²⁴naarai eanyuni, kolot, atipet imurwokini kwape eputor.

²⁵ Konye yenirerei ikisila luedolito, luka aosikinio, kodunyakinite kotomakec, sirikeraun ikeiraran yenimurwokini, konye ikeswaman aswam, isirereŋitoi ituŋanan ŋin kotoma kanuiswamai.

²⁶ Arai eomit ituŋanan kere ebe erai yenikedini, komam itikokin aŋajepeke, kiŋalai etauke, edini loka ituŋanan kaŋin erai lotai.

²⁷Edini loelai, loemamei elos kakonyen nuka Edeke Papa ŋes lota: aanyanar ikokiok ka apuserun kotoma ocanikec, ka aidar bon kakwap komamei amasikinet.