Read Ateso 2 Petero 2 Bible Online

2 Petero 2 - Ateso bible

2 Petero 2

¹ Konye apotu kojaut inabin lukeŋalak kotoma otuŋa, kwape ejauniata ikesisianakinak lukeŋalak kotomakus, luitolomunete kaiyeiyea apaar naemudiari, ido koŋerito Lokapolon loagweli kes, iriunete bonik amudiar nakatipet.

² Etuparete da luipu abenyanutukec, ido emoromoroo kanukec erot loka abeit.

³ Kotoma airaŋaanut da itudumunos ameda naepol kamakus kakiro nuepwakunete; atubokiniokec ageun apeŋo mam itiloro, amudiariokec da mam iluranari.

⁴ Naarai arai mam abu Edeke kitim imalaikan naadiakariata, konye kocakak kes ataro, kibwaik da apanya nukamuton, aidaria atubokinio,

⁵ mam da abu kitim akwapin nukolo sek, konye kidar Noa ekalimonokinan loka adolit nepepe kituŋa ice ikanykaarei, naayaunia akalele akwapin nuka lumam eyoŋito Edeke;

⁶ naabu kituluoria ireria luka Sodom ka Gomora ekurwon, kotubok akiro kibiro, kibwaik naanyunet mama ejaas ŋul luepote amamus ayoŋit Edeke;

⁷ koyuu da Lot ekadoliton loeyaloŋoŋoi noi kanuka iponesio luka abenyanut naka ikaronok,

⁸ (naarai ekadoliton ŋol loeboie kotomakec, naaanyunia ka aiirar da, aponi kiticanai ekemoyo loedolit, ŋinipaaran kanuka aswamisiokec nukepali),

⁹ ejeni Ejakait ayuun lueyoŋito Edeke kotoma acodunio, ka aidar lumam edolito kiticanete kiton apaaran naka atubokinio;

¹⁰ konye aitelekarit ŋul luelosenenete atuparit akuan kotoma aiŋobel nakasilianut, komenito ayaio. Iilokina, iswamaete nuekotos, mam emaranete emoromoroete lukaibuses,

¹¹ kwabo imalaikan, karaida kepolok aitelekarit kagogoŋ ka apedor, mam eyaunete akiro nuka amorosit mama ejai Ejakait kamakec.

¹² Konye kes, kwape isuban luemamei acoa, lueuritai bala itiaŋ lutai aikamunio ka amudiario da, emoromoroete kotoma akiro numam ejenete, emudiario cut kotoma amudiarikec,

¹³ ikonakinio kes erono ŋes eropit loka aronis. Eomito nukaiyalama abolia paaran. Eraas akemerin ka amasikineta, eboliaete kopucinokec luka aminanar, emorete kayes.

¹⁴Ejaas kakonye nuileleba adoteu, mam inyeinete adiakar. Ijodijodoete imoyon lumam icasito. Ejaas itauon luituutoro airaŋaanut. Idwe luikenen!

¹⁵ Inyeinete erot loetenit, kosodete apaar atupar erot loka Balaam, okoku loka Beor, loamina eropit loka amamus adolit,

¹⁶ konye aponi kitoronai kanuka epalike; abu asigiria namam inera kiner koporoto loka etuŋanan, kitikok ikerep luka enabi.

¹⁷ Eraas kesi ikico luemameete akipi, ka ilisinai luekutari ekwam; idaritere kes amuton nairiono cucucuc.

¹⁸ Naarai inerasi nukailabilab nuepolok nutai, ijodijodoete kaiŋobel naka akuan kotoma abenyanut, ŋul luakuito apak naedit kama kaŋul kaluelosenenete kotoma apaar.

¹⁹ Isumunete kes aosikinio, kwabo eraas kesi ikulepek ibulesin luka amudiar; naarai ŋin yenipikori ituŋanan, eraun ŋesi ibulesit yenika ŋin.

²⁰ Naarai nakedauniata aiku anyoun kotoma asilianut naka akwapin, toma ajenun cut Ejakait, ido Eketajaran Yesu Kristo, arai inyalinyalunos bobo kaŋin, kipikoroi, eraunos nukawasiakec nukaronok adepar nusodit.

²¹ Naarai tiejok kamakec arai kemam kejenunito erot loka adolit, itia aboŋor kau ainyein aicorakinet nakalaunan naaponi koinakinai kes kedaut ajenun.

²² Adoiki kes kwape ejaar awaragan nakabeit ebe, Eboŋori ekiŋok alekanake, ka apege da nailoŋoŋ eboŋori eipwok orit.