Read Ateso 2 Petero 1 Bible Online

2 Petero 1 - Ateso bible

2 Petero 1

¹Simon Petero ebulesit ekiyakia da loka Yesu Kristo, Mama ejaas ŋul luadumutu aiyuun naketiai loepol naeriakas kanakosi kotoma adolit naka Edekewok, Eketajaran da Yesu Kristo:

² Kiyatanakin asianut ka ainapakin mamakus toma ajenun Edeke ka Ejakaitiwok Yesu Kristo.

³ Naarai abu apedor naka eidekeoneke koinak oni akiro kere nuka aijar ka nuka ayoŋit Edeke, kanuka ajenun ŋol lokinyarauni oni kanuka aibusesuke ka ajokisike elopet;

⁴nukiinakinia oni aisumunetake nuepolok nuketiai loepol; tetere kotoma kaŋun iraunete ikamorak luka einono loka Edeke, nuipotu kokuiata anyoun kotoma amudiario naejai toma akwapin kanuka aiŋobel.

⁵ Konye kanuka ŋupe kaŋun da kodunyakis noi aiyatakin ajokis kotoma aiyuunikus, kotoma ajokisikus da ajenun,

⁶kotoma ajenun du aitikokina, kotoma aitikokina da atitiŋikin, kotoma atitiŋikin da ayoŋit Edeke,

⁷ kotoma ayoŋit Edeke da amin iinacan, kotoma amin iinacan da amin,

⁸Naarai arai kijaunos kaŋun kidilas, kituluorete yes lumam iloŋwaka, ka lueraete araito kotoma ajenun cut Ejakaitiwok Yesu Kristo.

⁹ Naarai yenemameete ŋun, erai imuduki yeneturiaitoi, kimurwokinite aitesegario adiakanaretake nukolo,

¹⁰Aso iinacan, kiyatanakis noi adunyakin aitogogoŋ anyarauniokus ka aseunio da, naarai arai iswamaete ŋun, mam iguikinos nepetai da;

¹¹ naarai kwaŋin kiinakinio kabarara alomaret nakotoma ajakanut namam edaun naka Ejakaitiwok ido Eketajaran Yesu Kristo.

¹² Kanuka ŋun ŋes ecebokinitor apaarasia kere aisiitun yes ŋun, karaida ijenete kicata da kotoma abeit naijaatar.

¹³ Konye aomit eoŋ ebe edolit, aroko ajai toma oidukuru lo aisinyikokin yes kaisiitun,

¹⁴ naarai ajeni ebe eapie apak naka alacar eidukuruka kwape ketejenunia Ejakaitiwok Yesu Kristo.

¹⁵Adunyakini da aisipedor yes ŋinipak aiitun ŋun kadau atwanare.

¹⁶Naarai mam kipou katupenenete awaragasia nuepwakunitai kacoa, nakitejenunia yes apedor ka abunore naka Ejakaitiwok Yesu Kristo, konye kipou kaanyutu akepolou kakonyenekosi.

¹⁷ Naarai naainakinere aiturio ka aibuses nuapotu kama ejai Edeke Papa, kobu da eporoto mamakeŋ kotoma aibuses nakapolou naimwekimweki ebe, “Lo ŋes Okokuka lominat, loalelakinit noi;”

¹⁸kipou keirasi eporoto ŋol loabuni kotoma akuj, nakijaar kaŋes moru lokalaunan,

¹⁹Ido kija kakirot naka inabin naitogogoŋitoi aitelekarit, Ido iswamaete ejok aibwaikin ŋin etau, kwape atala naecaikini aibois nakamuton, aitodol naiwalaria akwap, elomuni da etop kotoma otauonokus.

²⁰Kojenutu na nasodit ebe, emamei akirot naiwadikato inabin naepedori ituŋanan aijul kanuke bon,

²¹ naarai emamei akirot nakedwaritai kakote naka ituŋanan, konye enerenenasi ituŋa nukepote kama ejai Edeke kodoikinite Emoyo Lokalaunan.